لطفا چند لحضه صبر کنید
این انجمن در ستاد ساماندهی پایگاه های اینترنتی وزارت فرهنگ و ارشاد اسلامی ثبت شده است...
مدرن کلمه‌سی دیلیمیزده "چاغداش" کلمه‌سیله قارشیلانمیش اولسادا "مدرن‌شعر" باغلامیندا "چاغداش" کلمه‌سینی ایشله‌ده بیلمه‌ریک. یانی مدرن شعر، چاغداش شعر دئمک دئییل‌دیر. مدرنیزم ۱۸۸۰-جی ایل ایکینجی دونیا ساواشی ایللرینه کیمی سورَن زامان ده‌ییشیک فورموندا سنّت‌دن بوتونلکله قوپماسینی ساغلاماق هدفی‌نن اورتایا چیخمیش، یئنیلیک‌چی دئییش‌لر، خارق‌العاده ارائه ائتمک تکنیک‌لری و تپ‌تزه سؤیله‌مه فورملاریلا یاراتما ائتکینلییینه یئنی بیر  نفس قازاندیرمیش بیر هونر کیمی‌دیر. مدرن شعر ده بو آخیما پارالئل(موازی) اولاراق، شعرده اورتایا چیخمیش آنلاییشلاری شامیل اولار. دادائیزم، فوتوریزم، سوررئالیزم، اکسپرسیونیزم کیمی آخیملار، مُدرنیست چرچیوه‌ده ده‌یرلندیریلیر


ذهنیت
مدرنیزم، فردیت و عقلین اوتونومی‌سی(خودمختاری) پدیده‌سی اوزه‌رینده تَمل‌له‌نیر. مدرن هونرین سئچکینچی کاراکتئری ده هونرین اوتونومیسی چرچیوه‌سینده اورتایا چیخار. ارتیق اخلاق، علم یا دا دین، هونرمنده ائشیکدن بویوراماجاغی اوچون، هونر اؤز قورالینی اؤزو قویاجاق هونرمندین اؤنونده‌کی تک سئچه‌نک اؤز تجروبه‌سی اولاجاقدیر. تجروبه مدرن هونرمندین اصالتینده، کؤلگه‌سینده آخیمدان آخیما چاپدیغی بیر آت کیمی‌دیر. هونرمندین بوتون اطلاعات و بیلگی‌لری، قالیبلری قیریب پارچالامادا، اؤزگون، اصیل و اؤزونه مخصوص محصوللار اورتایا قویمادا تک رهبری بو اؤز تجروبه‌سی اولاجاقدیر.


آهنگ
مدرن شعرده آهنگ اجزاسیندان اولان اؤلچو و قافیه بوتونو ایله سنّتی بیر وسیله اولاراق باخیلدیغی گؤرولور. آنجاق شعردن شعره فرقلی‌لیک‌لر اولماقلا بیرلیکده سس، کلمه و میصراع تیکرارلانمالاریندان واز کئچیلمز. شعرین فردی تجروبه‌سینه باغلی اولاراق، شعرده سس آخیشینا اؤنم وئریلیر‌.


یاپی(ساختار)
مدرنیزم، بوتون هونر شاخه‌لرینده اولدوغو کیمی شعرده ده اؤزه‌للیکله فورم باخیمیندان سنّت‌دن قوپماغی گتیرمیشدیر. مدرن شعر، فورم اورتامیلا اینانیلماز بیر جرأتله اوینایان بیر ائستئتیک آنلاییشین محصولودور. شعر، مدرن شعر اوچون یارادیجیلیغین هئچ‌بیر تابو تانیمادان "آت اویناتدیغی" بیر متن‌دیر. بو ندن‌له مدرن شعرده آرتیق سربست نظمین ائشییینده بَللی بیر ساختاردان، بَللی بیر نظم فورموندان هئچ سؤز ائدیلمز.

دیل
مدرن شعرده دیل لاپ قاریشیق عنصرلاردان بیری ساییلیر. شاعیر، دیققتینی ایچه‌ریکدن فورما، عینیت‌دن انتزاعیاتا چئویرمیش و شعری‌ بیر دوشونوش طرزی اولماقدان چیخاراراق، بیر ارائه طرزی کیمی درک ائتدیرمه‌یه باشلامیشدیر. بو ‌شعرین اوخویانی، دیل و تصویر لایه‌لرینده آشیب ایچ‌ایچه قاتلانمیش آنلام دونیاسیندا "یولونو ایتیرمه‌دن" حرکت ائلیه‌بیلن بو سخت‌افزارا صاحیب بیر اوخوردور. بو "یئنی اوخور"، شعری یالنیز ایچه‌ریک باخیمیندان سئچمه‌یه‌جک؛ دیققتلی بیر رویکردله اثرین فورم یؤنو ایله داشیدیغی یئنی‌لیک‌لرین ده ده‌یه‌رینی بَلیرله‌یه‌جکدیر.

تئم
سّنتی شعره تپکی اولاراق گَلیشه‌ن مدرن شعر، چاغداش قونولارا اه‌ییله‌رک شعرین قونو دونیاسینی گئنیشله‌دیرکن یئنی باخیش آچیلاری دا گتیرمیش؛ گؤزل‌له بیرلیکده چیرکین، یاخجی‌لا بیرلیکده پیسی، منطقلی اولانلا بیرلیکده سفئیی ده گؤسترمه‌یه چالیشمیشدیر. چاغیمیزداکی فردین قایغیلاری، اؤزونه و جامیعه‌یه اؤزگه‌له‌شمه‌سی، یالقیزلیغی، بحرانلاری، مدرن شعرین اَن چوخ ایلگی دویدوغو تئم‌لر اولموشدور.

+0 به‌ین

گؤنده ريليب تاريخ سه شنبه 18 تیر 1398يازار بولاق
|
اثرلريزي بو سایت‌دا ياييملاماق ايسترسه‌نيز، يازديغيميز ايمئيل طريقيله بيزيم‌له ايلگي قورون. اثريزي يوللاياندا شکيليزي‌ اونوتمايين
قالب وبلاگ