Welcome in BULAQ
Bulaq_derneyi@
باغلانتي‌لار
اثرلر
| رديف | يازار | اثر |
|---|---|---|
تبليغ‌لر
بیر دفعه «نیو تایم» ژورنالی‌نین رئداکتورو «استیو موس» اَن قیسا حئکایه مسابقه‌سینی کئچیرمک ایسته‌دی. لاکین بو، داغینیق جمله‌لر دئییل، ۵۵ سؤزدن عبارت، سوژه‌لی، پئرسوناژلی و قفیل سونلو متنلر اولمالی‌ایدی. رئداک‌سییایا او قدر حکایه گؤندریلدی کی، اونلارین اَن یاخشیلاری «دونیانین اَن قیسا حئکایه‌لری» کیتابیندا توپلاندی. بیر نئچه‌سینی بوردا اوخویورسوز:
گؤروش (نیکول وئدل)
تئلئفون زنگ چالدی.
- آللو، - قادین پیچیلدادی.
- ویکتورییا، منم. گل بو گون گئجه‌یاریسی گؤروشک.
- یاخشی، عزیزیم.
- خاهیش ائدیر‌م، اونوتما، اؤزونله شامپاین گؤتور.
- گتیرر‌م، عزیزیم، من بو گئجه سنینله اولماق ایسته‌ییرم.
- تلس، منی گؤزلتدیرمه! - کیشی دئدی و تلفونو قاپاتدی.
قادین کؤکسونو اؤتوروب گولومسه‌دی:
- گؤره‌سن، او قادین کیمدی ...
گیزلن‌قاچ (کورت هومان)
- ۹۹، ۱۰۰! کیم گیزله‌نه بیلمه‌دیسه، اؤزوندن کوسسون! گیزله‌ننلری آختارماغی سئومیرم، آمما بو منه داها راحاتدی. قارانلیق اوتاغا کئچرکن، ایچری‌ده گیزله‌ننلره پیچیلداییرام: «گلیرم هااا...» اونلار گؤزلری ایله منی اوزون دهلیز بویو اؤتورورلر، و دیوارلاردا آسیلمیش گوزگولرده منیم قارا چوخالی بد‌نیم، دریازلی الیم عکس اولونور.
*دریاز: اوراق، داس
بدبخت (دئن ائندروس)
دئییرلر، شَررین صیفتی یوخدور. حقیقتن، کیشی‌نین اوزوندن هئچ بیر حیسس دویولموردو. بیر دامجی متاثرلیک یوخدو اوندا، اولا بیلسین کی آغریسی دا دؤزولمزدی. مگر او، گؤزلریمده‌کی دهشتی، اوزومده‌کی هیجانی گؤرمورمو؟ کیشی ساکیتجه، حتی دئیییردیم، پئشه‌کارجاسینا چیرکلی ایشینی گؤروردو، سوندا دئدی: «هه، ایندی آغزینیزی یاخالایین...»
هئلله‌دیجی آن (تینا میلبئرن)
قیز باغلانان حبس‌خانا قاپیلارینین سسینی ائشیدیردی سانکی. آزادلیق تامام ایتیریلمیشدی، ایندی قیزین طالعی اؤزگه اللرینده‌یدی، و بیر داها او، آزاد اولمایاجاقدی. قفیلدن آغلینا دلی فیکیر گلدی کی، بورالاردان قوپوب اوزاقلارا، لاپ اوزاقلارا اوچسون. آمما بیلیردی کی، بو مومکون دئییل. قیز تبسسومله اوغلانا طرف دؤنوب تکرار ائتدی:
- هه، راضییام.
یاتاق احوالاتی (جئفری اویتمور)
- احتیاط‌لی اول، قیز، اوردا گولـله وار، - یاتاق اوتاغینا قاییدان کیشی دئدی. قیز چارپایایا سؤیکنمیشدی.
- بو سنین آروادین اوچوندور؟
- یوخ. بو بؤیوک ریسک اولاردی. من موزدلو قاتیل توتاجام.
- بلکه موزدلو قاتیل منم؟
کیشی آجی-آجی گولدو:
- کیمین آغلینا گلر کی، کیشینی اؤلدورمه‌یی قادینا تاپشیرسین؟
قیز دوداقلارینی یالاییب تاپانچانی کیشییه توشلادی:
- سنین آروادینین...
خسته‌خانادا (بارنابی کوندرادئشئ)
قادین آوتوموبیلی دلی کیمی سوروردو. آمان تانریم، تکی واختیندا چاتیم...
یوغون‌باخیم‌بؤلوموندن(بخش مراقبتهای ویژه‌دن) چیخان حکیمین اوزوندن قادین هر شئیی آنلادی. هؤنکوردو.
- میسسیس آللئرتون، سیز اؤزونوزو خوشبخت سایمالیسیز، - حکیم دئدی. - اونون سون سؤزو بئله ایدی: «من سنی سئویرم، مئری»...
او، حکیمه قورو نظر سالیب اوزونو چئویردی:
- میننتدارام، - سویوق طرزده اعتیناسیز جاواب وئردی.
باغچادا (هووپ ائی توررئس)
قادین باغچادا ایدی، بیر ده گؤردو کی، کیشی اونا طرف قاچیر.
- تینا! منیم گولوم! حیاتیمین معناسی!
نهایت کی، او، بو سؤزلری دئدی.
- او، تام!
- تینا، منیم گولوم!
- او، تام، من ده سنی سئویرم!
تام قادینا یاخینلاشیب، اونو کنارا چکدی و دیز چؤکدو:
- منیم گولوم! سن منیم سئویملی قیزیل‌گولومو آیاقلامیسان!
چئویرن: سیما عنناغی
حاظیرلاییب اویغونلاشدیران: بولاق
0باخيش