Welcome in BULAQ
Bulaq_derneyi@
باغلانتي‌لار
اثرلر
| رديف | يازار | اثر |
|---|---|---|
تبليغ‌لر
دونیا ادبیاتیندان قیسا حئکایه‌لر
حاضیرلایان: بولاق
چئویرن: رامیل احمد
خاویئر آلفارو کالوو
سئوگی‌نین زامانی
اینسان سئونده زامان دایانیر. صاباح ایکی ساعت بویونجا سنه باخدیم. دونن سنه داها چوخ باخا بیلمک اوچون اؤزومه ایکی علاوه گؤز آلاجاغام.
***
آوقوستو مونتئرروسو
قارا قویون
ایللر اؤنجه اوزاق بیر اؤلکه‌ده یاشایان بیر قارا قویونو گولـله‌له‌دیلر. یوز ایل سونرا پئشمان اولان سورو اونون آت اوستونده بیر هئیکلینی اوجالدیب پارکین اَن گؤزل یئرینه قویدولار. سونراکی ایللرده ده نه زامان بیر قارا قویون گؤرسه‌لر اونو دا او دقیقه اعدام ائدیرلرمیش کی، گله‌جک نسیللرین سیرادان قویونلاری هئیکل صنعتی‌له مشغول اولا بیلسین.
***
آلئژاندرو ژودورووسکی
پری
باشیندا تاجی اولان قورباغا بیر آدامین اؤنونو کسیب «اؤپ منی» دئدی. آدام دوشوندو: «قورباغا اووسونلانیب. اونو اؤپسه‌م کیراللیغین واریثی اولان گؤزل بیر شاهزاده‌یه چئوریله بیلر. اونونلا ائوله‌نیب تاخت-تاجا صاحب اولارام». و قورباغانی اؤپدو. آدام بیر گؤز قیرپیمیندا قورباغایا چئوریلدی. اؤپدویو قورباغا سئوینجله قیشقیراراق دئدی: «عزیزیم، چوخداندیر سنه جادو ائدیبلر، اما نهایت سنی خیلاص ائتدیم!»
***
کارئل چاپئک
یانلیش
آغ‌ده‌نیزده گمیله گئدیردیک. هر یئر گؤمگؤی‌دور. دنیزین هارادا بیتیب سمانین هارادا باشلادیغینی آییرد ائتمک اولمور. بونا گؤره لیماندا و گمی‌ده هر یئرده هارانین یوخاری، هارانین آشاغی اولدوغونو گؤسته‌ر‌ن لؤوهه‌لر وار. بو لؤوهه‌لر اولماسا آدام سمایلا دنیزی قاریشدیرار. اؤته‌ن گون گمیمیزین کاپیتانی بیر گمینین یانلیشلیقلا دنیزده اوزمک عوضینه سمایلا اوزدویونو دئدی. گمی اوجسوز-بوجاقسیز سمادان بیر داها گئری دؤنمه‌دی و ایندی اونون هارادا اولدوغونو هئچ کیم بیلمیر.
***
خولیو کورتاسار
پاسکالیا آداسینین گوزگولری
پاسکالیا آداسینین غربینده گوزگویه باخاندا کئچمیش زامانی، شرقینده گوزگویه باخاندا ایسه گله‌جک زامانی گؤرمک اولوردو. آنجاق میلیمترلیک اؤلچویله گوزگونون آدادا ایندیکی زامانی گؤستردییی نقطه‌نی تاپماق اولاردی. یئنه ده گوزگونون هاراداسا دوزگون گؤسترمه‌سی بوتون گوزگولرین ده دوزگون گؤستردییی معناسینا گلمیردی. چونکی فرقلی ماتئریاللاردان حاضیرلانان بو گوزگولرین ایشله‌مه مئتودو فرقلی ایدی. بو سببله گوگئنهئیم تحصیلی بورسو ایله آدایا تدقیقات اوچون گلن آنتروپولوق(انسان‌شناس) «سالومون لئموس» آدانین شرق طرفینده اوزونو قیرخارکن گوزگوده اؤزونو خسته‌لیکدن اؤلموش گؤردو. اما عینی زاماندا پاسکالیا آداسینین غربینده‌کی کیچیک گوزگو هئچ کیمه (چونکی قایالارین آراسینا دوشموشدو) اؤنجه شورتلا مکتبه گئدن «سالامون لئموس»و، سونرا آناسی و آتاسی طرفیندن واندا سئوینجله صابینلانان بالاجا «سالومون لئموس»و، سونرا دا ترئنکوئ لاوقینده‌کی بیر تارلادا «قوو قو» دئیه‌رک خالاسی رئمئدیتوسو دویغولاندیران «سالومون لئمسو»و گؤستریردی.
***
ایستوان اؤرکئنی
یووا
قیزجیغازین دؤرد یاشی واردی. اؤته‌ن گونلری چوخدان اونوتموشدو. آناسی اونو ده‌ییشیکلیکلره حاضیرلاماق اوچون تیکانلی مفتیللرین یانینا گتیردی. اوزاقدان کئچن قاتاری گؤستریب دئدی:
– باخ، او قاتار بیزی ده ائوه آپاراجاق.
– بس اوندا نه اولاجاق؟
– اوندا اؤز ائویمیزده اولاجاغیق.
– نه دئمکدی اؤز ائوینده اولماق؟ – دئیه سوروشدو قیزجیغاز.
– یعنی اوللر یاشادیغیمیز یئره قاییداجاغیق.
– نه وار کی اورادا؟
– بالاجا آیی اویونجاغی خاطیرلامیرسان؟ بلکه، دیگر اویونجاقلاریندا دورور هله.
– آنا، ائوده ده گؤزتچیلر اولور؟
– یوخ، قیزیم، ائوده گؤزتچیلر اولمور.
– یعنی اورادان قاچا بیله‌ریک؟
0باخيش