Welcome in BULAQ
Bulaq_derneyi@
باغلانتي‌لار
اثرلر
| رديف | يازار | اثر |
|---|---|---|
تبليغ‌لر
«بولاق درنه‌یی» و «ایلقار مؤذن‌زاده»ایله
موصاحیبه
ایشیق:
آذربایجان ادبیات اوجاق‌لاری: «بولاق درنه‌یی»
و «ایلقار مؤذن‌زاده»ایله موصاحیبه
آذربایجان ادبیات اوجاق‌لاری اؤلکه‌نین مختلف
شهر و شهرجیک‌لرینده گونو گوندن شعله‌لنمه‌ده‌دیر. بو اوجاقلارین حرارتینده قیزینان
بیر چوخ شاعر و یازیچیلاریمیز بو گون ادبی جمعیتیمیزین پارلاق سیمالارینا چئوریلیبدیرلر.
عینی حالدا بو گون آذربایجان مدنیتی‌نین اینکیشاف یولونون بؤیوک بیر قیسمی بو درنک‌لردن
کئچیر. بو درنک‌لرین بیر چوخو اوزون ایللردیر آذربایجان مدنیت بایراغینی قالدیراراق،
ادبیات و مدنیتیمیزین گور اوجاقلارینا و اونلاری تشکیل و رهبرلیک ائده‌ن بیر چوخ
صنعتکارلاریمیز آذربایجان مدنیتی‌نین سارسیلماز صنعت فدایی‌لرینه چئوریلیبدیرلر.
«ایشیق» – آذربایجان ادبیات و اینجه
صنعت سایتی، اوخوجولارینی بو درنک‌لرین فعالیتلری‌ایله تانیش ائتمه‌یی اؤزونه مقصد
گؤتورموشدور. بوندان اؤنجه تهراندا فعالیت گؤسترن «خدافرین درنه‌یی» و اونون
رهبرلریندن اولان شاعر «عدالت امی(دومان)»لا موصاحیبه‌میز اولدو. بو دؤنه آذربایجانیمیزین
تانینمیش درنک‌لریندن اولان خییوو شه‌هری‌نین «بولاق درنه‌یی”نین ادبی- مدنی فعالیتلری
باره‌ده یازیچی «ایلقار مؤذن‌زاده»ایله دانیشیق آپارمیشیق.
@ilqar_moazzenzade
ایلقار مؤذن‌زاده – یازیچی/ شاعر
ایلقار موذن‌زاده ۱۳۶۳-جو ایل مهر آیی‌نین ایرمی آلتیسیندا
اردبیل بؤلگه‌سینین خییوو آدلی شهرینده دونیایا گؤز آچمیش. دیپلم تحصیلاتینی بو شه‌هرده
بیتیریب، پیسخولوژی ساحه‌سینده لیسانس آلیب و ایندیسه همن ساحه‌نین یوکسک لیسانس
اؤیرنجیسی‌دیر. ۱۵ ایله یاخیندیر کی یازیر. یارادیجیلیغی‌نین ایلک ژانری داها آرتیق قیسا
حئکایه‌لر یازماق اولوب؛ عینی حالدا یازیچیلیق‌لا یاناشی سربست شعرلر مؤللیفی کیمی‌ده
ادبی جمعیتیمیزده چیخیش ائتمیشدیر. یارادیجیلیق ایللرینده بیر نئچه ادبی یاریشلارین
غالبی اولوبدور. او جومله‌دن ۲۰۰۹ینجی ایل «ماراغا آلما فئستیوالی» نین سربست شعر بؤلومونون بیرینجیلیگی،
۲۰۱۰ – «آنامین یایلیغی شعر فئستیوالی»نین کلاسیک شعر بؤلومونون بیرینجیلیگی،
۲۰۱۳ – اردبیلین «حدیث عشق» آدلی اؤیکو یاریشماسینین بیرینجیلیگی و ۲۰۱۴-
«تبریز ادبی اؤدولو»نون حئکایه
بؤلومونون بیرینجیلیگی اونون یارادیجیلیق اوغورلاریندان ساییلیر. بو ایللرده ایلقارین
بیر چوخ شعر، حئکایه و ادبی تنقیدی مقاله‌لری «آفتاب آذربایجان»، «هفته نامه خیاو»،
«هفته نامه موج بیداری»، «هفته نامه سهیل»، «چیراق» درگیسی، «هفته نامه بانگ
ساوالان»، «کولتور گئجه‌سی»، «آذری»، «دیلمانج» و ائله‌جه‌ده آذربایجان جومهوریسی
و تورکیه‌نین قزئت و ژورنال‌لاریندا یاییلمیشدیر.
«ایلقار مؤذن‌زاده» دوستلاری «عیسی زینی»
و «زامان پاشازاده» ایله بیرلیکده
«اوچلوک» آدلی بیر دیجیتال ادبی ژورنالین‌دا
مودیری کیمی فعالیت گؤسترمیشدیر. ایندیلیکده مجازی «بولاق» شعر و حکایه درنه‌یی‌نین
رهبرلریندندیر.
»ایشیق»
***
س: هر سؤزدن اؤنجه، بولاق درنه‌یی‌نین یارانماسی باره‌ده اوخوجولاریمیزا
نه معلومات وئره بیلرسینیز؟
ج: بولاق درنه‌یی ۹۱-جی ایل مهر آیی‌نین ایکیسینده، ایلقار
موذن‌زاده‌نین تشبثی ایله مجازی دونیادا یاراندی. او زامان ارشاد اداره‌سینده خییوو
شعر جلسهلرینین دولاندیرانی اولان ایلقار موذن‌زاده، بولاق آدلی بیر درنه‌یین یارانما
اؤنریسینی وئردیکده، بوتون عضولار بو درنه‌یه قاتیلیب بوردا چالیشدیقلارینی اونایلادیلار.
سونرا عضولار درنکده اوخونولان و یازیلان اثرلرین مجازی دونیادا(بولاغین وبلاگیندا)
یاییملانماسینا قرار وئردیلر. بئله‌لیکله اوچ ایله یاخیندیر بو درنک دایانمادان
چالیشیر و ایندیه کیمی عضولارین و باشقا شه‌هرلرین شاعیر و یازیچیلاریندان ۳۱۱ اثر بو درنه‌یین
مجازی آلانیندا یاییملانیب.
س: درنه‌یین اساس مقصدلری نه‌دن عبارتدیر؟
ج: درنک خییوو شاعیر و یازارلارینین بیر یئرده
و بیرگه چالیشماسی آماجیلا یولا دوشدو. تام یئنی-یئتمه ادبیاتچیلارین یازیلاری و
شعرلریندن توتدو تام پرفئسیونال ادبیاتچیلارین یارادیجیلیقلارینا کیمی یاییملاندی.
یوکسک سویه‌لی شعرلردن، یئنی باشلاییب یازانلارین یازیلارینا کیمی. هر اثر اؤز یازارینین
سویه‌سی اساسیندا گوجونه و گوجسوزلویونه باخمایاراق یاییملاندی و هر کیمسه اؤز بیلیمی
قدر اونا باخیش یازیب و یا تنقید ائتدی. چالیشیلدی کی ائله ایلک گوندن بوتون
عضولار نظر و تنقید ائتمک پرینسیپینی اؤزلرینده یارادیب و اوخونولان اثرلره اکتیو
اولاراق نظر وئرسینلر. بو اساس دا بورا کیمی ۱۵۱۲ باخیش یازیلیب و جلسه‌لرده عضولارین
چوخو تنقید ائتمک مئتودلارینی وئردییی باخیشلاردا یئرینه سالماغا باشلادیلار. منطیقلی
و غرض‌سیز باخیش‌لاری یازیب، بیلیمسل تنقیدله تانیش اولماغی تمرین ائتدیک و دوز
تنقید ائتمک مئتودلارینی اؤیره‌نمه‌یه جان آتدیق، تنقید اولونماق روحیه‌سینی ده
اؤزوموزده یاراتماغا چالیشدیق. آماج ادبیاتیمیزین ایره‌لی‌له‌ییشی و تنقید روحیه‌سی
و فضاسینی آرامیزدا یاراتماق اولدو. هر کیمسه هر ادبی سویه ده اولورسا اولسون بو
درنه‌یه عضو اولا بیلدی و حتی باشقا شه‌هر ده کی سایین شاعیر و یازیچیلارین‌دا
اثرلرینی یایماق قرارینا گلدیک و بو گونه کیمی ۸۸۰۰۰ دؤنه درنه‌ییمیزین وبلاگیندان گؤروش
اولوب.
س: درنه‌یین فعالیت موضوعلاری و
بو موضوعلارین احاطه دایره‌سی؟
ج: بیزیم چالیشما ساحه‌میز گئننلیکله بونلار
اولوب: سربست شعر، قیسا شعرلر، کلاسیک شعر، اؤیکوجوک، اؤیکو، یازینسال پارچالار،
تانیتیم، یاریشما، مقاله، آنی‌لار، چئویریلر، تورکیه شعری و…
بو قونولار و ساحه‌لرده چوخلو اثرلر یاییملاییب
و بیر به بیر بو ژانرلار حاقدا اطرافلی و گئنل بیلگی‌لر ایره‌لی سوروب و هر جلسه
بونلارین باره‌سینده گئنل اولاراق دانیشیقلاریم اولوبدور. ایکی ایل بوندان اؤنجه
شعر جلسه‌سینده اؤیکو یئرله‌شه بیلمه‌دییی اوچون، جلسه‌نی ایکی‌له‌مک اؤنرینی وئردیم
و اؤیکو جلسه‌سینین ده مجوزین آلاندان سونرا چهارشنبه‌لره سالدیق. بو قونودا سایین
«مهدی اصولی» نین ده چوخ ایش بیرلییی و چالیشمالاری اولدو و اوخونلان اؤیکولر
حاقدا اطرافلی دانیشیقلاریلا نقد جلسه‌لریمیز داها سانباللی اولدو. تخمیناً ایل یاریم
بوندان قاباق سایین «غفور امامیزاده» یاشماق درگی‌سینین اساس قوروجو و دولاندیرانی
درنه‌ییمیزه قاتیلماقلا، بیزه بؤیوک گوج و جان وئریب کئچمیشدن داها گوجلو قاباغا
گئتدیک. سایین امامیزاده اؤز درین بیلگی و معلوماتلاریلا و عضولارین اثرلری باره
ده پرفسیونال تنقیدلریله، درنه‌ییمیزین گلیشمه‌سینده چوخ ائتکیلی و بؤیوک رولو
اولدو. هله ده کی هله دیر سایین امامیزاده آغیر ایشلری قیراغیندا واخت آییریب جلسه‌لرده
اولماقلا درنه‌یین ایره‌لی‌له‌ییشینده بؤیوک بیر نقشی وار. آرتیرمالی‌دیر خییوو
درنکلرینین قدیمی عضوو سایین «نجیبه رستم اوغلو(سحر خیاو)» دا همیشه معللیم
اولدوغو و باشقا ایشلری یانیندا واخت آییریب درنکده اولماغیلا بیر آنا کیمی درنه‌ییمیزه
اعتیبار باغیشلاییب و گؤزل شعرلری و باخیشلاریلا بیزی هر زامان یارارلاییب. درنه‌یین
اساس عضولاریندان بیری اولان سایین «علی بدلی» کی آرامیزدا اخلاق سیمگه‌سیدیر،
چوخلو جلسه‌لریمیزده ایشتیراک تاپماقلا جلسه‌نی داها گؤزل ائدیب. آرتیرمالی‌دیر کی
مشکین سینما انجمنی‌نین رئیسی سایین «صابر فرزانه وش» ده اوچ آی مددتینده داواملی
اولاراق جلسه‌لریمیزده حضور تاپماقلا اؤز هونری و گؤزل دوشونجه‌لرینی بیزیمله پایلاشدیلار.
بو نئچه ایلده خییوو و آذربایجانین آدلیم و گؤرکملی شاعیر و ادبیاتچیلاری او جومله
دن: اوستاد نادیر ایلاهی، توکل کیانی، کامیل قهرمان اوغلو، دوکتور سلیم زحمت دوست،
دوکتورمجتبی جهانی، دوکتور صمد رحمانی و … دؤنه‌لرله درنه‌ییمیزده حضور تاپماقلا
جلسه‌لریمیزه اعتیبار باغیشلاییب و اؤز ده‌یرلی حضورلاریلا اوتوروملاریمیزی داها
سانباللی ائدیبلر.
س: درنه‌یین رسمی اورگانی و یا الکترون سایتی وارمی؟
ج: دئمک اولار بیزیم رسمی اورگان «انجمن شعر و
ادب شهرستان مشکین‌شهر»دیر. شعر جلسه‌لرینی دوشنبه‌لر پروفسور محبوبی کیتابخاناسیندا
دولاندیردیغیم زامان، اؤیکو قونوسونا واخت اولمادیغی اوچون چهارشنبه‌لر اؤیکو
کارگاهین اولماسینا مکتوب درخواست وئردیم و موافقت اولوندو. بئله‌لیکله اؤیکو
کارگاهی دا یولا دوشدو. بیر دؤره چالیشماقدان سونرا سایین «غفور امامیزاده» ده اؤیکو
کارگاهیمیزا گلدییینده بیرلیکده هر ایکی درنه‌یی دولاندیردیق. رسمی الکترون سایتیمیز www.bulaq.arzublog.com دیر و سایتیمیز دا بیر ایکی هفته دیر بو آدرسده
www.bulaq.ir یولا
دوشوب و یاخین زامان دا اورا داشیناجاغیق.
س: درنک ایلک گون نئچه عضوله باشلاییب و ایندیسه نئجه رسمی عضوی وار؟
ج: ایلک گونده بیزیم ۱۵ نفره کیمی درنه‌ییمیزه گلن شاعیر و یازیچی
وار ایدی، بو سایی همیشه گئتدیکجه آرتیب، ائله گون اولوب کی اوچ نفر گلیب و ائله
گونده اولوب کی ۴۰ نفر ایشتیراک ائدیب و اوتورماغا یئر و ایمکان اولماییب، آمما هئچ
زامان تعطیل اولماییب و حتی اوچ نفرله ده جلسه‌میز قورولوب. البته یئری وار کی مشکین
شه‌هرین ارشاد اداره‌سی‌نین بوتون کارمندلرینه و هابئله ایندی کی رئیسی و کئچمیش
رئییسلرینه درین تشککوروموزو بیلدیرک. نیه کی ایندیه کیمی همیشه بیزه اوردا ایمکان
یاراتماقلا، الیمیزدن یاپیشیبلار. درنه‌ییمیزده ایشتیراک ائدن سایین شاعیر و یازیچیلاردان
بونلاردیر:
نجیبه رستم‌اوغلو(سحر خیاو) ۲- یعقوب نیکزاد ۳- پروین قاسمی ۴- مرتضی توحیدی ۵- حامد صالح‌زاده ۶- مهسا ابراهیمی ۷- ایرج امامی ۸- رضاحسین اوغلی پریخانی(آغلار) ۹- عیسی زینی ۱۰- کیانوش توحیدی ۱۱- آقای اسدی ۱۲- کیوان قربانی ۱۳- زهرا جعفری ۱۴- زهره امامی ۱۵- خاطره عبدالعلیزاده ۱۶- مهسا عبدالعلیزاده
۱۷- مهسا موسوی ۱۸- مهسا ابراهیمی ۱۹- زهرا شاه حسینی ۲۰- توحید فتاح زاده ۲۱- مرتضی توحیدی ۲۲- نوید احمدزاده ۲۳- خانم ابروتن ۲۴- حامد نکته‌سنج ۲۵- سمانه حبیبی مقدم ۲۶- نسرین قلی پریخانی ۲۷- لیلی رضایی ۲۸- وحید بیگعلیزاده ۲۹- محمد علی‌جعفری ۳۰- رمضان کریم‌زاده ۳۱- مهسا صباغی ۳۲- محمد امینی ۳۳- سمیه خانمحمدی ۳۴- اکبر جمهری ۳۵- علی بدلی ۳۶- سپهر خادم مسجد ۳۷- یعقوب رنجبر ۳۸- مهسا بهلولی ۳۹- ناهید عباسزاده ۴۰- سید نظام موسوی ۴۱- زیبا طبابایی ۴۲- مهناز طبابایی ۴۳- سالار ابراهیم اوغلو ۴۴- رضا سرپرست ۴۵- استاد سهامی ۴۶- رقیه چاکری ۴۷- الهام موسوی ۴۸- رویا موسوی ۴۹- آذر صحت ۵۰- جواد فانی ۵۱- سالار منوری خیاوی ۵۲- راضیه قربانزاده ۵۳- مهدی اصولی ۵۴- ثریا سیمرزاری و…
س: درنه‌یین عضولری آراسیندا قادینلارین مؤوقعی و اونلارین درنه‌یین
فعالیتینده اشتراک ائتمه‌لرینین نئجه اولدوغو باره‌ده اوخوجولاریمیزا وئره‌جه‌یینیز
معلومات نه اولا بیلر؟
ج: درنه‌یین حؤرمتلی قادینلاریندان ایلک سیرادا
سایین نجیبه رستم اوغلو(سحر خیاو) دان آد آپارا بیله‌ریک. سحر خانیم گؤزل دویغو و
دوشونجه‌سیله هر زامان اوشاقلارین قئیدینه قالیب و جلسه‌لرده گؤزل شعرلر و یازیلاریلا
چوخ زامانلار ایشتیراک ائدیب. اوندان سونرا سایین «پروین قاسمی»ده ها بئله گؤزل
قوشما و گرایلی‌لاری‌لا بیزی همیشه یارارلاندیریب. سایین خاطیره و مهسا عبدالعلیزاده
دن آد آپارماق اولار کی اوشاقلاری بیر یئره توپلاماقدا و نئچه ایللیک چالیشمامیزدا
بو ایکی باجی‌نین زحمتلری چوخ ائتکیلی اولوبدور.
س: درنه‌یین ییغینجاقلاری نه زامانلار و هارادا قورولور؟
ج: دوشنبه‌لر ساعات ۱۶-۱۸ شعر اوتورومو و چهارشنبه‌لر ۱۶-۱۸ اؤیکو کارگاهی. خییوودا اکبرلی خیابانینین سونوندا-اندیشه تالاری-پروفسور محبوبی کیتابخاناسی-بیرینجی طبقه-دیب اوتاق
س: درنه‌یین اداره هئیتی عضولری باره‌ده وئره‌جه‌یینیز معلومات؟
ج: بولاق درنه‌یی رسمی حالتده هله ثبت اولونماییب.
آمما درنک، ایلقار موذن‌زاده نین یؤنتمنلیی ایله ۹۱-جی ایلده مجازی دونیادا یارانیب و جلسه‌لر
ارشاد کیتابخاسیندا قورولوب. اؤیکو کارگاهی ایسه مکتوب درخواستلا موافقت
اولونودوقدان سونرا قورولوب و اوندان سونرا موذن‌زاده و سایین غفور امامیزاده نین یؤنتمنلییی
ایله اؤیکو کارگاهینین ایکینجی و اوچونجو ترمی باشلاییب و هم شعر و هم اؤیکو
کارگاهی بو ایکی نفرین یؤنتمنلییی ایله دولانیر. سونرالار سایین اوستاد «غفور امامیزاده»
نین درنک ده آردیجیل و داواملی حضورو، درنه‌یین گلیشیب و گوجلنمه‌سینده بؤیوک تاثیری
اولدو.
س: درنه‌یین ایندییه قده‌ر ادبی مدنی محصول‌لاری ایستر چاپی و ایسترسه
ده الکترونیکی محصوللار نه اولوبدور؟
ج: یوخاریدا کی سورولاردا دئدییمیز کیمی بورا کیمی
۳۱۱ اثر یاییملانیب و چوخلو تورکیه و دونیا شعر و اؤیکوسوندن چئویریلر
اولوب. البته بو چئویریلرین هامیسینی ایلقار موذن‌زاده ائدیب‌دیر:
بو اساسدا ADNAN
ÖZER آتیلا ایلهان-H.
Hasan BABUR-SALİH POLAT-Həsən Hüseyn Korkmazgil -Yusuf Hayaloğlu-ORHAN VELİ
KANIK-YILMAZ ODABAŞI-عزیز نسین-یاشار کمال-Abdürrahim Karakoç-Arif Nihat Asya- ناظیم
حیکمت-یانیس ریتسوس-ویکتور هوگو-ویلیام شکسپیر و… دن اثرلر چئوریلیب هم درنک ده
اوخونولوب و هم وبلاگ دا یاییملانیب. و اؤیکو ساحه‌سینده ایسه: Kübra Uğurlu-جئیهون موسی‌اوغلو-ادگار آلن پو-Nuriyyə Zeybek و…
آرتیریلمالیدیر درنک اوشاقلارینین بورا کیمی
رادیو و تلوزیون دا و یاریشمالاردا ده‌یرلی چیخیشلاری اولوبدور کی بونلاری آد
آپارماق اولار: سایین ایرج امامی اردبیل رادیوسو و تلوزیونوندا دؤنه‌لرجه گؤزل
شعرلری و بیوگرافیسی یاییملانیب و یاریشمالاردا مقام قازانیب، جواد فانی، مهسا
عبالعلیزاده-خاطیره عبدالعلیزاده- سمیه خانمحمدی-کیوان قربانی-یعقوب رنجبر-مهدی
اصولی-کیانوش توحیدی-عیسی زینی-سمانه حبیبی مقدم-علی بدلی-سپهر خادم مسجد و چئشیدلی
یاریشمالاردا مقامی و اوغورلو چیخیشلاری اولوب.
س: ادبیاتچیلاریمیز سیزین درنک‌له نئجه علاقه ساخلایا بیلرلر؟
ج: بیزیم ایمیل آدرسیمیزwww.Yazarlar@yahoo.com وئبلاگ آدرسیمیز: www.bulaq.arzublog.com و
سایتیمیز: www.bulaq.ir
س: درنه‌یینیزین پلانلاشدیریلمیش ایللیک برنامه‌لری باره‌ده نه دئیه
بیلرسیز؟
ج: نئچه ایلدیر بیر ادبی یاریشما یولا سالماق ایسته‌ییریک،
آمما هزینه باخیمیندان هئچ بیر اسپانسرین اولمادیغینا گؤره بیر ایش گؤره بیلمیریک.
درگی حاققیندا دا مجوز آلماق ایمکانلاری بیرآز چتیندیر. هزینه‌لرین یوخاری اولدوغو
و مادی پرابلئملر اولدوغونا گؤره اعضانین شعر و اؤیکو توپلولارینی دا کیتاب فورمتینده
چاپا گؤندره بیلمیریک.
س: سیزین انجومنین علاقه‌لری باشقا درنک‌لرله نئجه قورولور و هانکی
ساحه‌لرده؟
ج: تاسسوفله بورا کیمی بیزیم باشقا درنک‌لرله ایلگیمیز
اولماییب‌دیر، آمما چوخلو ده‌یرلی قوناقلاریمیز اولوبدور: اوستاد فرهاد ابراهیمی(آیریلیق
شاعیری)-روزبه صمدی- علیرضا الفبایی- کریم چایچی- رامین جهانگیرزاده- سعدالله دنیوی-
آتیلا ایلهان- واله شیری- کریم قربانزاده- آتیلا کیشی‌زاده- سپیده داداشزاده- ائیواز
عالی- رسول آرانلی- تورکمن یازیچیسی یوسف قوجق و …
س: آذربایجان ادبی مدنی درنکلرینین ایش‌بیرلیگی باره‌ده نه تکلیفلرینیز
وار؟
ج: بو ایش‌بیرلیک‌لر چوخ گؤزل اولا بیلر. مثلاً
تبریز، اردبیل، زنجان، اورمو و حتی تهران و باشقا شه‌هرلرین درنکلری ایله ایلگی
قورولوب، کؤرپو یارانیرسا اوشاقلار باشقا گؤزل اینسانلار و گوجلو شاعیر و یازیچیلار
و تنقیدچیلری گؤردوکده داها ائتکیلی اولاجاق، اثرلری و ادبی حایاتلاری گئنیشله‌نیب
و یارادیجیلیقلاری داها گوجلو و داواملی اولاجاق. آمما بو قونودا دا تاسسوفله ماددی
پرابلئملر و واخت دارلیغی ایله اوز به اوز اولوروق.
س: سون سؤزونوز؟
ج: سون سؤز اولاراق بونو دئمک ایسته‌ییرم کی
هنرمندلر و اینجه صنعت خادیملری گئنللیکله گلیشمک اوچون اؤزَن(توجه)، ایلگی و
اکرانا نیازلاری واردیر. شاعیر و یازیچی‌نین اثری یاییملانیب، اوخونولوب و آلقیشلاندیغی
چاغ، بیلیمسل تنقید اولونوب و تقدیر اولدوغو زامان، ائلیه بیله‌جک اؤزونو گلیشدیرسین.
ان آزی بونو دئییم کی درنک اوشاقلارینین اثرلری وئب ده یاییملانان زامان و اثرلره
بئش-آلتی باخیش یازیلاندا سئوینیب روحیه آلیرلار. بیلیرلر کی بونلاری اوخویوب
شعرلرینی باشقا شه‌هرلرده ایزله‌ینلری‌ده وار. تاسسوفله بیز عادت ائله‌مه‌میشیک
وئب ده اوخودوغوموز اثرلر حاقدا حتی بیر بالاجا «ساغول» ایله باخیشیمیزی بیلدیرک.
اولا بیلسین کی بیر شعردن ۵۰۰ سئری گؤروش ائدیلسین ولی تاسسوفله ادبیاتچی‌لار اونودورلار کی باخیشلارینی
بیلدیرسینیلر. باخیش و نظر شاعیر و یازیچی‌دا اولوملو ائتکی یارادیر و ادبی یارادیجیلیغی
گئنیشله‌دیب گلیشدیرمه‌یه ماراغی داها آرتیر. بیر یاندان بیزیم بؤیوک ادبی یاریشمالارا
چوخ احتیاجیمیز واردیر. ادبیاتی گلیشدیریب بؤیوک اثرلر یاراتماغا میدان تؤرتمکده
بؤیوک یاریشمالارین یوخاری ائتکیسی واردیر. یاریشما اولورسا و ده‌یرلی اؤدوللر وئریلیرسه
ماراق‌دا آرتاجاق و ادبی اؤرونوم ده یوخاری گئده‌جک. بونون یانیندا اثرلرین کیتاب
فورمتینده یاییملانماسی و حرفه‌ای تنقید جلسهلرینین قورولماسی‌دیر. بیزیم هر نه
دن چوخ ادبیاتیمیزدا آخساقلیغیمیزحرفه‌ای منتقدین چوخ-چوخ آز اولماسی‌دیر. تنقیدسیز
بیر ادبیات یؤنتمنسیز بیر فیلم و رهبرسیز بیر ارکستر کیمی دیر. هره اؤز هاواسینی
چالیب اؤز تصویری و حرکتینی هئچ بیر دوزَن و چرچیوه ده یئرلشدیرمه دن اکرانا قویاجاق.
رهبرسیز بیر ارکسترین چوخ ایرگنج و قولاغی اینجیدن بیر سسی اولا بیلر. یؤنتمنسیز بیر
فیلمین ده ها بئله چوخ یوروجو سارسیدیجی گئدیشی اولا بیلر. دوز منتقد بونلارا
دوزن، چرچیوه و پرینسیپ وئریر. بئله گئدیرسه هئچ زامان گلیشه بیلمه‌یه‌جه‌ییک. ایندی
مجازی دونیادا او قدر گوجسوز اثرلر یاییلیر کی آدام تاسسوف یئییر. ها بئله او قدر
گوجسوز کیتابلار! بونلاری آراشدیرماق لازیم. بو دا او زامان اولا بیله‌جک کی گوجلو
تنقیدچی و حرفه‌ای اوخوجولاریمیز اولسون. آمما هله یوخدور. بونا گؤره یوخدور کی
آراشدیرماچی و تنقیدچیلریمیز ده او بیری اینسانلار کیمی ماددی و اجتماعی احتیاجلارینی
تامین ائتمکده‌دیرلر و ائلیه بیلمیرلر واخت قویالار. بو قونویا دا حرفه‌ای یاناشمیریق‌سا
ائله بو دوروم داوام ائده‌جک. حرفه‌ای یاناشماق بئله اولور کی گئنللیکله اثرلر نشریه‌لرده
چاپ اولدوقدان سونرا تنقیدی مقاله‌لره تالیف حققی وئریلن زامان، تنقیدچی ده یاراناجاق
و ادبیات دا ایره‌لی‌له‌یه‌جک. دئمک تنقید و آراشدیرمانین هزینه‌سی اؤده‌نیلسه یقین
کی آراشدیرماچی و تنقیدچی ده آرتیب، ادبیاتیمیزدا گلیشه جک… دانیشیغین سونو
