لطفا چند لحضه صبر کنید
این انجمن در ستاد ساماندهی پایگاه های اینترنتی وزارت فرهنگ و ارشاد اسلامی ثبت شده است...

چئویرن: اولکو تامئر
کؤچورن: بولاق

قوزغون

اورتاسیندا بیر گئجه‌نین، دوشونرکن یورغون، الده‌ن دوشموش
او عجاییب کیتابلاری، گون کئچدیکجه اونودولان،
هاراداسا مورگوله‌یرکن، بیر تیققیلتی گلدی بیردن،
اوتانجاق بیری‌دی سانکی یاواشجا قاپینی دؤیه‌ن؛
"بیر قوناق‌دیر" دئدیم، "اوتاق قاپیسینی دؤیه‌ن،
باشقا کیم گلیر بو زامان؟"

آه، خاطیرلاییرام ایندی، بیر دئکابر گئجه‌سی ایدی
هؤروردو دؤشه‌مه‌یه خیالینی کول و دومان،
ایشیلداسین ایسته‌دیم شفق چاره‌سینی آختاراراق
منه قالان او آغری‌نین ایتیب گئتمیش «لئنورئ»‌دن،
ملکلرین چاغیردیغی بنزرسیز، سئویم‌لی «لئنورئ»‌دن ،
آدی آرتیق خاطیرلانمایان.

ایپک‌لی، قرارسیز، قم‌لی خیشیلتی‌سی بنؤوشه‌یی پرده‌نین
قورخولارا سالدی منی، داها اؤنجه ائشیدیلمه‌ین؛
یاتیشسین دئیه اوره‌ییم آیاغا قالخاراق دئدیم:
"بیر قوناق‌دیر موطلق یاواشجا قاپینی دؤیه‌ن،
گئجیکمیش بیر قوناق یاواشجا قاپینی دؤیه‌ن؛
باشقا کیم اولار بو زامان؟"

قان گلدی اوزومه بیردن داها چوخ چکینمه‌دن
"عذر ایسته‌ییرم" دئدیم، "کیمسه‌نیز، بَی یا دا قادین
دالمیش، رویادایدیم سانکی، ائله یاواش ووردونوز کی،
ائله یاواش اوغورلادینیز کی قالدیم آنلامادان."
تک قارانلیغی گؤردوم اوزانیب دا آنلامادان
قاپینی آچدیغیم زامان.

گؤزلریمی قارانلیغا تیکیب باشلادیم باخماغا،
قاریشیقلیق و قورخو یوکلو یوخولار کئچدی عقلیمدن؛
سس‌سیزلیک دورغون ایدی اما، ترپه‌نمه یوخ ایدی هاوادا،
پیچیلتیلا بیر سؤز، "لئنورئ" گلدی اوزاقلاردان،
سونرا یانسی‌دی پیچیلتیم، گئری دؤندو اوزاقلاردان؛
تک بو سؤزایدی ائشیدیلن.

ائشیتدیم ووروشو یئنی‌دن، داها سورعتلی اَسکی‌سیندن،
ایچیمده یانان روحوملا اوتاغیما دؤندویوم زامان.
دیکسینیب دئدیم: "شوبهه‌سیز پئنجره‌ده بیر شئی اولاجاق؛
گئدیب باخمالی بیر دفعه، ندیر سورعتلی سورعتلی ووران؛
یاتیشسین‌دا بو اورییم آنلاییم ندیر ووران؛
باشقاسی دئییل کولکدن…"

چیرپیناراق گیردی بیردن او اَسکی مقدس گونلردن
بو گونه قالمیش بیر قوزغون پئنجره‌نی آچدیغیم زامان.
منه آلدیرمادی بئله، چوخ اینجه بیر حرکتله
سوزولدو قاپیا دوغرو سورعتله اوچاراق یانیمدان،
قوندو پالازین اوستونه سورعتله کئچه‌رک یانیمدان،
قالدی اورادا اوینامادان.

غورورلو، سَرت هاواسینا قارا قوشون آلیشینجا
هئچ بیر علامت قالمادی او قملی قاریشیقلیغیمدان؛
"هرچند یولونموش تاجین" دئدیم، "اما قورخمورسان
گلمکدن، قوجامیش قوزغون، گئجه‌لرین ساحیلیندن؛
سؤیله، نئجه چاغیرارلار سنی اؤلوم ساحیلیندن؟"
دئدی قوزغون: "هئچ بیر زامان."

سؤزومو آنلاماسینا بو قوشون چاشدیم آمما
هئچ بیر شئی چیخارا بیلمه‌دیم منه وئردییی جاوابدان،
ماراق‌سیز بیر جاواب سانکی؛ بونو قبول ائتمه‌لی کی
قاپی‌سیندا بئله بیر قوش آسان آسان گؤرمز اینسان،
بئله هیکلین اوستونده آسان آسان گؤرمز اینسان؛
آدی "هئچ بیر زامان" اولان.

دورغون مجسمه‌ده اوتورارکن ایچینی تؤکموشدو بیردن
او سؤزلری دئییل، آبنوس قانادلی حیوان.
سؤزو بو قدرله قالدی، یئریندن ترپنمه‌دی،
سوسدو، سونرا من دانیشدیم: "دوستلاریم قاچدی یانیمدان
اومیدلریم کیمی صاباح سن‌ده قاچارسان یانیمدان."
دئدی قوزغون: "هئچ بیر زامان."

بیردن-بیره دیکسینیب ده او پوزولان سسسیزلیک‌ده
"آیدین اولور کی" دئدیم، "بو سؤزلر عقلینده قالان؛
اینصاف بیلمز فلاکتین قوودوغو صاحیبین
سنه بونلاری بوراخمیش، تکرارلاییرسان دایانمادان.
اومیدلرینه یاندیریلمیش بیر آغی کیمی دایانمادان:
هئچ -اما هئچ- هئچ بیر زامان."

چکیب گئتدی منی او گون یاسلی ائد‌ن قریبه حوزن؛
بیر اوتوراجاق چکدیم قاپا، قارشیمدا ایدی آرتیق حیوان،
سونرا گؤمولدوم دؤشه‌یه، سونرا دالدیم خیاللارا،
سونرا قوزغونو دوشوندوم، کئچمیش عصرلردن قالان
نه دئمک ایسته‌دیینی بئله قولاغیمدا قالان.
چاتلاق چاتلاق: "هئچ بیر زامان."

اوتوروب دوشوندوم ائله، سؤیله‌مه‌دن، تک سؤز بئله
قیزدیرمالی گؤزلری ایندی سینه‌مین ایچینی یاخان
دایانیب او قوزغونا باخدیم، دؤشه‌یه گؤمولدو باشیم،
مخمر قابلی دؤشه‌یه، اوزه‌رینه ایشیق ووران،
اللری «لئنورئ»نین آرتیق بنؤوشه‌یی دؤشه‌یه، ایشیق ووران،
دَیمه‌یه‌جک هئچ بیر زامان!

سانکی آغیرلاشدی هاوا، زینگیلده‌ین آددیملاریلا
ملک کئچدی، اللرینده گؤرونمه‌ین بیر بوخوردان.
"آخماق،" دئدیم، "دؤن حیاتا؛ تانرین سنه آجیمیش دا
ملکلرینی گؤندرمیش خیلاص اول دئیه او آنی‌دان؛
ایچ بو ایکسیری ده اونوت، خلاص اول آرتیق او آنی‌دان."
دئدی قوزغون: "هئچ بیر زامان."

"گلدین بیر دفعه نئجه‌سه، جهنملردن‌می یوخسا؟
ائی مقدس وارلیق" دئدیم، "اوغورسوز قوش یا دا شیطان!
بو قوراق اؤلکه‌ده تک‌سن، یئنه ده چیخیر سسین،
قورخولارین خورتلادیغی ائویمده، نه اولور آنلاتسان
آغریلاریمین درمانی اورالاردامی، آنلاتسان…"
دئدی قوزغون: "هئچ بیر زامان."

"بو یوخاری‌دا دؤنه‌ن گؤیله تانرینی سئوسن سؤیله؛
ائی مقدس وارلیق" دئدیم، "اوغورسوز قوش یا دا شیطان!
آزالت بیر آز کدری‌می، سؤیله روحوم جننت‌ده‌می
گؤروشه‌جک او لئنورئ‌له، آدی ملکلر طرفیندن قونان،
او سئویملی، بنزرسیز قیزلا، آدی ملکلر طرفیندن قونان؟"
دئدی قوزغون: "هئچ بیر زامان."

قالخیب قیشقیردیم: "گتیرسین آیریلیشی بو سؤزلرین!
کولکلره دؤن یئنی‌دن، اؤلوم ساحیلینه اوزان!
خاطیره بوراخما ساقین، بیر توکون بئله قالماسین!
داغیتما تک‌لییی‌می! بوراخ منی، گئت قاپیمدان!
اوره‌ییمدن چک دیمدییی، چیخار آرتیق، گئت قاپیمدان!"
دئدی قوزغون: "هئچ بیر زامان."

اوتاق قاپیمین اوستونده، پالازین سولغون مجسمه‌سینده
اوتورماقدا، اوتورماقدا قوزغون هئچ ترپنمه‌دن؛
خیال قوران بیر ایبلیسین گؤزلریله درین درین
باخارکن عکس اولونور توند کؤلگه‌سی او تاختالاردان،
او کؤلگه‌ده اوزَ‌ن روحوم خیلاص اولوب دا تاختالاردان
قالخمایاجاق - هئچ بیر زامان!

+0 به‌ین

گؤنده ريليب تاريخ شنبه 8 تیر 1398يازار بولاق
|
اثرلريزي بو سایت‌دا ياييملاماق ايسترسه‌نيز، يازديغيميز ايمئيل طريقيله بيزيم‌له ايلگي قورون. اثريزي يوللاياندا شکيليزي‌ اونوتمايين
قالب وبلاگ