لطفا چند لحضه صبر کنید
این انجمن در ستاد ساماندهی پایگاه های اینترنتی وزارت فرهنگ و ارشاد اسلامی ثبت شده است...


جاهید سیتکی تارانجی کیمدیر؟ قیساجا حیاتی و اَن گؤزل شعری

یازان: خدیجه بیچه‌ر
کؤچورن: ایلقار موذن‌زاده

دیاربکر دوغوملوسو اولان «جاهید سیتقی تارانجی» رئسپوبلیکا دؤورونون اَن باشاریلی شاعیرلریندن بیری‌دیر. ۱۹۱۰-جو ایلده دوغان شاعیر، ۱۹۵۶-جی ایلده معالجه گؤرمک اوچون گئتدیی «ویانا»دا حیاتا گؤزلرینی یومدو. ایلک‌اوخولو دیاربکرده اوخودوقدان سونرا، اورتا مکتب و لیسه‌ اوچون ایستانبولا گئتدی. قالاتاسارای لیسه‌یینده اوخویارکن، ایلک شعرلری «ثروتی فنون» ژورنالیندا نشر اولونماغا باشلادی. آردیندان یوکسک تیجارت مکتبینی بیتیره‌رک، سومئربانکدا ایشه باشلادی. بیر موددت سونرا بو ایشیندن آیریلاراق اونیوئرسیته‌ده اوخوماق اوچون پاریسه گئتدی. آنجاق ایکینجی دونیا دؤیوشو اَسناسیندا، پاریس بومبالانینجا اؤلکه‌سینه گئری دؤنمک مجبوریتینده قالدی. بو سیرادا «اوتوز بئش یاش»، «هایدی عابباس»، «دوشدَن گؤزل» کیمی شعرلرینی قله‌مه آلدی. بیر دؤور پاریس‌ده تحصیل آلماسی و اورتا مکتبده فرانسیز مکتبلرینده اوخوماسی سببیله، شعرلرینده فرانسیز اوسلوبوندان تأثیرلَندی. شاعیرین اَن مشهور شعری ایسه، ۱۹۴۶-جی ایلده یازدیغی اوتوز بئش یاش شعری‌دیر.

 

اوتوز بئش یاش

یاش اوتوز بئش! یولون یاریسی ائدر.

دانته کیمی اورتاسینداییق عؤمرون.

جاوان چاغیمیزداکی جؤوهر،

یالوارماق، یالوارماق فایداسیز بو گون،

گؤزونون یاشینا باخمادان گئدر.

 

شقیقه‌لریمیزه قار یاغدی نه وار؟

منیم‌می آللاهیم بو چیزگی‌لی اوز؟

یا گؤزلر قیزیلداکی مور حالقالار؟

نه‌دن بئله دوشمن گؤرونرسینیز؛

ایللر ائلی دوست بیلدیییم آینالار؟

 

زامانلا نئجه ده‌ییشیر اینسان!

هانسی شکیلیمه باخسام من دئییله‌م:

هاردا او گونلر، او شؤوق، او هیجان؟

بو گولر اوزلو آدام من دئییله‌م

یالاندیر قایغی‌سیز اولدوغوم یالان.

 

خیال مئیال شئی‌لردن ایلک عشقیمیز؛

خاطیره‌سی بئله یابانجی گلیر.

حیاتا بیرلیکده باشلادیغیمیز

دوستلارلا دا یوللار آیریلدی بیر-بیر؛

گئتدیکجه آرتیر تکلیییمیز.

 

گؤی‌اوزونون باشقا رنگی‌ده وارمیش!

گئج فرقینه واردیم داشین سرت اولدوغونو.

سو اینسانی بوغار، آتش یاخارمیش!

هر دوغان گونون بیر درد اولدوغونو،

اینسان بو یاشا گلینجه آنلارمیش.

 

هئیوا ساری نار قیرمیزی پاییق!

هر ائل بیر آز داها منیمسه‌دیییم.

نه دؤنوب دایانیر هاوادا قوشلار؟

هاردان چیخدی بو جنازه؟ اؤلَن کیم؟

بو نئچه‌نجی باغچا گؤردوم تاریمار.

 

نئیلرسَن اؤلوم هر کسین باشیندا.

یاتدین اویانا بیلمه‌دین اولاجاق

کیم بیلر هاردا، نئجه، نجور یاشیندا؟

بیر نامازلیق سلطنتین اولاجاق.

تاخت کیمی او موصللا داشیندا.

 

یاشلانماق هر کسین قورخدوغو، داها دوغروسو گئجیکدیرمک اوچون الیندن گلنی ائتدییی بیر وضعیت‌دیر. شاعیر بو شعرده اینسانلارین بو قورخولارینا توخونور. آنجاق ماراقلی اولان، قورخولان دویغولارین آنلاتیلدیغی بیر شعر، عینی زاماندا اینسانین ایچینی ایستیله‌دیر. یاشی اوتوزو کئچمیش هر کسین، بو شعری اوخویارکَن کدرلندییندن، خاطیره‌لرینی یاد ائتدییندن و اؤزونده‌کی ده‌ییشمه‌لری موشاهیده ائتدییندن اَمینم. «جاهید سیتقی تارانجی» دئییلینجه آغلا ایلک گلن شعر اولان، اوتوز بئش یاش سطرلری، زامانی دایاندیرمانین ایمکانسیز اولدوغونو، رئاللاشماسینی اؤنله‌یه بیلمه‌یه‌جه‌ییمیز یاشلیلیغین شقیقه‌لریمیزده یارانان آغلارلا خبر وئردییینی آنلاتان بیر شاهکاردیر. 

+0 به‌ین

گؤنده ريليب تاريخ شنبه 25 خرداد 1398يازار بولاق
|
اثرلريزي بو سایت‌دا ياييملاماق ايسترسه‌نيز، يازديغيميز ايمئيل طريقيله بيزيم‌له ايلگي قورون. اثريزي يوللاياندا شکيليزي‌ اونوتمايين
قالب وبلاگ