لطفا چند لحضه صبر کنید
این انجمن در ستاد ساماندهی پایگاه های اینترنتی وزارت فرهنگ و ارشاد اسلامی ثبت شده است...
یازان: خدیجه بیچه‌ر
کؤچورن: ایلقار موذن‌زاده

جامال ثریا کیم‌دیر؟ قیساجا حیاتی و اَن گؤزل شعری

۱۹۳۱، «تونجه‌لی» دوغوملو اولان جامال ثریا اصل آدی، «جمال‌الدین سئبئر» دیر. دوغولدوغو یئر اولان «پولومور» او دؤورده «ائرزینجان»ا باغلی ایدی. اوشاق‌لیق ایللرینی بوردا کئچیرَ‌ن شاعیر، دئرسیم عصیانیندان سونرا عائیله‌سیله بیرلیکده «بیله‌جیک»ه سورگون ائدیلدی. آتاسیندان خبرسیز گیردییی پولسوز پانسیون مکتب ایمتاحانینی قازانینجا، «حیدرپاشا» لیسه‌یینده اوخودو. یوکسک تحصیلینی آنکارا یونیوئرسیته‌سینده سیاسی معلوماتلار فاکولته‌سینده، مالییه و اقتصاد اوزَرینه گؤردو. ایکینجی یئنی آخینینی منیمسه‌ین جامال ثریا، شاعیرلییی‌نین یانیندا؛ مالییه موفتتیشلیگی، ضربخانا مودیرلیگی، اورتا شرق اقتصاد بانکی ایداره هئیتی عوضولویو و تورک دیل تشکیلاتی عوضولویو کیمی وظیفه‌لرده اولدو. یئنه بونلاردان باشقا بیر چوخ نشریاتدا دانیشمانلیق و ترجومه‌چی‌لیک ائتدی.

تورک شعری‌نین تمل داشلاریندان بیری اولان جامال ثریانین حیاتی ائله اوچ بئش سطرله آنلاتیلاجاق کیمی دئییل. هله اوشاقلیغینی یاشایا بیلمه‌دن دئرسیم سورگونونه معروض قالدی، آنکارادا اوخودوغو ایللرده کوردلویونون دؤیوشونو وئردی. ایلک شعری اولان شارکیسی بایاز، ۱۹۵۳-جو ایلده مولکییه ژورنالیندا نشر اولوندو. لاپ تانینان اثرلری آراسیندا؛ «اووئرجینکا»، «اوزاقدان سئویرم سنی»، «کؤچَری»، «سئودا سؤزلری»، «ایستی نال» و «منی اؤپ سونرا دوغور منی» آدلی شعر کیتابلاری ایشتیراک ائدیر. ۱۹۹۰-جی ایلده حیاتا ویداع ائد‌ن جامال ثریا، بونلاردان باشقا دونیا کلاسیکلری کیتابلاری آراسیندا ایشتیراک ائد‌ن «وادی‌ده‌کی زانباق کیمی» اهمیتلی اثرلرین‌ده ترجومه‌لرینی ائتمیش‌دیر. شاعیرین اَن مشهور شعرلریندن بیری اولان «اوزاق‌دان سئویرم سنی» آدلی شعرینی سیزلرله پایلاشمادان کئچمه‌یک.

اوزاقدان سئویرم سنی
قوخونو آلا بیلمه‌دن،
بویونا ساریلا بیلمه‌دن
اوزونه توخونا بیلمه‌دن
یالنیز سئویرم
ائله اوزاقدان سئویرم سنی
الینی توتمادان
اوره‌یینه توخونمادان
گؤزلرینده دالیب دالیب گئتمه‌دن
بو اوچ گونلوک سئودالارا عیناد
آواراجا دئییل آدام کیمی سئویرم
ائله اوزاقدان سئویرم سنی
یاناقلارینا سیزان ایکی داملا یاشینی سیلمه‌دن
اَن دلی قهقهه‌لرینه اورتاق اولمادان
اَن سئودییین ماهنینی بیرلیکده زیمزیمه ائتمه‌دن
ائله اوزاقدان سئویرم سنی
قیرمادان
تؤکمه‌دن
پارچالامادان
اوزمه‌دن
آغلاتمادان اوزاقدان سئویرم
ائله اوزاقدان سئویرم سنی؛
سنه سؤیله‌مک ایسته‌دیییم هر سؤزو
دیلیمده پارچالایاراق سئویرم
داملا داملا تؤکولرکن سؤزلریم
گوناه‌سیز آغ بیر کاغیذدا سئویرم
یازدیغی سئودا سؤزلریله یادداشلاریمیزا قازیلان جامال ثریا’نین اَن چوخ اوخونان شعرلریندن بیری‌دیر بو. شاعیرین عشقده نه جور فداکار، صبیرلی و سئوگی‌سی‌نین سونسوز اولدوغونو گؤسترَ‌ن سطیرلر ائهتیوا ائدیر شعر. بو شعری هانسی قادین اوچون یازدی بیلینمیر آمما، اینسانین بئله صاف و قوسورسوز بیر عشق ایله سئویله‌سی گلیر.

+0 به‌ین

گؤنده ريليب تاريخ جمعه 13 اردیبهشت 1398يازار بولاق
|
اثرلريزي بو سایت‌دا ياييملاماق ايسترسه‌نيز، يازديغيميز ايمئيل طريقيله بيزيم‌له ايلگي قورون. اثريزي يوللاياندا شکيليزي‌ اونوتمايين
قالب وبلاگ