Welcome in BULAQ
Bulaq_derneyi@
باغلانتي‌لار
اثرلر
| رديف | يازار | اثر |
|---|---|---|
تبليغ‌لر
غفور امامی‌زاده خیاوی
سعید موغانلی نه یول‌لارلا ائدیتورلوقدان باش یازارلیغا چاتدی؟
سایین سعید موغانلی تزه‌لیکده گئجه یاشامی ایله موصاحیبه‌سینده یاشماق درگیسی‌نین بوراخیلیشی ایله ایلگیلی بیر سوالی بئله جوابلاییر:
"یاشماق ۱۳۸۵/۲/۲۸ ده، بیرینجی نومره‌سینی نشر ائدیب‌دیر. یاشماغی نشر ائتمکده بیر چوخ دوست‌لارین امه‌یی اولوب، آمما اصلینده عزیز دوستوموز آتیلا کیشی‌زاده و سایین خانم سیما دیدار باشدا اولماقلا یاشماق ایشینی باشلاییب و بیر نئچه باشقا دوست‌لار، بلکه آدلارینی یادیمدان چیخاردام، او زامان بیرینجی شوماره‌سینی چیخارتدیق، اوچ شوماره‌سی نشر اولدو، سونرا بیر سیرا ندن‌لره گؤره درگی دایاندی و ۱۳۸۶ من شخصا یاشماق سیرا کیتاب‌لارینی نشر ائله‌مه‌یه باشلادیم و..."
بو سؤز نه قده‌ر دوغرودور؟
او زامانلار سایین ائیواز طاها سعید موغانلینی تزه یارپاق نشریه‌سیندن قیراغا قویموشدو؛ عیللت‌لریندن بیری، سعید موغانلی‌نین باکی‌دا ائتدیی بیر موصاحیبه‌سینده، یارپاغی اؤزونون چیخاردیغی بیر نشریه‌سی کیمی تانیتماسی ایدی؛ البته بونون آیری عیللت‌لری ده اولابیلیردی. هر نه ایسه سایین ائیواز طاهانین جوابی قاطع ایدی، سعید موغانلی مجازی فضادا کتبی اولاراق بو ایشی‌نین یانلیش اولدوغونا اعتراف ائله‌مکدن و عوذر ایسته‌مکدن باشقا بیر یولو یوخ ایدی.
بو بیری باشدا، یاشماق درگیسی‌نین بینوره‌سی قویولموشدو، ایلک ساییسینین ایش‌لری سورعتله قاباغا گئتمکده ایدی. سایین کاظیم سعادت ایجرایی مودوروموز ایدی، خانم سیما دیدار دا سوروملو مودور، من و آتیلا کیشی‌زاده ده ایکی نفرلیک باش‌یازار هیئتی ایدیک. نشریه‌نین هدف آلدیغی ایلک شئی، بیلیمسل تنقید و دونیا مقیاسیندا مودئرن ادبیاتی ایلک دؤنه اولاراق بوتای آذربایجان ادبیاتینا آشیلاماق ایدی. مطلب‌لر حاضیرلانیردی و ایش‌لر دورمادان قاباغا گئتمکده ایدی.
سایین سعید موغانلینی نشریه‌یه گتیرمک منیم فیکریم ایدی، بیلیردیم بیر چوخ شهرده گوجلو ارتباط‌لاری وار، کیتابچی‌لارین چوخو ایله تانیش ایدی و مجلله‌نین ساتیشی و یاییملانماسیندا یاخجی یاردیمی کئچه‌بیلردی. البته بیر سیرا ندن‌لره گؤره نشریه‌ده یالنیز "ائدیتور" اولاراق چالیشماسینی صلاح گؤردوم، (بونون مدرکینی آشاغیدا بیرینجی تصویرده گتیرمیشم). یارپاق نشریه‌سیندن قیراغا قویولان سعید بی‌یین تزه بیر یئر آختاردیغینی بیلدیییمدن دولایی، بو اؤنرینی قبول ائده‌جه‌ییندن تقریبن مطمئن ایدیم، ولی یاشماغی دا یارپاق کیمی هر یئرده اؤزونون چیخاردیغی بیر نشریه کیمی تانیتماسیندان، بیزیم اؤزوموزه ده آیری نقشه‌لر تؤکدویوندن هئچ زاد بیلمیردیم.
درگی‌نین ایلک ساییسی، بوتای آذربایجاندا ایملایی قلطی اولمایان ایلک درگی کیمی دامغاسینی ادبیاتیمیزا ووردو، سایین مهیار علیزاده‌نین ده قرافیک ایش‌لری درگی‌یه یئنی بیر روح باغیشلامیشدی. اوخوجولارین استقبالی اینانیلماز ایدی، آیلارجا گئجه گوندوز ایشله‌مه‌ییمیز جواب وئرمیشدی، بوتون ادبی محفل‌لرده بیزیم درگی‌نین سؤزو گئدیردی، مشهور شخصیت‌لر و او زامانین تانینمیش ادبیاتچی‌لاری هر یئرده بیزیم درگی‌دن دانیشیردیلار، و بیزلری، ایل‌لر بویو اؤزلرینین بو یولدا چکدیکلری زحمت‌لر و قویدوقلاری امک‌لرینین بار وئریب بویا باشا چاتماسی‌نین اؤرنه‌یی کیمی حسابا گتیریردیلر. افتخار ائله‌ییردیک، ولی گئت گئده سوروملولوق‌لاریمیز دا آغیرلاشیردی، بونلارین یانی‌سیرا، درگی ده ایشله‌مه‌ییمیز گونو گوندن چتین‌لشیردی.
ایکینجی سایی‌نین بوراخیلیشینا یاخینلاشدیقجا اینانیلماز موشکول‌لر قاباغا گلدی، فضا ده‌ییشیلمیشدی، انتظارلار بیزدن چوخالمیشدی، سایین موغانلی آرتیق ائدیتور اولاراق ایشله‌مه‌یه راضی دئییلدی، بونو دیلینه گتیرمه‌سه‌یدی ده عمل‌لرینده آچیق آیدین شکیلده گؤرسه‌دیردی. نشریه‌نین ارتباطی ایش‌لرینده چوخ زحمت چکمیشدی، درگی‌یه اولان مالی یاردیم‌لاری او ییغیردی، موخاطب‌لریمیزله دانیشیب ارتباط قورانیمیز او ایدی، ایمیل‌لره ده او جواب وئریردی؛ البته کی اونون ایسته‌یینی قولاق آردینا وورابیلمزدیک. یئنی بیر قرارا گلدیک؛ نشریه‌نین باش‌یازاری، یازیچی‌لار هیئتی‌نین صدری و ائدیتورونو گؤتوروب اوچونو بیر عونوان آلتیندا گتیردیک: یازیچی‌لار هئیتی.(بونون مدرکینی آشاغیدا ایکینجی تصویرده گتیرمیشم.) بئله ده هامیمیز ببر سویه‌ده اولوردوق. سایین موغانلی‌یا دا بیزیم بو ایش‌ده آد سان دالیسیندا اولمادیغیمیز گئرچه‌یینی ثابیت ائتمیش اولوردوق.
نه یازیق کی مساله بونلارلا حل اولان دئییلدی، موشکول‌لرین آیری کؤک‌لری وار ایدی. درگی‌نین ایکینجی ساییسینین بوراخیلیشینا آز قالان، بیر سیرا موشکول‌لر قاباغا گلدی، اختلافیمیز ظاهرا مقاله‌لرین دیلی و مطلب‌لرین انتخابیندا ایدی ولی کؤکو آیری یئردن قایناقلانیردی، بونو بیراز بئواخت باشا دوشدوک..
ایکینجی سایی‌نین سون گونلرینده آیری اتفاق‌لار دوشدو، گئجه یاریسی دفتری ترک ائدیب چؤله چیخدیم. او گئجه درگی‌ده بیرگه ایشله‌دیییمیز سون گئجه‌میز اولاجاقدی. ایکی هفته سونرا درگی‌نین ایکینجی سایی‌سینی آیاق‌لاریمین آلتینا آتیب سعید موغانلی‌یا بئله دئیه‌جکدیم: "منیم اوچون اخلاقیات و دوستلوق درگی چیخارماقدان اؤنملی‌دیر، ولی سنین اوچون شؤهرت قازانماق هر شئی‌دیر." اولای‌لار چوخ سورعتله اوز وئردی، هر شئی اینانیلماز ساده‌لیکله سونونا یاخینلاشماقدا ایدی، آرتیق سعید موغانلی‌دان تمامن فرقلی بیر شخصیت گؤزومون اؤنونده سرگیله‌نمکده ایدی.
بو قالماقال‌دا، بیر مقاله یازیب دا هر شئیی آچیقلاماق قرارینا گلدیم، آنجاق سایین کاظیم سعادت قاباغیمی آلدی، "هر شئیی زامان حل ائده‌جکدیر" دئدی، "بیز صبر ائله‌مه‌یی اؤیره‌نمه‌لی‌ییک."
سؤزونو قبول ائله‌دیم، سوسدوم، ولی بو سوسماق آغیر باشا گلدی، یاشماق درگیسینده منه اولان خیانت‌لر اونودولاسی دئییلدی، منی یئترینجه هر شئیه قارامسار ائله‌دی. ۸ ایل سوسدوم، ادبیاتچی دوست‌لارلا گل‌گئدیمی کسدیم، اینترنت دونیاسیندان دا قیراغا چکیلدیم، هئچ یئرده مطلب یاییملامادیم(چیراق درگیسی استثنا اولماقلا، البته اوندان دا چوخ تئز پئشمان اولدوم)، سکگیز ایلدن سونرا بعضی یاخین دوست‌لارین تشویقی ایله حیکایه‌لریمین بیر نئچه‌سینی کاشغرلی محمود حیکایه یاریشماسینا گؤندردیم و گتیردیییم مقام‌لا یئنی‌دن دالدا بوجاقدا گؤردویوم ایش‌لریمه ایجتماعی جهت‌‌لر وئرمه‌یه چالیشدیم؛ آنجاق سکگیز ایل، بیر نشریه‌نین مادی و معنوی امتیازینی اوغورلاییب منیمسه‌مک اوچون یئترلی بیر زامان ایدی سایین موغانلی اوچون.
یاشماق منیم اومود اوجاغیم ایدی، ایکی ایل گئجه گوندوزوم بو نشریه‌نین اوستونده کئچدی، ایشله‌ییب قازاندیغیم مادی گلیریم، واختیم، گوجوم، انرژیم، ساوادیم، حیثیتیم بو نشریه‌یه صرف اولدو، آنجاق آیری آدام گلیب بونا صاحیب چیخدی.
او گون سایین کاظیم سعادتین توصیه‌سی ایله سوسوب ایچیمده بوغدوغوم سؤزلری ۱۲ ایل سونرا بو گون آچیقلاماق مجبوریتینده گؤردوم اؤزومو.
سؤزومون سونوندا بو اؤنملی نوکته‌یه ایشاره ائتمک ایستردیم: یاشماغین تکجه ایکی ساییسی چیخیب؛ اوچونجو ساییسی یاشماقدان حسابلانمیر. بو سایی، سعید موغانلی هامی‌دان گیزلین اؤزونه بیر اکیب یاراتدیغی و قلط‌لرله دولو بیر سایی‌دا اؤز آدینی باش یازار اولاراق ایلک صفحه‌سینده گتیردییی غیرقانونی ایش‌لرینین نتیجه‌سی ایدی.(بونون مدرکی اوچونجو تصویرده گتیریلیب) بیراز دیقت ائدیلدییینده بو سایی، مطلب‌لرینین دوشوک سویه‌سی، ضعیف دیلی و اونلارجا ایملایی قلط‌لری ایله اوبیری سایی‌لاریندان سئچیله‌بیلیر.
سعید موغانلی سونوندا هدفینه چاتمیشدی؛ هر یئرده باشینی یوخاری قووزاییب افتخارلا "یاشماغی من چیخارتدیم" دئییردی؛ صمد بهرنگی‌نین بؤرکونو قویوب اوزو دولوسو گولومسه‌مه ایله دوربینین لئنزینه باخیردی. آرتیق یاشماق درگیسی سونا چاتمیشدی و سعید موغانلی بیر سیرا یاخین دوستونا کلمه‌نین تام آنلامیندا "خیانت" ائله‌میشدی...
بو مقاله‌نین ایکینجی و اوچونجو بؤلوم‌لری ده واردیر، لازیم گؤرونسه، او بؤلوم‌لر ده واختی ایله یاییملاناجاق.
✍ غفور امامی‌زاده خیاوی
سندلر:
یاشماغین ایلک شوماره‌سی‌نین عنوان صفحه‌سی.
سعید موغانلی گؤروندویو کیمی درگی‌ده ساده‌جه ائدیتوردور.
درگینی چیخاردیغینی ایددیعا ائدن بیریسی، نجور اولار همن درگی‌ده ائدیتورلوقدان یوخاری بیر مرتبه‌سی اولماز؟ بو آغلا سیغیشان بیر شئی دیرمی؟
یاشماغین غیرقانونی اولاراق چیخان اوچونجو ساییسینین عنوان صفحه‌سی.
یاشماغین ایکینجی ساییسینین عنوان صفحه‌سی.
مقاله‌ده توضیح وئردیییم کیمی سعید موغانلی بو شوماره‌ده غفور امامی زاده و آتیلا کیشی‌زاده ایله بیرلیکده درگی‌نین باش یازاری موقعیتینه یوکسه‌لیب و موخاطب‌لرله ارتباط قورما قونوسوندا گؤرسه‌تدییی قابلیت‌لرینه گؤره آدی ائدیتورلوقدان سیلینیب.
بو صفحه‌دن ایکی شئی باشا دوشولور:
بیر: سعید موغانلی یاشماغی چیخاردان اوچ اصلی آدامین (غفور امامی‌زاده خیاوی، آتیلا کیشی‌زاده و کاظیم سعادتی) و اونلارین امکداش‌لارینین آدینی تمامن درگی‌دن سیلیب و تکجه اؤزونون آدینی باش یازار اولاراق یازیب.
ایکی: سعید موغانلی یئنی بیر تیم گتیریب ایش اوستونه. بو یئنیجه امکداشلیغا دعوت اولموش آدام‌لارین، یاشماغین قاباق شوماره‌لرینین نجور و کیم‌لرین الی ایله چیخاریلدیغی قونوسوندا اولان بیلگی‌لری، تماما سعیددن آلینمیشدیر؛ اونلار قضیه‌دن هئچ خبرلری یوخدور. حتی بیلمیرلر کی سعید موغانلی اونلاردان بیر گیزلی گروه کیمی استفاده‌لر ائله‌ییر و یاشماغین غیرقانونی سایی‌سینی اونلارین امکداشلیغی ایله چیخارتماق نیتینده‌دیر.
