Welcome in BULAQ
Bulaq_derneyi@
باغلانتي‌لار
اثرلر
| رديف | يازار | اثر |
|---|---|---|
تبليغ‌لر
دووار پوئماسی
بو پوئما ایتحاف اولونور بوتون اونلارا کی : صنعتکار اؤلومونو ایسته ییرلر !
بو پوئما ایتحاف اولونور بوتون اونلارا کی : صنعتکار اؤلومونو ایسته ییرلر !
بورا خسته خانا بئشینجی اوتاق
یانلیز ایکی خسته واردی بورادا
بیرینجی خسته ده ایکینجی سایاق،
غرق اولوب قالیبدی گئنیش دونیادا.
بیرینجی قاپی نین آغزیندا یاتمیش،
گؤردویو دوواردی گؤردیو دووار.
پنجره یانیندا ایکینجی خسته،
گؤرور پنجره-دن آمّا هر نه وار.
ازلده-ن اینسانین قانلی سی اینسان،
قالمیش انسانلارین باختینا حسرت.
ائله بورادادا البت قالیبدی،
بیرینجی، ایکینجی تاختینا حسرت.
حیاتی گؤرمه-دن یورولان اینسان،
یئرینده بیر باخیش محتاجی اولور!
باخیش دا گول کیمی حیات باغیندا،
واختیندا آچیلیر واختیندا سولور.
ایچینده دئیه-رک اؤزوـاؤزونه :
یاتایدیم او تاختین اوسته کئشکه من.
سورور ایکینجیدن بیرینجی خسته:
ایندی پنجره-دن نه-لر گؤرورسن؟
سسله نیر اوجادان ایکینجی خسته:
گؤرورم آرابا، گؤرورم اینسان.
بورادان باخاندا شه-هه-ره سانکی،
ناری ایکی بؤلوب یئره قویموسان.
بیر قیز بیر اوغلانلا قول ـ بویون گلیر،
زوغ آتمیش چیگنینده سئوینچ قول لاری.
گئجه نین بو واختی آغ آرابالار،
سو کیمی ایچیرلر قارا یوللاری.
بوتایدان اوتایا خیاوان ایچره،
بیر قوجا سوووشور آغیر گؤرورم.
حووضون آراسیندا پارکین ایچینده،
یاغیش یئردن گؤیه یاغیر گؤرورم.
چیراقلار آلیشیر گؤزلرین کیمی،
گئجه هر بیر شئیه معنا وئریبدیر.
بیر باخ! پنجره-ده بیزدن آشاغی،
انسانلاردا اسیر، گئجه ده اسیر.
داریخما نه قده-ر تاخت اوستونده سن
سنه گؤز اولارام، قولاق اولارام.
داریخما نه گؤرسه-م بو پنجره دن،
سنه تعریف-له-رم من سحر ـآخشام.
بورا خسته خانا بئشینجی اوتاق،
کیم باسسا آیاغین بو دار اوتاغا.
گؤره-ر ایکی خسته، ایکی مهربان،
بیری گؤزه دؤنوب بیری قولاغا.
ایکینجی دئدیکجه گؤردوک لرینی،
حیات رنگه دولور بیرینجی سینده.
اوگؤردوک لرینی دئدیکجه بوندا،
یارانیر سئوینج-ده، یارانیر کین-ده.
قفیلدن بیر گئجه ایکینجی خسته،
قارالیر آزقالیر نفس گلمه سین.
بوغونتو بیر سسله اوبیرینجی-یه،
دئییر: باراماغینلا باس زنگ دویمه سین.
بیرینجی خسته-ده آمّا بیر خیال،
ائدیر اوره-گینین ایچینده دویون.
او بونو چاغیریر کؤمه-گه، بودا،
هله فیکیر چکیر جنایت اوچون!
ایکینجی خسته یه بو بیرینجی نین،
بیردن نه اولدوکی اوره یی اَسمیر؟!
زنگین دویمه سینی باسماغا، نه دن،
انسانلیق تله سمیر؟ بارماق تله سمیر؟
او گؤردوک لرینی هر آن دئیه-رک،
بونا حیات وئریب بونا جان وئریب.
بو آما «نئرسی» نی خبر ائتمه یی،
اونا آرتیق گؤروب، اونا چوخ گؤروب!
بو زنگ دویمه-سینی باسمیرکی بلکه،
او اؤلسون بو اونون تاختیندا یاتسین.
ایشده بئله اولور کی ایکینجی خسته،
اؤلورکی بیرینجی مطلبه چاتسین.
داها نه ایسته-ییر آرتیق حیاتدان،
گؤتوروب بیر گئجه بونو سالیرلار-
پنجره یانیندا تاختین اوستونه،
بودا تله-سیرکی گؤرسون هر نه وار!
داها ایندی اؤزو هر نه یی گؤره-ر،
داها گره-یی یوخ آیریسی هر آن.
باخیب پنجره دن شه-هره، چؤله
دئسین گؤردوگوندن، دئسین حیاتدان
داها گؤره جک دیر خییاوانلاری،
گؤره-جک هرنه-یی اؤز گؤزو ایله.
زحمتله-عذابلا قووزانیر بلکه،
باخسین پنجره دن ائشیگه ائله.
باخیشی ائشیگه ساتاشماق همین،
سانکی اوره-گینه تاخیلیر بیر اوخ.
پنجره اؤنونده یانلیز بیر بؤیوک،
سیمیت دووار گؤرور! داها هئچ نه یوخ
محمدرضا لوایی
1باخيش