لطفا چند لحضه صبر کنید
این انجمن در ستاد ساماندهی پایگاه های اینترنتی وزارت فرهنگ و ارشاد اسلامی ثبت شده است...

آها، بالی یئدینیز

سپتامبر آیینین اییرمی بیری، آلمانیانین اَن گؤزل فصلی اولان پائییزین ایلک گؤنونئده اوچ نمره لی آوتوباندا کؤلندن اوبرهاوزنا ساری گئدیردیم. بو آوتوبان آلمانیانین ان اوزون و ان اؤنملی آتوبانلاریندان بیریدیر. گؤنئی دن، اتریش مرزیندن باشلاییب، ان گوزئیه، دئملی هلنده جن اوزانیر. اوبرهاوزن هلند مرزینه یاخین کیچیک بیر شهردیر. آنجاق چوخ بؤیوک و مجلل بیر آرنا سی، دئملی کنسرت سالونو اولدوغو اوچون مشهوردور. سکگیزـ دوققوز ایللیک، کؤهنه کامییون آغزیناجان یوکلنمیش تریلی نین آغیرلیغی آلتیدیندا مه له ییردی. افق دان تازا باش قاوزایان گونش چوخ قیسسا بیر زاماندا شوفر اوتاغینی حامام کیمی قیزدیردیغینین یانیندا، بیر یاندان دا گؤزومو قاماشدیریردی. بیر اؤنجه کی گئجه ده آنجاق ایکی ساعات یاریم یاتدیغیمدان گؤزلریمی آچیق توتابیلمک اوچون، اؤزومه زور گتیریردیم. یوخلاماماق اوچون آلنیمی اغوشدوروردوم، بورنومو قورتدالاییردیم، باشیمین توکلریندن بیر دانا بیر دانا یولوردوم، قیچیمین اتینی چیمدیکله ییردیم، کیمی زامان اوخویور، کیمی زامان فیشقیراق چالیردیم. اؤز اؤزومه جوک دئییب گولوردوم. اؤزومو آییق توتابیلمک اوچون بونلار یئتمیردی.اؤزومون غیبتیمی ائیله ییردیم .
ـ "هه له ایندی ایندی، اللی یاشیندان سونرا کامیون شوفری اولماق ایسته ییر، بیرگون اولاجاق دا اؤزو کامیون آلاجاق..... تئز آلار...... یوخودا آلار.....بیلمیرم اللی سینه جن هانسی کوللوکده باشینا کول ساووروردو. آللاه عاغیل پایلایاندا بیلمیرم هاردا گوش یواسی چیخاردیردی.
ـ  یوخ جانیم ائله ده دگیل، غیرتلی اوشاق دیر آنجاق قربته دوشدو تک قالدی.کومک ایله یه نی اولمادی. اوشاق تلف اولدو.
ـ  قربته دوشدو نه دیر. تک قالدی دا نه دئمک، هامیمیز بورایا تک گلدیک. آها باخ ممد رسول دا تک بیر جوان اولاراق گلدی. باخ ماشاالله اون ایکی دانا تاکسیسی وار. ..خیر جانیم انسان دا گرک جوهر اولا......."
اؤزومو بو آخماق فیکیرلردن قورتارماق اوچون بیر کاست قویدوم، حاجی بابا عمی اوخوماغا باشلادی. آرادا بیر ساعاتا باخیردیم. زامانین چوخ سرعت ایله ایلرله دگینه قارشین یول قورتولماق بیلمیردی. من گئتدیکجه یول دا اوزانیردی سانکی. "دور بیر آز یولداشلارلا تلفونلاشیم، صحبت ایله ییم، یوخوم قاچسین" دئیه ال تلفونومو چیخاردیب، سیف الدین یولداشیمین نمره سینی توتدوم.
- سلام علیکم، سیف الدین قارداش، باغیشلایاسان، یوخودان اویاتمادیم ؟
- یوخ جانیم، نه یوخوسو، ایندیه یوخو قالار، چوخدانیر ائودن چیخمیشام، ایش باشیندایام.
فرمان دالیندا ایسن تلفونو کسیم، سونرا دانیشاریق.
- خیر، خیر، بوردا، فرودگاه دایام، دورموشوق نوبت گؤزله ییریک، تاکسی ایشی بودور دا، ایگیرمی دقیقه لیک بیر یولا مسافیر آپارماق اوچون ایکی ساعات یاریم نوبت گؤزلیه ییریک. چوخ یاخجی، سنده نه وار نه یوخ؟
- منده ده تازا بیر خبر یوخدور، بیلدیگین کیمی، سحرین دؤردوندن آخشامیین یئددی سینه جن یوک چکیرم، آقام دئئیردی اوغول گئت درس اوخو یوخسا حامبال اولارسان. کشکه اوخومامیش حامبال اولسایدیم. اوخودوم دا، آنجاق گئنه حامبال اولدوم، اوخودوغوم جیبیمدن گئتدی..........
- علی مردانین اوغلو خسته دیر، ائشیدیبسن؟
- یوخ، ائشیتمه میشم، نه یی دیر؟
- یاخجی بیلمیرم، آنجاق چوخداندیر خسته خانادادیر، نئچه یول جراحلیق اولونوب..........
بیرنئچه جمله صحبتدن سونرا خداحافظلشیب، تلفن دانیشمامیزی کسدیک.
علی مردانین فکری بوتون ذهنیمی دولدوردو. اون ایکی ایللیک دوستوم ایدی. یئددی ـ سکگیزایل ده مندن یاشلی اولدوغونا گؤره بؤیوک قارداشیم کیمی بیلردیم . چوخ محبتلی، ایسدی قانلی ، آلچاق گؤنوللو، شکسته نفس، بیر انسان، دوست ـ آشنا قارشیسیندا مالیندان جانیندان اسیرگه مزدی. بیرینین داردا اولدوغونو ائشیدن کیمی دورمادان کؤمگه قاچاردی، ضعیفه یان ـ زوربایا دوشمان بیری ایدی. حقسیزلیک قارشیسندا ساکت قالمازدی. دوشمانینا بئله حقسنزلیک اولدوغونو گؤرونجه گؤگوس گئریب، قارشی قویاردی. قورخو دئیلن شئی تانیماز کیمی ایدی. اوجا قامتی، ایری سومکلو اسکلتی، شصت لی یئریئیشی، تیز و نافیذ باخیشی، غضبلندیگنیده دریندن چیخان گور و ائتکملی سسی ایله انسانین جانینا قورخو سالاردی. گنچلیگینده چوخ دوگوشگن و ووراغان اولدوغونو دا اؤزوندن یوخ، آیری لاریندان چوخ ائشیتمیشدیم. بورنونون سینیغین دا اوچ نفره قارشی تک باشینا دوگوشوب، اوچونو ده ووروب میدان دان چیخارتدغی گوندن قالدیغینی چوخ ائسگی تانیدقلارینین بیری آنلاتمیشدی. قاچاق نبی ایله قارشیلاسدیرسام، چوخ بویوک بیر اغراق اولمایاجاق کیمی بیر انسان ایدی. علی مردانین اوغلو فریدون دا، اؤزوندن یئی اولماسین، چوخ یاخچی بیر اوشاق ایدی. ایگیرمی دؤردونو قورتاریب، اییرمی بئشینه گیرمک ده ایدی. هر گؤردوگونده قوجاقلاییب، اوزومدن اؤپردی، "عمی جان بیر ایشین وارسا، سؤیله، نه کومک ایله یه بیلرم؟" دئیه سوروشاردی. قامتی منیم ایکی بویوم اولدوغوندان منه عمی جان دئدیگیندن اوتاناردیم. کیمی زامان "دونیادا بئله دوستلاریم وارسا، نه غمیم وار" دئیه فیکیرلشردیم. آخ، آخ، انسانلار نئجه تئز بیربیرینه بیگانه لشیرلر.علی مردان دان خبریم اولمایالی دؤرد آی یاریم اولموشدو. کامیون ایشینه باشلایینجا ارتباطلاریم قوپماغا باشلادی. سحرین دؤردوندن آخشامین سکگیزینه قدر دنده چکیب، یوک ائندیرمکدن، آنجاق اؤلوم ائوه یئتیشیر. ائرته سی گون ده یئنه سحر دؤرت ده قالخاجاغیم اوچون بیر تیکه چؤرک یئیب یاتماغا بئیله فرصت تاپابیلمیرم. نه دوستوما سلام وئرمگه، نه دوشمانیما یامان دئمگه زامانیم قالیر. آی آللاه فریدونون نئی دیر؟ اونا بیر شئی اولسا علی مردانین بئلی بوکولر. علی مردان یاواش یاواش قوجالماغا باشلاییر، تک اومیدی ده بو اوغلاندیر............
بو فیکیرلرده ایکن اوبرهاوزنا یاخینلاشیردیم آرتیق. بوگون دؤرت یئره یوک اندیرجک ایدیم. ایلک یئر اوبرهاوزن ین گؤنئینده اولان پوکوو ایدی. پوکونون بوگونکو یوکو اون بئش تخت، اون بئش دؤشک، بئش میز، اوچ ویترین ایدی. هامیسی بیر یانا، بو میزلر ددمی یاندیردی. شیشه صفحه لرینین هر بیری یئتمیش بئش کیلو دور. ائنی ـ بویو چوخ، قالینلیغی دا آز اولدوغوندان چرخین اوستونده ساخلاماق مصیبت دیر. گاه زووب سولا ساری اگیلیر، گاه ساغا ساری. نه ایسه، بوگون ده ساغلیقلا، ضررسیزـ زیانسیز بو یوکو ائندیردیم، بارناما نی امضالاتدیریب آلیب، ایکینجی یوک اندیرجگیم رولر این آدرسنینی ناویگاتسیونا وئریب، ناویگاتسیونون گورستدیگی یولا سورمگه باشلادیم. بوگون گئنه بو آغیر میزلری ائندیردیگیم اوچون بئلیمین آغیریسی توتدو. آنجاق شوفر اوتوراغینین ایچینده اولان الکتریکلی اوجاغینین یاندیردیغیمدا بئلیمی قیزدیریرب، آغرینی بیرآز آزالدیردی. دوئیزبورگر اشتراسه (دوئیزبورگ خیاوانی) دن گئچرکن بیر ده باخدیم کی جادده نین قیراغیندا اوتوزـ قیرخ قوجامان آرمود آغاجی یان یانا دوزولوب، هر بیرینده ده اوچ ـ دؤرت یوز کیلو آرمود، ساپ ساری موم کیمی، ایکیسینی بیر الده توتماق ممکن اولمایاجاق قدر بؤیوک آرمودولارین آغیرلیغیندان آغاچلارین بوتاقلاری اگیلیب آز داها یئره دییر. بیزلرده آنجاق توت آغاجی بیر چشمه باشیندا، یوخسا یول قیراغیندا بئله صاحبسیز تاپیلار، آلمانیادا ایسه یول قیراقلاریندا، پارکلاردا آرمود، آلما، آلچا، بیر چوخ آیری صاحبسیز میوه آغاجلاری واردیر." آهان، تاپدیم، قاییدارکن بو آرمودلاردان بیر آز دریب آپارارام، بیر دسته ده گول آلارام، بو آخشام گئدرم علی مردانین اوغلونون عیادتینه" دئیه فیکیرلشدیم.
سون یوکو اندیردیگیمده، گون اورتادان سونرا ساعات دؤرت یاریم اولموشدو. ایش صاحیبینین امرینه گؤره هر گون سون یوکو اندیرندن سونرا تلفن ائدیب خبر وئرمگیم گرکیردی. آنجاق ایندی ایشی قورتاردیم دئیه خبر وئرسم آرموت درمگه زامانیم قالمایاجاق دئیه فیکیرلشرک تلفن ائتمدیم. کامیونا باغلادیغی جی پی اس آراجیلیغی ایله ایش صاحیبینین ایسددیگی لحظه کامپیوترینین صفحه سینده کامیونون هاردا اولدوغونو دا گؤره بیلجگینی بیلیردیم. آنجاق بونلارا قارشین "آللاها تولکل" دئییب، دوئیزبورق اشتراسه یه ساری یولا قویولدوم. اون ـ اون بئش دقیقه دن سونرا آرمودلارینن اولدوغو جادده دن چوخ پرت دوشوب، شهر مرکزینه یاخینلاشدیغیمی گؤردوم . آرمودلارین فیکری ایله گئدجگیم یئرین آدرسینی ناویگاتسونا وئرمه گی اونوتموشدوم. "آها، پوخو یئدیم، ایندی بو شهر مرکزیندن چیخماق، بیر ساعات چکر، ایش صاحیبی ده جی پی اس ایله هاردا اولدوغومو گؤرونجه سن اوردا نه گزیردین دئیه سوروشاجاق" دئیه فیکریمدن گئچدی. آنجاق قاییتماق مومکون دگیل ایدی. گیردیگیم خیاوانی، قاییتماق اوچون بیر یئر تاپاناجان، گئتملی ایدیم. ساغاـ سولا باخا باخا، قاییتماق اوچون بیر یئر آختارا آختارا، بیر ئیرده خیاوانین اورتاسیندا اولان بولواردا قاییتماغین مومکون اولدوغو بیر بوشلوق اولدوغونو گؤرونجه سویندی ایسم ده، بو بوشلوغون باشلادیغی یئرده کورون بئله گؤره جگی بویوکلوکده گیرده بیر تابلودا "دؤنمک قداغاندیر" علامتینی گؤرونجه سوینجیم بوشا گئتدی. اوندن سونرا دا آرتیق بولوار قورتولور خیاوان دارالیر، اورتاسیندا کسیکسیر (ممتد) جیزیق، قیراقلاریندا دا سواری لرین پارک ائیله مه سی اوچون گئنه ائنلی و کسیکسیز جیزیق دان متیریاریم گئریده قوجامان چینار آغاچلاری بوداقلارینی خیاوانین اورتاسیناجان اوزالتمیشلار. کامیون ایله گیریلمز علامتی اولمادیغینا قارشین، آشاغیدا خیاوانین دارلیغی، یوخاریدا چینار آغاچلارینین بوداقلاری کامیون ا یله بو خیاوانا گیرمگه امکان وئرمز. آی آللاه نه ایله ییم، دئیه فیکیرلشدیم. ساغیما سولوما، آینادان گؤره بیلدیگیم قدر دالیما باخدیم، یاخینلاردا پلیس فیلان گؤرونموردو. قاداغانا قارشین بورادان قاییداجاغام دئمک ایدی. سول راهنمامی ووبوب دؤنمک ایسدرکن. بیرده ن بیره اوزون بیر سیقنال سسی ایله بیرلیکده بیر چیغیرتی گلدی قولاغیما"هوپ، هوپ بس گؤرمورسن، نه ایله ییرس سن" باخدیم کی سول راهنمامی ووارارکن دؤنمه گه بؤیوک میدان گؤتورمک اوچون اراده مین اؤته سینده، ساغا یاناشمیشام. بو آرادا ساغ یانیمدا پارکدان چیخماق اوچون بورنونو خیاوانا چیخاردان ساری توسباغا فولکس واگونون یولونو کسمیشم. قورخومدان وار گوجوم ایله تورموزا باسدیم، موتور خفه لندی. "آها، پوخو یئدیم، فولکس واگونون بورنونو ازمیش اولسام، نه اولاجاق؟" دئیه فیکریمدن گئچدی. ال تورموزونو چکیب آشاغی آتلادیم. فولکس واگونون فرمانینین دالیندا اوتوران پیسمیریقلی، چیرکین، ساریشین آدام باشینی پنجره ده ن چیخاردایب، سیگار توسدوسوندن قهوه رنگینه دؤنموش اوزون بیغلارینینن آراسیندان سیگارینین توسدوسونو پوفلرکن " نه اؤکوز کیمی ماشین سورورسون اولان، آز داها ماشینیمین یاریسینی ازجک ایدین" دئیه باغیردی. ساری فولکس واگونا بیر شئی اولمادیغینی گؤرونجه اورگیم بیر آز راحاتلادی. آدامین جوابینی وئرمگه زامانیم یوخ ایدی. بوتون خیاوانی باغلادیغیم اوچون دالیمدا دوزولموش ماشینلار سیقنال چالیردیلار. مینیب بو یول دقت ایله یاواش یاواش سولا ساری دوندوم. تریلی نین گؤتونون ساغیمداکیلارا، باشینین سولومداکیلارا توخونماماسینا دققت ائدرکن بیر ده قارشیدان گلنلره یول وئرمک اوچون گؤزله مک گرکیردی. ماشینین کلله سی خیاوانین اوبیری یاینیا گئچدیکدن سونرا دا ساغ یاندا پارک ائله میش ماشینلارا توخونماماق اوچون دققتیمی ییغارکن گئنه بیر باغیرتی قولاغیما گلدی"هوپ، هوپ یاواش اول" آی اللاه گئنه نه اولدو دئیه ساغیماـ سولوما باخدیم. سول یانیمداکی آینادان تریلینین گؤتو ایله "دؤر وورولماز" تابلوسونو اگئیگیمی گؤردوم. "آها، پوخو یئدیم، یوخ بالی، بالی، بالی یئدییم، دیئه فیکریمدن گئچرکن بیر آز ساغا یاناشیب، پارک ائدن ماشینلارا پارالل (موازی) دوروب، دؤرد راهنمامی یاندیریب، آشاغی ائندیم. تابلونون اؤزونه بیر شئی اولمامیشدی، آنجاق ساپی (پایه سی) بیر آز اگیلمیشدی.نه قدرکیچیک اولسا داهی، هر تصادفی پلیسه بیلدیرمک گرکدیگینی و تصادفدن قاچماغین بؤیوک جریمه سی اولدوغونو بیلدیگیمه قارشین، "بئله بیر شئی اوچون ایندی بورادا معطل اولابیلمرم" فیکری ایله فرمان دالینا آتلاییب، گازلاییب اوزاقلاشدیم. آنجاق هایانا گئتدیگیمی بیلمیردیم. بیریاندان ایش صاحیبنین قورخوسو، اؤته یاندان "دؤنمولمز" تابلوسونو اگیب قاچدیغیم اوچون گؤرنلردن بیرینین پلیسه تلفن ائدیب ماشینیمین نمره سینی وئره بیله جگینین قورخوسو، بیر یاندان یوباندیغیمین هؤوشنه سی، بیر یاندان دا آرمودلارین هوسی، هایانا گئتمک ایسته دیگیمی بیله جگیم قدر فیکریمی بیر یئره ییغابیلمه مه امکان وئرمیردی. تلسدیگیمدن، هانسی ترافیک چیراغی یاشیل ایسه اویانا سوروردوم. بیرایکی خیاوان اؤته ده بیرده ن بیره، ایکی یوز متر ایلریده اوچ متیر یئتمیش سانتیمتر اوجالیقدا بیر دمیر یولو کؤرپوسوایله قارشی قارشییا گلدیگیمی گؤرونجه اورگیمین بندی قوپدو. تریلی نین اوجالیغی دؤرت متیردیر. بو کؤرپونون آلتیندان گئچمز. "آها، بویول پوخون بؤیوگونو، یوخ، یوخ بالین شیرینینی، ئیدیم، ایندی گل ده بو دار کوچه ده سکگیزیوز متیر دالی دالی گئت. ایگیرمی بئش دقیقه ـ یاریم ساعات چکجگ. آنجاق آیری بیر چاره ده یوخ ایدی. بیر لحظه تریلی نین یئللرینی بوشالتماق ایله بویونو آلچالدیب کؤرپونون آلتیندان گئچیم دئیه فیکریمدن گئچدی. آنجاق ایلریده داها دا آلچاق بیر کؤرپو وارسا ...اوزامان بالی، قایماغی ..... دئیه سوروشدوم اؤز اؤزومدن. بو آرادا بیر ده ساپ ساری آرمودلار گؤزومون اؤنونده جانلانیر، بوردا یوبانسام، هاوا قارالسا، آرمود ده ره بیلمه یه جگیم و بوتون امگیمین بوشا گئده جگی قورخوسو اوره گیمی دولدوردو. دوروب، ال تورموزونو چکیب آشاغی ایندیم. دالیمدان گلن کیچیک ماشینلارین دا دالی دالی گئدیب منیمم چیخماغیم اوچون یول آچمالارینی ایسته دیم. کیمیسی باغیریر، کیمیسی یامان دئیر، کیمیسی عناد ائدیب گئری گئتمک ایسته میرسه ده، گئنه سونوندا باشقا هئچ چاره تاپیلمایاجاغینی گؤزونجه یاواش یاواش گئری گئتمه گه باشلادیلار. فرمان دالینا مینیب منده گئری گئری چیخماغا چالیشدیم. آنجاق بو ایتین وئردیگی ان سکگیز متیر بویوندا ترئلی ایله ساغلی سوللو ماشینلارنی پارک ائتدیگی دار بیر کوچه ده گئری گئری گئتمک هاسان بیر ایش کیمی دگیل ایدی. بیرده ایتین مالی نینن دالی محوری ده دؤنور ساغا گئتمک ایسته دیگینده دالیسی سولا گئدیر. سولا گئتمک ایسته دیگینده ساغا. ساغ آینامدان باخیب بیرده گؤردوم کی ترئلی نین دالی بیر ماشینیا چوخ یاخین دوروب. اؤدوم قوپدو. آی آللاه اولمایا ماشینا سورتموشم. تیئز بیر آز قاباغا گئدیب، ال تورموزونو چکیب، آشاغی آتلاادیم. دالیمداکی کیچیک ماشینلار هامیسی دالی دالی گئدیب، کوچه نی بوشالتمیشدیلار. گلیب قورخا قورخا ترئیلی نین دالینادان دؤنوب ساغدا پارک ائتمیش ماشینا باخیدیم. بئئئئئئئئئلی. بالین لاپ شیرنینی.... قایماغین جوهرینی یئمشم. تاپ تازا متالیک رنگده بیر بی ام و ماشینین دالی قاپیسینین اورتاسیندان باشلایاراق سونواجان بیر سانتیمتر ائنینده گئت گئده درینلشن بیر جیزیق یوخ، یولاق آشمیشام.اورگیم قوپدو، دیزلریمین باغی بوشالدی. آیاقدا دورابیلمک اوچون ترئیلینین دالی قاپیسینین توتاناغیندان توتوب زور ایله اؤزومو ساخلادیم. آی آللاه ایندی هانیسی داشی سالیم باشیما. پولیسه خبر وئرسم. مطلق کی ایش صاحیبی "سن یوکو بوشلاداندان سونرا اوردا نه ایشین وار ایدی" دئیه سوروشوب " خیر، منیم بیمه م بو خصارتی وئره بیلمز، من سنی او کوچه یه گؤندرمه میشم، اؤز کیفین اوچون یاراتدیغین خسارتی اؤزون وئرملی سن" دئیه جک. بونونلا قالماییب، ایشدن ده چیخارداجاق. ایگیرم ایل ایشله سم بو بورجو وئریب قورتارابیلمرم. کوچه نین بیرساغینا، بیر سولونا باخدیم. کیمسه یوخ ایدی. قاچیب، فرمان دالینا مینیب بیر ایکی متر قاباغا گئدرک ماشینین گؤتونو یولا دوزلدیب، هئچ بیر شئی اولمامیش کیمی یولوما دوام ائتدیم. بیر متیر گئری یاریم متیر ایلری، اوچ متیر گئری بیر متیر ایلری......قورتولان دگیل ایدی. سانکی آیلار ایللر گئچیردی آنجاق بو یئدی سکگیز یوز متیر کوچه قورتولان دگیل ایدی. بیردن بیره قاباغیمدا ایکی متیر آرالیقدا پولیس ماشینینین دوردوغونو گؤردوم. او لحظه نه حس ائتدیگیمی هئچ بیر کلمه ایله آنلاتماق ممکن دگیل. سانکی داماریمدا قان دایاندی، بئینیم دوردو. یوخ کیمی ایدیم. رنگلر پوزولدو هر شئی کول رنگینده ایدی. سس لر یوخ ایدی. هئچ بیر شئی ائشیتمیردیم. هئچ بیر شئی فیکریمدن کئچمیردی. بدنیمی داهی حس ائتمیردیم. هر شئی دوردو. ماشینی دنده دن چیخاردیب چیخارتمادیغیمی، ال تورموزونو چگیب چکمدیگیمی، ماشینی سوندوروب سوندورمه دیگیمی سونرالار داهی خاطرلایابیلمیرم. آنجاق دیرسکلریمی فرمانا سؤوکه ییب چه نه می اللریمین ایچینه قویوب حرکتسیزجه اوتوردوغومو خاطرلاییرام. پولیس ماشینینین فرمان دالیندان بیر خانیم، یاندان بیر آقا پلیس ائندیلر. خانیم منیم قارشیمدا دوروب الینی بئلینه وروب منه باخماغا باشلادی. آقا گلیب کامیونون قاپیسینی آچیب، ائتکملی بیر سس تونوندا "ائن آشاغی" دئدی. یئریمدن تئرپمنه گه طاقتیم یوخ ایدی. آدامین "ائن آشاغی" دئدیگینی بئله قولاغیما چوخ اوزاقلاردان گلن بیر سس کیمی ائشیتمیشدیم. اؤنمسه مزجه باشیمی چویریب یوخاریدان آشاغی جوان پلیسین اوزونه باخدیم. کامیونون قاپیسی نئچه کیلومتر اوزونلوغوندا بیر دووار کیمی، جوان پولیس ایسه درین بیر دره یه اوزانان بو دووارین سونوندا چم ده دوماندا ایتمش بیر شبه کیمی گؤرونوردو. من اونو آنلامادیغیم کیمی او دا منی آنلامیردی سانکی. بلکه بیرـ ایکی دقیقه من اونا، او دا منه باخیردیق. بیر آز تاسف ایله "گؤرورم، چوخ یورقونسان" دئدیگی اوزاقلاردان کولگین گئتیردیگی قوپوق قوپوق سسلر کیمی قولاغیما گلیردی. فیکریم دورموشدو، دئمک اوچون هئچ بیر شئی عاغلیما گلمیردی. جوان پولیسین اوزونو کیمی زامان بیر انسان کیمی، کیمی زامان اوزاقلاردا قایالار کیمی گؤروردوم. بو وضعیت اوچ بئش دقیقه چکدی. بو آرادا خانیم پولیس ده داریخیب جوانین یانینا گلمیشدی. جوان اوزونو اونا چئویریب یاواش سس ایله "حشیش چکمیش کیمی گؤرونور" دئدی. بونو ائشیدینجه بیرآن اوزومه گلدیم، درین بیر یوخودان اویانیر کیمی اولدوم. هر شئی هر زامان اولدوغو کیمی اولماغا باشلادی. "خیر، خیر، حشیش فیلان چکمه میشم، دئدیم و آشاغی ایندئیم. جوان پلیس کامیونون فرمان دالینا چیخیب یاواش یاواش گئری گئری گئتمه گه باشلادی. قیز ایله من ده اونون دالیسیجا اونا باخا باخا یئریمه گه باشلادیق. بئنیمدن مین بیر فیکیر گئچیردی. "مطلق کی بیریسی تلفن ایئله ییب، بیر کامیون بو کوچه ده بیر ماشینی زده له ییب، خبر وئرمه دن قاچماق ایسته ییر دئئیبدیر" آنجاق بو یول هئچ قورخوم فیلان یوخ ایدی. اولان اولموش کئچن کئچمیشدی. اؤزومو هئچ بیر شئی اولمامیش کیمی بیلمه مزلیگه ووردوم. جوان پلیس کامیونو کوچه دن چیخاردیب خیاواندا پارک ائیله دیکدن سونرا الینده آچارلار ایله بیزه ساری گلدی. هرشئی آپ ـ آیدین ایدی. "ایندی جوان پولیس گلیب، "آرتیق سیزین ماشین سورمه گه اجازنیز یوخدور، آچارلار بیزده قالاجاق، ایش صاحبی گلیب ماشینی آپاراجاق، ایندی بویورون گلین سیزین قاچماق ایسته دیگینیز تصادفین پروتوکولونو یازاق" دئیه جک. ایش صاحیبی ده گلدیگینده "منیم بیمه م (سیقورتام) سنین کیفینه گؤره دار کوچه لره گیریب تصادف یاراتدیغینین خصارتینی وئره بیلمز. بو خصارتی نئجه قارشیلایاجاغینی اؤزون بیلرسن. بوندان سونرا دا سنیین کیمی بیر شوفره احتیاجیم یوخدور" دئیه جگینی آپ آیدین گؤزوردوم. جوان اوغلان بیزه یئتیشنده منیم ذهنیمدن کئچنین تام ترسه سینه آچارلاری منه وئریب "بویورون، یولونوز آچیق اولسون، بیز تصادفاً بوردان گئچیردیک. من سیزی چوخ یورقون گؤرونجه بیر کمک ائله مک ایسته دیم. آنجاق کیمسه یه سؤیله مه یین، بئله بیر ایش منیم اوچون قداغاندیر" دئدی.
آرموت آغاچلارینی بیر داها گؤردوگومده سئوینجیمدن ئیریمده دورابیلیمردیم. اورادا دا کامیونو ساخلاماق اوچون یئترلی ئیر وار ایدی. سحر ائودن چیخارکن پنیر چورگیمی، چاییمی قویدوغوم پلاستیک توربانی بوشالدیب، بوکوب شالواریمین جیبینیه باسیب، آرمود آغاجینین بیرنیه دیرماندیم. مطمئن اوتورابیلمک اوچون بیر ایکی قالین بوتاغین آراسینا سیخیشیب، قیچلاریمی بیر بوتاغا قیفیللادیم. اؤنجه بیر اطرافیما باخدیم. نه گؤزل منظره سی وار ایدی بورانین. بیر نئچه خیاوان اوته ده بؤیوک، مجلل بیر ساختمان گؤرونوردو. بو، اوبرهازنین مشهور آرنا سی، دئملی کنسرت سالونواولسایدی گرک. بو سالوندا بویوک کنسرتلر قویولور. بیلمیرم مایکل جاکسون کیمی، گوگوش کیمی اوخویانلار کنسرت قویور. گیریش پولودا سنین منیم عهده سیندن گله بیله جگیمیز کیمی دگیل. سول یانیمدا دا بیر نئچه خیاوان اوته ده سرو آغاچلاری، گوللر، چیچکلر ایله بزنمیش بیر قبرستانلیق گؤرونوردو. پلاستیکی چیخاردیب بوتاغین بیرینه آسیب، آرمودلاری بیر بیر دریب سئچه سئچه ایچینه قویماغا باشلادیم. ائیری لرینی، کیچیکلرینی آتیردیم. آنجاق ان گؤزللرینی، هر بیری ایکی اوچ یوز گرم، ساپ ساری موم کیمی، سولو و شیرینلرینی توربایا قویوردوم. توربانی دولدوردوقدان سونرا دیشمده آشاغی ائندیردیم. فرمان دالیندا اوتوروب حرکت ائتمگه حاضرلانیرکن بیردن بیره بئینیمه داهی بیر فیکیر گلدی، گئدیب او قبرستاندان، قبیرلرینن اوستونه قویولان گوللرین گؤزللریندن بیر نئچه شاخه یاخود بیر گولدان گوتورسم، ساباح علی مردانین اوغلونون عیادتینه گئدرکن بو آرمودلارین یانیندا بیرده الیمده گول آپارسام داها دا گؤزل اولار، فیکری ایله موتورو تازادان سؤندوردوم. بیر نئچه کوچه دن گئچیب، آخداریب، قبرستانین گیریش قاپیسینی تاپدیقدان سونرا قبیرلرین اوستونه قویولان گوللره، شمع لره، سرامیکلره باخاراق یاواش یاواش قدم وروردوم. قبیرلرین بویو عینی آنجاق ائن لری فرقلی ایدی. کیمیسی نین داشیینین اوستونده چوخ زحمت آپاران عیسی و یا مریم مجسمه لری قازیلمیشدی. کیمیسی نین بوتون اوسدو گؤزل، قارا مرمر ایله اؤرتولموشدو، کیمیسی ایسه آنجاق کیچیک بیر داشی، بیرده یوخسولجا بیر هاشیه سی وار ایدی. قبیرداشلارینینن اوستونده یازیلمیش تاریخلردن اوردا یاتانین نچه یاشیندا اولدوغو و هانسی زاماندا یاشادیغینی آنلاماق مومکون ایدی. بیر چوخونوندا آدیندان آرواد یوخسا کیشی اولدوغونو بیملمک اولوردو. یوخسولجا بیر قبرین اوستونده نئچه رنکلی رنکلی گولدانلاردا گؤزل گوللر، شمعلرو سرامیکلر وار ایدی. هر شئیدن چوخ کیچیک قهوه رنگی نقش نگارلی بیر گولدانداکی بنفش و قیرمیزی خوروزکاکولو گوللری دقتیمی چکدی. ساغیما، سولوما باخدیم، بوتون قبرستانلیق دا بیر نفر بئله یوخ ایدی. قبرین قیراغیندا اوتوروب، خوروزکاکیلی گولونو گؤتورمک ایسترکن، گوزوم قبرین باش داشیسینا دوشدو. هانس ووبر، مین دوققوزیوز سکسن بیرین مای آیینین بئشینده آنادان اولموش ـ مین دوققوزیوز دوقسان دوققوزون سپتامبرینین ایگیرمی بیرینده اؤلموش. اون سکگیز یاشیندا بیر گئنچ ایمیش، بوگونده اؤلوم گونونون ایل دؤونومو اولدوغوندان قبرینه بوقدر چوخ گول چیچک قویموشلار. بیر صلوات چووردوم، جوان آللاه اؤزوه ده اؤلنلرووه ده رحمت ایلسین دئیه رک، خوروزکاکیلی گوللرینده گؤزوم قالدیغینا قارشین آیاغا قالخیب یولوما دوام ائتدیم. ایکی قبیر اویانداکی قبرین اوستونده ده چوخلو گول وار ایدی. بو دا ناکام جوان اولار دئیه قبیر داشینا باخمادان گوللرینین ایچینده بیر آغ بیر قیرمیزی روز شاخه سی گؤتوروب، یئگین آددیملارلا قبیرستاندان چیخدیم.
او آخشام کؤلنه یئتیشدیگیمده آرتیق گئجه ساعات اون یاریم ایدی. عیادت فیلان واقتی دگیل ایدی. گوللری بیر لیوان دا سویا قویوب ائرته سی گونو گؤزلمکدن آیری بیر چارم یوخ ایدی. ائرتسی گون ایسه آخشام گئنه گئچ گلدیگیمدن یوغونماق، پالتار دگیشدیرمک کیمی شئی لره واقتیم اولمادیغیندان آنجان ترـ تلسیک ائوه یئتیشیب لیوانداکی گوللر ایله پلاستیک توربا ایله آرمودلاری گؤتوروب یولا دوشدوم.

پورتس خسته خاناسینین قاپیسینداکی اینفورماتسیون دان کیمین عیادتینه گئتمک ایسته دیگیمی دئیب فریدونون دؤردونجو قاتدا، ایگیری اوچ نمره لی اوتاقدا یاتدیغینی اؤگرندیکدن سونرا آسانسورا گیریب دؤردونجو قاتداکی ایگیریمی اوچ نمره لی اوتاغین قاپیسینا ایکی یول ووردوقدان سونرا آچیب ایچری گیردیم. کیچیک بیر اوتاق، قاپینین قارشیسینداکی پنجره نین سول یانیندا، اوتاغین بویونا قویولموش یاتاقدان سونرا قاپی یا ساری قالان بوشلوقدا کیچیک گیرده آغ میزین قیراغینداکی ایکی صندلدن بیرینده علی مردان اوتوروب دیرسگینی میزه سؤکه ییب چنه سینی سول الینینه قیسدیریشدی. ساچلاری بیر آز داها آغارمیشدی. آیاغا دورمادان، اؤنمسه مزجه باشینی چئویریب گؤزونون قیراغی ایله الیمده کی پلاستیک توربایا باخیب، اوزونو مندن چئویریرکن دیشسنی قیساراق، چوخ غضبلی بیر لحن ایله دیل دوداغی آراسیندا:
-"آلله اؤزون صبیر وئر!
دئیه میریلداندی.
ئیریمده قورویوب قالدیم. آیاقلاریم یئره یاپیشدی. نه اولدوغونو آنلایبیلمدیم. فریدونون یاتدیغی یاتاغین قیراغینداکی پنجره نین قیرناسیندا ایکی آیری سبدده آرمود ایله ایکی گلدان گول واردی. بیرده باخدیم کی ئیرده، یاتاغین بویونا اولان بوشلوقدا دووارین دیبینده ده بیر نئچه آیری آیری بوشقابلاردا، دیس لرده، یاخود سبدلرده آرمود ایله سرامیک گولدانلاردا گوللر قویولموش. قورخا قورخا کیچیک بیر آددیم علی مردانا ساری گؤتوررکن،
-باغیشلایاسان علی مردان قارداش.........
دئمه گیمه فرصت وئرمدی. جیریققا کیمی یئریندن فیشقیریب سول الی ایله یاخامدان توتوب دووارا قیسنادی. آیاقلاریم یئردن اوزولدو. بیر آن نفسیم کسیلدی، گؤزومون اؤنو قارالدی. قیرقینین پنجه سینده بیر سئرچه کیمی چابالاماغا باشلادیم. علمردان ساغ الینین شهادت بارماغینی بورنومون اوجوندا آشاغی یوخاری تئرپدرک ،
- "ایتین قودوقلاری، نه اولوب، بوگون سن قبریستان گولو ایله آرمود گئتیرن اون بیرینجی نفرسن، دؤرد آیدیر منیم اوغلوم خسته خانادادیر. بیر دییوس بیر یول قاپیمی ووروب سلام بئله وئرمه یییبدیر. بوگون هامینیز قبریستان گولو ایله آرمود ایله گلیرسیز. منی مسخره ایله ییبسیز؟ گئدین ده ده نیزین قبیرینه گولون.....ایت اوغلو ایتلر........"
دئیه باغیراراق اوزومو قاپییا چووروب، قاپی دان ائشیگه ایته له یه یب،
-آنامین روحونا آند اولسون اون ایکینجیسینی قاپی دان یوخ، او پنجره دن آشاغی آتاجاغام!
دئیه تحدید ائتدی.
 او لحظه، او سرامیک گولدانلارین بیر پاراسینین قبریستانین اؤز گولخاناسینین گولدانی اولدوغوندان اوستونده "اوبرهاوزن گوزئی قبریستانلیغی" دئیه یازیلمیش اولابیلدیگی فیکریمدن کئچدی. آسانسور فیلان گؤزله مه گه زامانیم یوخ ایدی. پیلله لرین ایکیسنی بیر ائدرک دؤرد قاتی نئجه آشاغی ائندیگیمی بئله بیلمدیم. خسته خانانین چیخیش قاپیسینا یاخینلاشیرکن ساغیما سولوما باخدیم کیمسه نین دققتی منده اولمادیغینا امین اولونجا گوللری قاپینین دالینا ایته له ییب، چیخیش قاپیسینین قاباغینداکی دؤرت داش پیلله نی ده بیر ایئله ییب، خسته خانانین حیطینی یئگین آددیملارلا اؤلچوب، پارکینگ ده کی ماشینیمین قاپیسینی آچیب آرمودلاری دالی صندلین اوستونه توللادیم. فرمان دالیندا اوتوروب سوروب گئتمک ایسته ییردیم آنجاق بوتون بدنیم قورخودان اسیردی. دیزلریم تیتره ییردی، ماشین سوره بیله جک بیر وضعیت ده دگیلدیم. علی مردانین دالیمجا گلمه یه جگیندن امین ادیم. آنجاق اونون قورخوسوندان قورتولابیلمیردیم. اؤزومو ساکینلشدیمرمک اوچون ماشینین داشپورتوندان توتون پاکاتیمی چیخاردیب، بیر سیگار سریدیم. اطرافیما باخماغا باشلادیم. آغاچلارین پائیز رنگلرینی توتموش یاپراقلارینا، یئرده کی خزللره، خسته خانایا گئدیب گلن آداملارا، ماشینلارا باخارکن بیرده بیزیم جاوادین ماوی، ایکی قاپیلی فورد ماشینینی قارشیمدان گلیرکن گؤردوم. یاخینلاشدیغیندا فرمان دالیندا اؤزونو یانیندادا خانیمی ثریا نی گوروب بیرـ بیریمیزه سلام اوچون ال قاوزادیق. بیر نئجه ماشین مندن گئریده کی بوشلوقدا پارک ایله ییب ائندیلر. ادبسیزلیک اولماسین دئیه ائنیب اونلارا ساری گئتدیم.
ایکی سی ده تویا گئدیرمیش کیمی بزنمیش، دوزنمیش، واکسلی باشماقلار، اوتولو شالوار کراوات جاوادا چوخ یاراشمیشدی. سلاملاشدیب ال وئردیکدن سونرا من جاواد ایله صحبته مشغول ایکین ثریا ماشینین دالی صاندیغینی آچیب بیر سبد چیخارتدی. اوزون سو سبدین بیر یانیندا بؤیوک بیر بوشقابدا اوستلری اینجه نایلون ایله اؤرتولو بیر نئچه ساری، سولو گؤزل آرمود دوزولموشدو اوبیری یانیندا کادو کاغاذینا ساریلمیش، قهوه رنگی بیر سرامیک گولداندا خوروز کاکیلی گولو قویولموشدو. بیر سبده باخدیم، بیر ثریانین اوزونه، دؤنوب بیر ده جاوادین اوزونه باخدیم. آنجاق بیر شئی دئیه بیلمدیم. اؤزومو بیلمه مزلیگه ووروب سوروشدوم،
- خیر اولا، هایانا گئدیرسیز؟
- علی مردانین اوغلو فریدون بوردا یاتیر، اونون عیادتینه گئدیریک.
گئنه بیر سبده، بیر جاوادین اوزونه باخدیم،
- اونلاری آپارمایین!
دئمک ایسته دیم، آنجاق سؤز بوغازیمدا دوگونلندی. اونلا ایله، یاخود علی مردان ایله دوشمانچیلیغیم اولدوغونو فیکیرائدجکلریندن قورخدوم.
- چوخ یاخچی، داها نه وار، نه یوخ،
- کنسرت خوشینا گلدی؟
- هانسی کنسرت؟
- خبرین یوخ مو؟ دونن بویوک بیر کنسرت وارایدی.
- هاردا ایدی؟
- اوبرهاوزن دا. بیلمه دگینیی بیلسه ایدیم سنه خبر وئرردیم. اوشاقلارین هامیسی اوردایدیلار. چوخ بؤیوک بیر کنسرت ایدی. حیف اولدو گؤرمه دین. اون ایکی نفر چالقیچی وار ایدی. اون ایکی نفر قیز کور گروهو، اون ایکی نفرلیک اوغلان کور گروهو وار ایدی.....
بیر لحظه علی مردانین ییرتیجی باخیشی ایله غضبله باغیردیغی گؤزومون اؤنونده تازادان جانلاندی "بوگون منه قبرستان گولو ایله آرمود گئتیرن اون بیرینجی نفرسن سن" اختیاریمدا اولمادان:
- دئملی سیزده اون ایکینجی نفرسیز، هه، بالی یدینیز او زامان.
دئیه آغزیمدان چیخدی. ثریا بیردن بیره شاشیراراق پؤرتوشدو:
- نه اون ایکینجی نفر، نه بال......؟
 بیر آز اوتاناراق،
- خیر جانیم، دئملی کنسرت چوخ گؤزل ایمیش، بال کیمی یعنی.....چوخ لذت آپاریبسینیز یعنی....
دئدیم.. دئمک ایسته دیگیمی چاتدیریب، چاتدیرابیلمه دیگیمی آنلایابیلمه دیم. آنجاق دئدیگیم ثریایا چوخ توخونموش کیمی ایدی. جاوادین الیندن توتوب :
- چوخ معطل اولما، گئج اولور!
 دئیه چکدی. جاوادی او شیک، ترـ تمیز پالتاریندا بیر داها دققت ایله گؤزدن گئچیریتدیم "بوو سون گؤروب گؤره جگیم اولابیلر، کیم بیلیر، بلکه ده سحر بیلد قزیته سینین ایلک صفحه سینده قیریمیزی بؤیوک یازی ایله یازدیغی باش خبری "اوغلونون اوزون زامان و آغیر خسته لیگینه تابلاشانماییب، جنون گئتیرن اللی سکگیز یاشینداکی آدام، اوغلونون عیادتینه گلن یولداشلاریندان بیرینی کؤلنون پورتس خسته خاناسینین دؤردونجو قاتینداکی اوتاغین پنجره سیندن آشاغی آتدی" اولابیلر" دئیه فیکیرلشرک:
- جاواد، بیرآز دایان، بیر سؤز دئیه جگم.
جاواد چوخ صبر و متانت ایله دوردو، منیم دئیه جگیمی گؤزله یه رک "بویور" دئدی. سول الیمی بیر باشیما چکدیم، بیرده چه نه می سیغارلادیم . گؤزوم ایله ثریانین الینده کی سه له یه اشاره ائدرک "بو آرمودلار باشینیزا بلا اولاجاق" دئمک ایسته دیم آنجاق سؤز بوغازیمدا دویونلندی.
 - بو آرمودلار....بو آرمودلار...چوخ گؤزل آرموددورلار.
جاواد آلنینی قیریشدیریب، سئوال دولو باخیشینی گؤزومون ایچینه تیکیب، بیغلارینی چئینه یه رک :
- بونو دئمک ایسته ییردین؟
دئیه سوروشدو. ثریا سویوق بیر سس تونوندا:
- چوخ ساغ اولون، خداحافظ.
دئییب، گئنه جاوادین الیندن توتوب، چکدی. بیر لحظه علی مردانین غضبدن قان دولموش گؤزلری گؤزومون قاباغیندا جانلانیرکن دریندنن چیخان قورخو یارادیجی سسی قولاغیمدا چینگیلددی"آنامین روحونا آند اولسون اون ایکینجی سینی بو پنجره دن آشاغی آتاجاغام" جاوادین قولوندان توتدوب، یالواریرجاسینا:
- گئتمه دور، بیر سؤز دئیه جگم.
دئیه خواهیش ائتدیم. جاواد عصبانی سسینی اوجالداراق:
- دئه قورتار گؤرک دا..نه ایسته ییرسن؟"
دئیه باشیما چیغیردی. گئنه بیر سه له یه باخدیم، بیر جاوادین اوزونه..."علی مردانین الیندن بؤیوک بیر خطا چیخاجاق" دئمک ایسته دیم، آنجاق گئنه جرئت ائتمه دیم. - علی مردان...... علی مردان .... چوخ یاخچی یولداشدیر، یوخ؟
دئدیم. جاواد منه هئچ بیر جواب وئرمه دن منیم آجیغینی ثریا نین باشینا بوشالدیرجاسینا:
- یئری گئدک، بابا!
دئیرک یولا دوشدو لر. مندن اوزاقلاشاراق آتدیقلاری هر آددیمین اؤلومه ساری گؤتوردوکلری بیر آددیم اولدوغونو آپ آیدین گؤروردوم. علی مردانین غضبدن تیتره ین دوداقلاریندان طاقتینین سونا گلدیگینی آنلامیشدیم، "الیندن بویوک بیر خطا چیخاجاق" دئیه فیکیرکشرک دالیدان جاوادی چاغیردیم.
- جاواد، دور.... بیر سؤز دئیه جگم!
جاواد نه دؤنوب باخدی، نه ده بیر جواب وئردی. ثریا باشینی چویریب تمسخر حالتی ایله:
- دئدیکلرین یئتر، قالانینی دا سونرا دئیرسن.
 دئیدی. نه ائدیب، ائدیب بو آرمودلار ایله او خوروز کاکولو گولونون او خسته خانانین قاپیسیندان ایچری گیرمسینی اؤنله مه لی ایدیم. علی مردانین بو آرمودلار ایله او خوروز کاکیلی گولونو گؤرمه مه گی اوچون الیمدن گلنی ائتمه لی ایدیم. یوخسا بؤیوک بیر خطا چیخاجاق ایدی. دونیا قهرمانلیق مسابقه سیننین سون اوتوز ثانیه سینده، اون بیر متیر دن قول وورماغا حاضیرلانان بیر فوتبولچونون عزمی، جزمی و تمرکزی ایله بوتون گوجومو ساغ قیچیما ییغدیم. بیر ایکی آددیم اونلارا یاخینلاشیب، سول آیاغیم اوسته بیر خیز گؤتوروب ساغ آیاغیمداکی وار گوجوم ایله ثریانین الینده کی سه له یه دالیدان ائله بیر تپیک ووردوم کی سه له اونون الیندن اوزولوب، هاوادا مایاللاق وورراق اوجالماغا باشلادی. گونش سیستمینین ایلک یارادیلیشیندا سیاره لرینن گونش دن آیریلدیقلاری کیمی، سبدین ووردوغو هر مایالاق دا بیر آرمود آییریلیب، هاوادا بیر یاریم دایره ووردوقدان سونرا دوشوب، آسفالتین ا وستونده پاتلاییردی. یئره دوشن هر آرمود ایله بیرلیکده، ثریا نین جیگریندن بیر پارچا قوپاریلیر کیمی درینیندن بیر "ای وای" چیغیرتیسی چیخیردی. من ایسه یئره دوشوب پاتلایان هر آرموددا خطرین بیر آددیم سووشدوغونو گؤررک، بیر راحاتلاما حس ائدیب، ایسته مه دن بیر "آخ ای" دئییردیم. سبدین ووردوغو سون مایاللاقدا ایسه خوروز کاکولو گولو، گولدانی ایله بیرلیکده سبددن آیریلیب بیر ماشینین کاپوتونون استونه دوشونجه ثریا ایکی الی ایله ساچالارینی توتوب "وای.... " دئیه چیغیردی. من ایسه ماشینین اؤز کؤهنه اوپل ماشینیم اولدوغونو و یاریم متیر او یاندا دوران سون مدل مرسدس بنزه بیر زیان گلمه دیگینی گؤردوگومدن، ایسته مه دن بیر آه چکیب "آللاه چوخ شوکور" دئدیم. جاواد ایسه منیم بیر اؤنجه کی گون پولیس لری گؤردوگوم لحظه دوشدوگوم حالا دوشموشدو. اولدوغو یئرده قوروموشدو. اوزو بیر اؤلو کیمی حالتسیز و جانسیز ایدی. نه اولوب گئچدیگینی حس ائتمیردی سانکی. هئچ بیر شئی دئمه دن ساده جه گؤزلرینین حرکتی ایله گؤیده مایالاق ووراراق دوشن آرمودلاریین دوشوب آسفالتین اوستونده پاتلادیغینی ایزله یر، بیر منیم اوزومه، بیرثریانین اوزونه باخیردی. ثرثا دؤنوب جاوادین قارشیسیندا دوروب، سول الینی بئلینه ووروب، وار گوجو ایله باشینا چیغیردی:
- خماق، سنه اللی یول دئدیم بو گئده دلی دیر، بونونلا یولداشلیق ائله مه، ائشیتمه دین.
 من ایسه بیر یولداشیمی اؤلومدن، بیر یولداشیمی دا عؤمور بویو دوسداقلاردا چورومکدن قورتاردیغیمین سونسوز غرور و سووینجی ایجریسینده بویون توتوب، گوگوس گئررک:
- سونرا آنلایاجاقسان، باجی.
دئدیم. ثریا ایسه آلنینی قیریشدیریب، اوزونو بوروشدوروب، گؤزلرینی قیسیب، آلجاقلاییجی بیاخیشی ایله منیم باشیمدان آیاغیما ایکی اوچ سفر سوزدوکدن سونرا، اوست دوداغینین سول یانینی یوخاری بوکوب، باشینی بیر آشاغی بیر یوخاری ترپدرک :
- واه واه!
دئدی.

کؤلن ، اکتبر 2007

+0 به‌ین

گؤنده ريليب تاريخ چهارشنبه 13 خرداد 1394يازار بولاق
|
اثرلريزي بو سایت‌دا ياييملاماق ايسترسه‌نيز، يازديغيميز ايمئيل طريقيله بيزيم‌له ايلگي قورون. اثريزي يوللاياندا شکيليزي‌ اونوتمايين
قالب وبلاگ