لطفا چند لحضه صبر کنید
این انجمن در ستاد ساماندهی پایگاه های اینترنتی وزارت فرهنگ و ارشاد اسلامی ثبت شده است...

گؤیده یارانمیشدیم آی ایدی یوردوم

بیر پارچا آغرییام یئرین قلبینده
هاچانسا دوغراییب آتاجاق منی
نئچه ایللیک حیرصین تؤکوب باشیما
ازیب تورپاغینا قاتاجاق منی

....

من گؤیلرین اوزونون اولدوزیدوم
یئرین سرحدلرین قیریب گلمیشم
گونشین دادیدیم آیین دوزیدوم
یقین غفلت مئیی ووروب گلمیشم

...

قانادیم  واریدی آزاد اوچوردوم
گؤیلرده  ملک‌له  تای‌ایدیم دوشدوم
هاچان گؤزومو  یومدوم‌سا؟ بیلمه‌دیم
کیم ایدیسه؟ یئره اوخلادی دوشدوم

...

گویده یارانمیشدیم آی ایدی یوردوم
یئمه‌ییم ایچمه‌ییم تک ایشیق‌ایدی
هر نفس چکدیگجه اوددوغوم هاوا
تانری نفسیله قاریشیق‌ایدی

...

بو یئر مندن تورپاق باسدی می آلیر؟
هر گون توش ائیله‌ییر بیر درده منی
داشلاردی کی هر آن سالیر باشیما
محتاجی ائله‌ییر نامرده منی

....

داها یئرده باتیب زیغدا قالمیشام
یوردوما دونمه‌یه یول آختاریرام
گونشین نورونون ساپاغلاریندان
یاپیشیب چیخماغا قول آختاریرام

....

ابلیسیله ال بیر اولوبدو نفسیم
آیاغیما بیر یئکه داش باغلاییبدی
ها  ... چالیشیرامدا آچا بیلمیرم
خایین باغلایاندا چاش باغلاییبدی

...

دئییرلر بو دوگونلرین آچاری
خئیر عمل‌لرین تاخچاسیندادی
ایشیق گلسئیدی گؤزومه باخاردیم
اولسون بیر یوخسولون بوخچاسیندادی

...

بیر گؤوه‌نیم قالیب رحمت یاغاجاق
باشیمدان چتریمی چکه بیله‌یدیم
یویونوب جانیمدا آیی گونشی
یئنیدن جانیمدا  اکه بیله‌یدیم

+0 به‌ین

گؤنده ريليب تاريخ دوشنبه 11 اسفند 1393يازار بولاق
|
اثرلريزي بو سایت‌دا ياييملاماق ايسترسه‌نيز، يازديغيميز ايمئيل طريقيله بيزيم‌له ايلگي قورون. اثريزي يوللاياندا شکيليزي‌ اونوتمايين
قالب وبلاگ