Welcome in BULAQ
Bulaq_derneyi@
باغلانتي‌لار
اثرلر
| رديف | يازار | اثر |
|---|---|---|
تبليغ‌لر
سلام یورولمایاسیز. «حامد احمدی»نی آرتیق تانییاق؟
سلام ساغولاسیز. حامد احمدی، 1365، تبریز دوغوملوسو. روانشناسی‌ده یوكسك لیسانس سویه‌سینده تحصیل آلمیشام. مین بیر گئجه حئكایه اؤدولونده (بونون دقیق آدینی رضا كاظمیدن سوروشون) بیرینجی یئری قازانیب، 2013 جی ایلده آذربایجان جومهوریسینده كئچیریلن آزادلیق ادبی موسابیقه‌سینده، حئكایه بؤلومونده بیرینجی یئری قازانمیشام. آذربایجانین چوخلو درگیلرینده حئكایه‌لر و یازیلاریم یاییملانیب (دیلمانج، یاشماق، بیرلیك، آلاتوران و...) بیرلیك اؤیرنجی درگیسینین سوروملو مودورو (مدیر مسئول) و باش یازاری اولموشام 1386 دان 1388 كیمی.
بورا كیمی ایكی كیتاب چاپ اولوب مندن: 1- تاپیلماق اوچون ایتمك (بیر دیالكتیك حج یولچولوغو، نشر موغام، تبریز، 1391)، 2- اوچورتمانی وورماسینلار، یازار: فریده چیچك اوغلو، مترجم: حامد احمدی، نشر موغام، تبریز، 1393)
- عین حالدا سون رومانیمی اینترنت اوزره یایدیم (چیراغلارین هامیسی قیرمیز ایدی، تیر 1393)
- حیكایه‌لر توپلوسو دا یاخین گلهجكده اینترنتده یاییملاناجاق.
ایندیه كیمی نئچه جشنواره ده داورلییز اولوب؟
دؤرد جشنواره‌ده ایش بیرلیییم اولوب سونای جشنواره‌سینده ایجرایی هئیتیندن اولوب آنامین یایلیغی و صباحینین هر ایكی دؤورونده ژوری هئیتیندن اولموشام.
داورلیكده نه معیاری داها اوستون توتورسوز؟
داورلیكده اساس معیار منه ریوایتدیر. بو اوزدن هر حیكایهنین ریوایتینده محتوا و فرمونا آرتیق دیققت ائدیرم. هر حیكایهنین بیر سؤزو و بیر آنا موضوعسو وار. بو موضوعلار چوخلو یازیلاردا اورتاق اولا بیلر، بو اوزدن اساس مسئله بو سؤزو نئجه دئییب، بسلهییب و اوخوجویا چاتدیرماقدیر. دونیا بویو سئوگی حئكایهلری قورتولماز، آمما هامیسی لیلی و مجنون اولمور، رومئو ژولیت اولمور. سیز دونیانین آدلیم اثرلرینی بیر یئره توپلایین، سونرا بونلارین هر بیرینی بیر یا ایكی صفحه‌ده خولاصه دئدین، هامیسی ساده و بلكه ضعیف نظره گله‌جك، بوردادی كی بیر یازیچینین گوجو بیلینیر.
اؤیكولرین بیر سیراسی اورتوگرافی و گرامر باخیمیندان ضعفلری اولور حالبوكی اؤیكو بلكه باشقا باخیملاردان گوجلو اولا بو اؤیكولره نئجه یاناشیسیز؟ و دیل مسئله سینه نقدر دیر وئریسیز؟
دیل مسئله‌سی منیم اوچون ایكینجی سیرادا یئرلشیر. بو مسئله‌نی چؤزمه‌یه هله رسمی بیر اورقان و دولتیمیز یوخدو، او اوزدن كیم دئیه بیلر كیم دوز یازیر كیم غلط؟! آمما بوندا دا سؤز یوخ كی بعضیلر باشدان آیاغا غلط یازیرلار، بونلارین حئسابی آیریدی، آمما گاهدان گؤروروك گؤزل بیر حیكایه، گوجلو بیر ریوایت، تكجه دیلینه گؤره قیراغا قویولور. بو بیر ظولمدو ادبیاتیمیزا و یازیچییا. توركجه یازماغی یئنی باشلادیغیم زامانلاری اونوتمارام. مهندس صرافی كیمی بؤیوك اینسانلار دیلماجدا منیم الیمدن یاپیشماسایدیلار بلكه بو گون سیز هئچ بیلمیردیز من كیمم؟ منده دیلی باشارمیردیم. هله‌ده چوخلاری دئین معیارلارین اساسیندا دیلی باجارمیرام، چالیشیرام اولدوقجا راحات و ساده یازام. آنام اوخویا بیلسین دئیه. یوخسا توركیهلی و یا باكیلی عموغلانلارا یازمیرام كی... دوزون ایسته‌سز چوخ واخت دیللری چتین و بوروشوق اولان یازیلاری اوخوماغا حالیم اولمور. دئییرم بس بو یازینین موخاطبی من دئییلم، هئچ توركیهلی و یا باكیلی دا دئییل، بو حیكایه تكجه یازیچی و دؤرد بئش نفر دوستلارینا عاییددی!
بیزیم جشنواره‌لرین و داورلییمیزین نظریزده اولان حرفهای جشنواره و داورلیكله نقدر فاصیله‌سی وار؟
ائله نه قدر كی فوتبالیمیز، سیاستیمیز نه بیلیم هر نه‌ییمیز حرفهای نمونه‌لرییله فرقلیدیر ادبی یاریشمالاریمیز دا ائله‌دیر. دا بونو سوروشماق لازیم دئییل كی!
بیر داور كی اؤزونون اؤیكو كارگاهی وار یا درنك عضوو دی و گاه بئله اولور كی داور اؤزو یوللانیلان اؤیكونو ائدیت ائله‌ییب بو مسئله داورلیك ده نه ائتگیلر بوراخیر؟
طبیعی كی یاخجی ائتكیسی اولمایاجاق. آمما چاره نهدیر؟ سیز گؤرون دوروم نه قدر قولایدی كی حامد احمدی داور اولور! یعنی بو مسئله بؤیوك بیر بوشلوقدان خبر وئریر. منجه داها یاخچی یول بئلنچی یاریشمالاردا فرقلی داورلردن فایدالانماق اولا بیلر. مثلن بیرینجی مرحلهده 10 داور سئچیلیب اثرلری اوخوسونلار. ائله او مرحلهده یازیلارین بیر چوخو الهنیب ایكینجی سیرایا گلر. ایكینجی مرحلهده فرقلی داورلر سون یازیلاری ببلیندیره بیلرلر... منجه چوخ ایشلر گؤرمك اولار آمما... (من ایندیلیكده هئچ بیر درنك فیلاندا اولمورام!)
بو ایلكی صباحینین كئچن ایلكی و قاباق اولدوغوز آنامین یایلیغیلا نه تفاوت لاری وارایدی؟
هر یاریشمانین اؤزونه گؤره بیر اؤزللیكلری وار. منجه آنامین یایلیغی داها حرفه‌ایدی. البته بونو قطعی دئیه بیلمیرم چون چوخداندی خبریم یوخدو. صباحی بیرینجی ایلینده ایجرایی باخیمدان چوخ یاخشی ایدی. حتتا حئكایه‌لرین ساییسیدا چوخ ایدی، آمما ایشین سونونداكی دئدی-قودولار منجه ضربه ووردو یاریشمانین دورومونا. بو ایلین اصلی اؤزللییی قیزلار و خانیملارین یوخاری سویهده (كمیت و كیفیت باخیمیندان) قاتیلماقلارییدی منجه. یوخسا یازی باخیمیندان منجه چوخ فرق یوخ ایدی. ادبیاتیمیزین سطحی بللیدی، نه یازیق كی دَییشمیر ده. بونون دا چوخلو نَدَنلری وار: گوجلو تریبون یوخدو، اوخوماق سویه‌سی آشاغیدی، فارس ادبیاتییلا ایلگیلریمیزی قیرمیشیق، جیددی تنقیدچی یوخدو و ماشاللاه هامیمیز اوخومامیش ماللانصرالدین اولماق ایستیریك!
جشنواره‌لر واركی داورلر بیلینمیر و شیركت ائیله‌ینلرده، صباحیده داورلرین قاباقجا بیلینمه‌سی و اؤیكولرین و یازیچی‌لارین آدینین بیلینمه‌سینه نظریز ندیر؟
منجه داورلرین آدین دئمك بیزیم كیمی گلیشمه‌میش بیر توپلومدا فایداسی یوخدو هئچ بلكه او یاریشمایا ضرری ده وار. مثلن بیری من! من گؤرسم حامد احمدی بیر یاریشمادا داور اولوب، اورا حیكایه گؤندرمرم هئچ، بئش نفرین ده قاباغینی آلارام. بیزلر بئلنچی بیر آداملاریق، نه اولار نئچه میلیون ایل!!! كئچمیشیمیز اولاندا! بایاق دئدیییم كیمی چئشیدلی داورلردن فایدالانماق و نئچه مرحلهده ایشی گؤزللشدیره بیلر...
بو ایل نتیجه‌ده اورتاق نظره یئتیشمه‌یییز نه طریقله اولدو؟ بو آرادا دارتیشمازدا اولدومو؟
بو ایل ایشیمیز داها راحات اولدو، چونكی منیم داورلییی قبول ائتمهیه شرطلریم واریدی (كئچن ایلین سؤزلرینه گؤره قاتیلماق نییتیم یوخ ایدی) كئچن سئری داورلرین اللری آچیق قویولمامیشدی، گرك بیر حیكایه معرفی ائله‌ییدیك و طبیعی كی بو مسئله چوخلارینین خوشونا گلمزدی، بیری دئیهجكدی منیم ایشیم نوبئل سطحینده‌دی آمما هئچ 10 یازینین ایچینده یوخدو، بیر آیریسی دئیهجكدی من اول اولوردوم فیلانكس دوستبازلیق ائلهدی و توت گئتسین. بو نومره وئرمكده اؤزونه گؤره بیر اویون بازلیق ایدی، او اوزدن بو ایل قرار اولموشدو سون سؤزو داورلر دانیشسین. بیر گون معینلشدیریب وایبئرده دانیشدیق. هر كیمین بیر لیستی واریدی. یانیلماسام هر بیریمیز 5 حئكایه سئچمیشدیك. سونرا بیر بیر یازیلارا گؤره دانیشیدیق، هر كیم اؤز دوشونجه‌لرینی اورتایا قویوردو، و نهایتده سونوجلاری بیلدییینیز كیمی آچیقلادیق.
آلتی نفر داورله ایشله‌مك یاخشی دیر یوخسا 3 نفرله؟
منه فرقی یوخدو. هر بیرینین اؤزونه گؤره موثبت و منفی یؤنلری وار. ایش بیرلیك اولسا تعداد اوخوماز...
كئچن ایل كُدلار دئییلندن سونرا وداستانلار بللی اولدوقدان سونرا گئنه داورلر هره‌سی اؤزلری آیریدا نظر وئردیلر و بیر داورین 100 و0 جریانی قاباغا گلدی
سیز ژوری هئیتی اونا ندن اعتیراض ائله‌مه‌دیز؟
سیز هاردان بیلیرسیز اعتراض ائله‌دیم یا یوخ؟ و یا اصلن نییه اعتراض ائله‌ییردیم؟ دئمیشدیلر 0 دن 100 نومره وئرین، بیری سئویر صیفر وئرسین بیریده سئویر یوز وئرسین، بو مسئله هئچ كیمی ایلگیلندیرمز. من اوردا نه صیفر وئردیم نه ده یوز، بونو دا یازدیغیم مقاله‌ده آچیقلادیم. چونكی هئچ كیم یوز، یعنی بوتون نومرهیه لاییق دئییل، دونیانین لاپ گوجلو یازاری اولسا بئله، هئچ كیم ده اوردا صیفره لاییق دئییلدی، نییه كی هئچ اولماسا یازیسینی گؤندرمه‌یه گؤره بیر نومره آلاردی!
بو ایل ندن10 داستانین اعلامی آخیر گونه قالدی؟ سیز بو نظره چاتدیز یوخسا ایجرا دبیری؟
قرارایدی سونوجلار آذر آیینین بیرینده بیلینسین. منه آیری بیر سؤز دئمه‌میشدیلر.
و اما سوال بحث برانگیز بو كی ندن 4 نفر سئچیلدی؟ ایجرا دبیرینین نظریدی یوخسا اؤزوزون؟ ایتفاق نظره چاتدیغیزدان دؤرد نفر سئچدیز یوخسا چاتمادیغیزدان؟
بئلنچی یاریشمالارا گؤندریلن یازیلار عومومن بیر بیرینه چوخ یاخین اولور، او اوزدن تكجه بیر یازینی سئچمه‌یه گوجلو فاكتلار اولمالیدیر. كئچن ایلده من و بعضی داورلرین نظری 3 یا 4 یازی سئچمك ایدی آمما دئدیییم كیمی ایجرایی هیئت قبول ائلمه‌دی.
چیخانلارلا مصاحبه ائلهدیكده دؤردو بیرلیكده 4 مجموعه داستان اوخومامیشدیلار واقعا یازیچیلاریمیز بئله دی یوخسا جریان نه دیر؟
من اوركدن اوزولدوم اونو اوخویاندا. بو بیر فاجعهدیر. گئتدیكجه ده بترلشیر. اوخوماق بیر یازارین آراجیدی، اوخومایان یازیچی یازانماز و سونرا دا اوخونولماز آمما نه یازیق كی... ائله اونا گؤره حیكایه‌لره باخساز گؤره‌جكسیز، یعنی 62 یازینین ایچینده بلكه هئچ 40 دنه‌سی ده قبول اولونان دئییلدی. بیز بو اوخوماماغیمیزین تاوانین وئرمیشیك، وئریریك و وئره‌جه‌ییك...
سیز داور اولماسایدیز صباحیده شیركت ائلردیز؟
بیراز هن بیراز یوخ! بیر ایله یاخیندی یئنی حئكایه یازمامیشام، یازمیشام آمما قوناق قاباغینا قویمالی دئییل، سون زامانلاردا باشیم پول قازانماغا قاریشیب! آمما یئنی بیر یازیم اولسایدی گؤندرردیم. بلكه دوستلارین چوخو دا منه تای دوشونسه ایدیلر چوخلاری یازی گؤندرمزدیلر. نییه كی هر بیر یازی كی الیمیزدن چیخیر داها بیزیم دئییل. من ائله واخت اولار بیر حئكایه‌نی ان آزی 30 دفعه ائدیت ائلهرم، آمما بو یاریشمایا گؤندریلن حیكایه‌لرین ایچینده ائله‌سی واریدی كی بیر دفعه ده اوخونولمامیشدی، ایملایی غلطلری واریدی بئله...
ابوذر جعفریله ایشلمك یاخچی ایدی یوخسا سعداله دنیوی له؟
آللاه هر ایكیسینیده سلامت ائله‌سین و ادبیات یولوندا باشی اوجا اولسونلار. اینانمازسیز بلكه آمما نه دنیوی جنابلارینی نه ده جعفری جنابلارینی یاخیندان گؤرمه‌میشم!
اؤزوز آذربایجان دا 3 داور سئچسز كیمی سئچرسیز؟ اؤزوزو ده سئچه بیلرسیز ها!!
داوود دوستار، صالح عطایی، رضا كاظمی، رقیه كبیری، محمد صبحدل (فارسجا یازانلاری دا آرتیرا بیلسك حافظ خیاوی‌نی‌ده دئیه‌رم).
سون سؤز؟
سیزدن تشكر ائدیرم بو دانیشیغی آپاردیغیز اوچون
9باخيش