Welcome in BULAQ
Bulaq_derneyi@
باغلانتي‌لار
اثرلر
| رديف | يازار | اثر |
|---|---|---|
تبليغ‌لر
1- (قیسا بیوگرافی):
تیكان‌تپه (تكاب) شهرینده آنادان اولوب دیپلوما قدر ائله او شهرده تحصیلات آلمیشام. سونرا تبریزده لیسانس و تهران دانیشگاهیندا دا شهرسازلیق رشته‌سینده فوق‌لیسانس سوّیه‌سینده تحصیلاتیمی بیتیرمیشم. ایندی ده زنگان شهرینده ایشیمه گوجومه مشغولام.
2- (سیز اؤزونوز ده یازیچیمی‌سینیز؟):
ادبیات ساحه‌سینده چوخ اوخوجو بیریسی كیمی مشغولام! ایكی ایل اولاركی الیمه چاتان توركجه رومان و حئكایه توپلولاری‌نین چوخونو اوخویوب یا دا اوخوماقدایام. آنجاق هر دن ده بیر شئی‌لر یازیب پوزورام. ادبیاتدان داها چوخ دیل ساحه‌سینده چالیشیرام و زنگان شهرینده دیل كیلاس‌لارینی دولاندیریرام. زنگاندا قورولان حئكایه اوتوروم‌لارینا دا هردن قاتیلیرام. هر حالدا بیر ادبییات وورغونویام و اوندان لذتیمی آلیرام...
3- (نه‌دن صباحی اؤدولو؟):
تحكییه ادبیاتی یا داها دوزونو دئسم عمومیت‌له نثر ساحه‌سینده چالیشان‌لاریمیزین سایی گوندن-گونه آرتیر و شاعرلر یانیندا یاواش-یاواش یازارلاریمیز دا گوجلنمه‌یه باشلاییرلار. من بو دورومدا بئله بیر مسابقه‌نین یئرینی نثر ساحه‌سینده بوش گؤردوم. یازارلاریمیز تحكیه ادبیاتی ایچه‌ری‌سینده، حئكایه فورمونا داها دا آرتیق ماراق‌لارینی گؤسته‌ریرلر و بو مسابقه اونلارین ماراق‌لارینی داها دا آرتیرا بیلر. ائله بو اساسدا دا بیر نئچه دوستون دا نظرینی آلیب كئچن ایلدن مسابقه‌نی كئچیرتمه‌یه باشلادیم. ایشین چتین اولماسینی سانیرام آنجاق بو مسابقه‌نی داوام وئرمه‌سینه قرارلییام..
4- (جشنواره‌لرین ادبییاتدا نه تاثیری):
كسین‌لیك‌له بئله بیر یاریشمالار ادبیاتیمزا گوجلو تاثیرلری اولا بیلر. البته بو تاثیرلر بو مسابقه‌لرین داواملی كئچیریلمه‌سینه باغلی‌دیر. یانی اگر منظم صورتده گلن ایل‌لرده داواملی سوره بیلسه، اونون تاثیر بوراخماسینا اومود باغلیا بیله‌ریك. ادبیاتی گلیشدیرن و دیری ساخلایان اونون خالق آراسیندا یاییلماسی و خالق طرفیندن آلینماسی‌دیر. مسابقه‌لر، یئنی و تازا یازارلاری خالق ایچه‌ری‌سینده تانیتدیرا بیلر.
صباحی‌نی اؤز سلیقه‌نیزله قاباغا آپاریرسینیز یوخسا كیمسه‌لرله ده گه‌ییشیرسینیز؟
دئمك اولماز اؤز سلیقه‌م‌له قاباغا آپاریرام آنجاق اجرایی ایش‌لری (مسابقه‌نین نه زامان باشلانماسی، نه زامان اثرلری گؤندرمه مهلتی‌نین بیتمه‌سی و یا هانسی گون سونوج‌لارین اعلان ائدیلمه‌سی و ...) من پلانلاشدیریرام آمما داورلیك شیوه‌سینده ان آزیندان بو ایلدن منیم هئچ بیر رولوم اولمور و داورلر نه بیچیمده اثرلری دَیَرلندیرمه‌یی اؤزلری قرار وئریرلر. من اونلاردان تكجه سون نتیجه‌نی زامانیندا منه اعلان ائتمه‌لرینی ایسته‌ییرم.
5- بیلدیره گؤره بیر سیرا دَییشیك‌لر ندن اولدو؟):
داورلیك شیوه‌میز بیلدیره گؤره چوخ دا دَییشیلمه‌میشدی؛ كئچن ایله تای بو ایلده داورلر بیرینجی مرحله‌ده بَیَندیكلری اثرلری سئچدیلر. هر داور هر نئچه اثر سئچه بیلردی آنجاق نهایتده 12 اثرین ایكنجی مرحله‌یه كئچمه‌سینه راضیلاشدیلار. سونرا دا اؤز آرالاریندا مباحثه‌لر آپاریب 4 حئكایه‌نی اؤدولو قازانماق اوچون لاییق گؤردولر. بیز بیلدیر 40 گون ایچه‌ری‌سینده سئچیلن 10 حئكایه‌نی اعلان ائتدیك و سون نتیجه‌نی ده 20 گون سونرا آذرین 1-جی گونونده آچیقلادیق آمما بو ایل بیر دفعه‌لیك آبانین 30 جو گونونده نهایی سونوجو اعلان ائتمك‌له مسابقه‌نی سون دوراغا چاتدیردیق.
6- (انتظارینیز اورگان‌لاردان یا باشقا كیمسه‌لردن) :
مالی جهتدن بیر كسدن انتظاریم یوخدور و بوتون چالیشمالاریمی ادبییاتمیزا اؤز بورجوم ساییرام. تكجه معنوی جهتدن بوتون دوست‌لاردان و ادبییات سئورلردن ریجام بودور كی بیزی بو یولدا یالنیز بوراخماسینلار. منجه درین چالشمالار، های-كوید‌‌ن ایراق ایش گؤرمه‌لر هر شئی‌دن داها تاثیرلی‌دیر. اومورام بیزلر آراسیندا بئله بیر دوروم یارانسین كی دانیشماقدان، شعار وئرمكدن چوخ، ایش گؤرولسون.
8-(سون سؤز):
سون سؤزده بوتون بیزه یاردیم ائدن‌لردن اؤزللیكله دَیَرلی داورلریمیزدن، واخت آییریب بوتون اثرلری دقتله اوخومالاری اوچون تشكر ائدیرم. بوتون مسابقه‌یه قاتیلان‌لاردان خصوصی ایله اوستاد «حسین فیض الهی وحید» جیناب‌لاریندان كی باشیمیزی اوجالتدیلار تشكر ائدیرم. حایات یواداشیمدان كی دئمك اولار بو مسابقه اصلینده اونون اؤنه‌ریسی اساسیندا یاراندی دا اؤزل بیر قدردانلیق ائدیرم. سیزدن و بولاق درنه‌یی‌نین بوتون امكداشلاریندان دا كی همیشه یاردیم‌لارینی صباحی مسابقه‌سینده اسیرگه‌میرلر تشكور ائدیرم. ادبییاتمیزا، ادبییاتچی‌لاریمیزا اوغورلو گله‌جك‌لر آرزیلاییرام و اونلارا دئییرم: نه یاخشی كی ادبییات وار، نه یاخشی كی سیز وارسیز. ساغ اولاسیز
1باخيش