Welcome in BULAQ
Bulaq_derneyi@
باغلانتي‌لار
اثرلر
| رديف | يازار | اثر |
|---|---|---|
تبليغ‌لر
بو گونلر دیلیمیزده یازیب اوخویانلارین سایی گونو گوندن آرتیر، داها دا چوخ آرتاجاق سانیرام. گنجلریمیزین بیلینجلی اولاراق آنا دیله قایغی ایله یاناشمالاری، دولاییسی ایله ده اؤیرنمه‌سینه ماراقلانمالاری، گئرچكدن كئچمیشلردن بری آرزولادیقلاریمیزین دوغرولاجاغینی موشتولوق وئرمكده‌دیر. ایللر اؤنجه (یاخلاشیق 25 ایل اؤنجه) چوخ قیسیتلی (محدود) سؤز داغارجیغیملا توركجه یازدیغیم سینیق- سالخاق شعر و یازغیلاریمین درگی‌لرده یاییملانماسی زامان، بو گونون گلیب چاتاجاغینا اینانیردیم و یانیلمادیغیم اوچون سوینجلی‌یم بو گون.
چوخ یاخین كئچمیشده، ایلك شعر كیتابیم چیخاندان سونرا، ضیالی گنج یازارلاریمیزدان بیریسی اولان، سایین محمد رحمانی‌فر-له تانیشدیم. بو ساوادلی، بیلگین و پارلاق گله‌جكلی گنج اَلَشدیرمن- یازاریمیز منیم كیتابیما گؤره باخیشلارینی، آجیلی- شیرینلی، آچیق- آشكار، هئچ محافظه‌كارلیغا باش وورمادان منیمله پایلاشدی و ندنسه منیم آجیقلانمامی سانمیشدی. اویساكی من، اولدوقجا خوشگؤرولو قارشیلامیشدیم اونون دوشونوب داشینیب دئدیكلرینی و اونون اَلَشدیرل باخیشلارینی ادبیاتیمیزا آچیلان ایشیقلی بیر پنجره سانمیشدیم و سانیرام دا. هامیمیزا آیدین‌دیر كی، بیزیم ادبیاتیمیزدا اَلَشدیری و اَلَشدیرمن (تنقید و تنقیدچی) یوخسونلوغوندان، اَلَشدیری‌لر قارشیسیندا تولئرانس گؤسترمه كولتوروموز ده، یوخ ساییلاجاق قدر آزدیر.
نئچه آی بوندان قاباق سایین رحمانی‌فرین بیتیك كیتاب ائوینه گئتمیشدیم. اونون یازیب یایینلادیغی « شهریارلا بیرلیكده اؤزگه‌لشمكدن اؤزلشمه‌یه دوغرو» كیتابینی آلدیم. بو كیتابدا، اوزون مدتلی ده‌یرلی آراشدیرمالارا دایانان ایچه‌ریكدن ساوای، دوزگون یازی فورماسی، اولدوقجا تمیز بیر دیلین سونولماسی و سؤزجوك سئچیمینه تیتیزلیكله اؤزن گؤستریلمه‌سی ماراغیمی چكدی دوغروسو. بیر نئچه گون اؤنجه ایسه، یئنیجه چیخمیش اولان «ننه‌م‌نن من» كیتابیمی بیتیك كیتاب ائوینه آپاردیغیمدا، سایین رحمانی‌فر- ین چئویردییی «دامو»نون دا یاییلمیش اولدوغونو گؤردوم. «دامو» سایین یعقوب بازارخاك-ین فارسجا یازدیغی رومانین توركجه چئویریسی‌دیر. رومانین فارسجاسینی گؤرمه‌میشم آنجاق توركجه‌سی اولدوقجا شیرین قلمه آلینیبدیر. البته دئمه‌لی‌یم كی، فارسجا دوشونجه‌یه دایالی اولاراق فارسجا یازیلدیغی اوچون، ایستر- ایستمز چئویریده ده فارسجا دیل قورولوشو ایزلری بول- بول گؤرونمكده‌دیر. بونا رغمن، دوزیازیمیزدا تانیغی اولدوغوموز بو گلیشمه‌لر شبهه‌سیز كی، ادبیاتیمیزین یئنی دؤنم‌لره یئلكن آچدیغینی گؤسترمكده‌‌دیر. من سایین رحمانی‌فر-ه تبریك ائدیر، قلمینیز همیشه یازاراولسون دئییرم و یازی‌لاری‌نین اوغورلو داوامینی گؤزله‌ییرم اؤز نؤبه‌مده.
و دوشونجه ییه‌سی اولان ادبیات‌سئورلریمیزه توركجه كیتابلاری آلیب اوخویوب پایلاشمالارینی اؤنریرم. بیزلر چوخونلوقدا توركجه ساوادی اولمایان توركلریك، بوایسه، مان‌دیر بیزلره. اؤزوموزو قانیتلاماق اوچون توركجه دانیشماقدان علاوه، توركجه دوشونوب، توركجه ساوادلانمالی‌ییق. گؤره‌ویمیز اؤز- اؤزوموزو ائییتمك‌دیر.
0باخيش