Welcome in BULAQ
Bulaq_derneyi@
باغلانتي‌لار
اثرلر
| رديف | يازار | اثر |
|---|---|---|
تبليغ‌لر
۲۰۱۳-جو ایل دونیا ادبیاتی اوچون ده ماراقلی ایل اولدو. بو ایل ده یئنه ناراضی‌لیكلر و راضی‌لیكلر، اوخوجو-یازیچی قارشیدورمالاری بیر-بیرینی اوز ائتدی. بو ایل ده نه «موراكامی»، نه ده «اومبئرتو ائكو» نوبل اؤدولونه لاییق گؤرولدو. عوضینده هئچ كیمین گؤزله‌مه‌دییی بیر حالدا آرتیق یازیچی‌لیغی بوراخان و ۸۷ یاشیندا استراحت ائد‌رك حیاتینین سونونو گؤزله‌یَن كانادالی «ائلیس مونرو» نوبئله ییه‌لندی. یولا سالدیغیمیز ایلده ادبیات دونیاسیندا دا ایتكی‌لر اولدو.
1- دوریس لسینك – دونیا ادبیاتینین ان تانینمیش نماینده‌لریندن اولان لسینك یولا سالدیغیمیز ایلده دونیاسینی دَییشدی. ۲۰۰۷-جی ایلده ادبیات اوزره نوبل اؤدولونه لاییق گؤرولَن یازیچی «قیزیل دفتر» رومانی ایله تانینیب. ۹۴ یاشیندا دونیاسینی دَییشَن لسینكین كؤمكچی‌سینین دئدییینه گؤره اؤلركَن حدّیندن آرتیق حضور ایچینده اولوب. ایران‌دا آنادان اولان لسینكی بؤیوك بریتانیا كراللیغینین بوتون اراضیلرینی گزمیش و اثرلرینده ده بو گزینتی نتیجه‌سینده توپلادیغی گیزلی بیلگیلری عكس ائدیب.
2- آلوارو موتیس – قابریل قارسیا ماركز‌دن سونرا كلمبیانین ایكینجی بؤیوك یازی‌چی‌سی ساییلان موتیس ده ۲۰۱۳-جو ایلده ۹۰ یاشیندا دونیاسینی دییشیب. یازیچی مكزیك خسته‌خاناسیندا اورك چاتیشمازلیغیندان وفات ائدیب. همین واخت كلمبیانین دؤولت باشچی‌سی «خوان سانتوس» دا اونون اؤلومونه كدرلنه‌رك بو سؤزلری قئید ائدیب: «موتیسین میلیونلارجا دوستو و حئیرانی بو گون اونون اوچون یاس توتور. كلمبیا خالقی موتیسی اصلا اونوتمایاجاق». نوبل اؤدولو آلماسا دا، ماركز قدر سئویلَن یازیچی ۱۹۲۳-جو ایلده كلمبیادا آنادان اولوب، اوشاقلیغینین چوخ حیسسه‌سینی آتاسینین سفیر اولدوغو بروسل‌ده سووشدوروب.
3- ریچارد ماتهئسون – «عشقین گوجو» و «من افسانه‌یه‌م» رومانلاری ایله دونیا شؤهرتی قازانان ریچارد ماتهئسون دا «ایلان ایلی»نده دونیا ایله ویدالاشانلار آراسیندادیر. علمی فانتاستیكا و قورخو ژانرینین نماینده‌سی اولان یازیچی ۸۷ یاشیندا لوس آنجلس‌ده وفات ائدیب. نروژ‌لی مهاجرلرین اوغلو اولان ماتهئسون بروكلین‌ده بؤیویوب و یازیچی كیمی فورمالاشیب. قئید ائدك كی او ایكینجی دونیا محاربه‌سینین ده فعال ایشتیراك‌چیلاریندان اولوب. ماراقلی مقام اوندان عبارت‌دیر كی، یازیچی آمریكا تلویزیاسینین اونا وئردییی اؤدولو آلماق قیسمت اولماییب. اؤدول تقدیم اولوناجاغی تاریخ‌دن ایكی گون قاباق دونیاسینی دَییشیب.
4- ژاك وانس - آمریكانین باشقا اونلو فانتاستی اولان ژاك وان دا ۲۰۱۳-جو ایل سونونجو ایل اولوب. فانتاست ۹۶ یاشیندا رحمته گئدنه قدر بیر –بیری‌دن ماراقلی ۶۰ كیتاب یازیب. نفوذلو «نیویورك تایمس « ژورنالینین آپاردیغی مذاكره نتیجه‌سینده وانس آمریكانین ان فرقلی یازارلاریندان بیری كیمی گؤستریلیب. یازیچینین تورك دیلینه یالنیز بیر، آذربایجان دیلینه ایسه عمومیتله هئچ بیر اثری ترجمه ائدیلمه‌ییب.
5- قور ویدال - ۲۰-جی عصرین ایكینجی یاری‌سیندا آمریكا ادبیاتینین كلاسیكی ساییلان ۸۶ یاشلی «قور ویدال» وفات ائدیب. آمریكا ادبیاتینین ان بؤیوك مقاله‌یازانی لوس-آنجلس‌ده دونیاسینی دَییشیب. بو خبری ویدالین قوهوملاری Twitter-ده تویت یازاراق بیلدیریبلر. ویدال ۱۹۶۸-جی ایلده چاپ اولونموش "مایرا برئكئنریج" رومانین‌دان سونرا دونیاجا آدلانیب.
6- آهمِت فواد - نویابرین اوچونده رحمته گئدَن «احمد فواد نئهم» مصر پرئزیدئنت‌لری حُسنی مبارك، اَنوَر سادات، همل ابدول نسیر و محمد مورسی‌نین عنوانینا یازدیغی تنقیدی شعرلردن سونرا تانینیب. هر بیر پرئزیدئنتین حاكمیتی دؤورو‌ده زینداندا یاتسا دا شعرلرینی اؤز آدی ایله چاپ ائتدیرمكدن قورخماییب. «نئهم»ی خالق آراسیندا «ال فاهومی» یعنی «جسور»، «قورخوسوز» چاغیریردیلار. نهم «عرب باهاری»نی دستكله‌یه‌نلردن بیری اولوب.
لاتینجه قایناغی:
Elmin Nuri
1باخيش