لطفا چند لحضه صبر کنید
این انجمن در ستاد ساماندهی پایگاه های اینترنتی وزارت فرهنگ و ارشاد اسلامی ثبت شده است...

مهسا 1369 دوغوملوسو، تورك ادبیاتی اوغروندا اؤزل اولاراق شعرده چالیشماسی ایل یاریما یاخیندیر. ایلك اؤیكوسونو بورادا اوخویورسونوز.



چین یوخو...

پاییزین اورتانجیل آیی ایدی. آغاجلاردان تؤكولن خزللرین خیشیلتی سسی بیر یاندان و كوچه‌نی بوروموش های-كوی ایسه بیر طرفدن اونو دئهشتلی یوخوسوندان آراییب " یوووووخ" دییه چیغیریب دیكسیندی.
قان ترین ایچینده بوغولوردو سانكی، آناسی بیر لیوان سرین سو الینده باشینین اوستونه گلیب اوتوردو.
- نه اولوب آی بالا، یوخو گؤرموشسن؟!
ایلك اؤنجه لیوانی آناسینین الیندن آلیب بیر نفسه باشینا چكدی اوره‌یی آغزینا گلیردی، ایضطیرابلی باخیشلارینی آناسینین گؤزلرینه تیكیب قفیلدن اینجه جیسمینی اونون قوجاغیندا یئرلشدیردی:
- هه آنا، یوخو گؤرموشم، قورخولو و داریخدیریجی بیر یوخو...!!!
آنا سی اونو ایسته‌مدن قوجاغیندان قوپاریب،" اولسون ترلانیم اینشاللاه خئیردی، دور آیاغا ال-اوزووه سو وور یوخونو دئنن سویا گئتسین... دور بالامسان! دئیه قیزینین آلنیندان اؤپوب یئریندن قالخدی.
ترلان آناسینین اته‌ییندن یاپیشاراق "یوخ آنا گئتمه قورخورام، دییه سیزیق-سیزیق سیزیلدادی.
آنا گئری دونه‌رك یئنی دن دوردوغو یئرینده اوتوروب ترلانین كیچیك اللرینی الینه آلیب تعجوبله سوردو:
-ترلاااان آی قیز سنه نه اولوب؟!! اولسون دا بیر یوخودو، داریخدیریرسا دئنن شاید اوره‌یین دینجلسین، یوخسا بوراخ گئتسین.
-هه آناجان سن دوز دئییرسن، دئسم یاخشی اولار... آنا یانی دئسم داها بیر ایتیفاق  توشمه‌یه‌جك؟
-ترلاااااان ... قیزا نه ایتیفاقی؟ اینشااللاه كی بیر شئی اولمایاجاق، هله یوخونو دئ گوروم بو نمنه دی منیم ترلانیمی بو قده‌ر پریشان ائدیب؟ دییه، قیزینین پریشان ساچلارینی تومارلایاراق گولومسوندو.
ترلان اؤزه‌رینده كی یورغانی بیر یانینا توللایاراق دیزی اوستو یئرینین ایچینده اوتوردو:
- یوخومدا گؤردوم ائویمیزین قاباغینداكی قبریستانلیغداییق منم، اولدوزدو بیرده ....
ائله بو آندا حه‌یه‌ط‌لرینین قاپیسی چالیندی و اونون آردینجا ایپك خالانین های-كویو آوادانلیغی سوردو...
-جئیران... های جئیران ائوده‌سن؟ ترلان...
جئیران قیزینی یالقیز بوراخیب " آللاه اؤزون بویونوموزو خئیر ائله" دییه حه‌یه‌طه سیچیرادی.
-بلی، سالام ایپك خالا گون آیدین، كئچ گل ایچه‌ری داااا...
ایپك خالا تؤوشویه-تؤوشویه گلیب آغیرلیغینی سكی اؤزه‌رینه سردی ...
- خئیر اولا آرواد، یوخسا بیر شئی اولوب؟ جئیران دئدی.
ایپك خالا یورغونلوغونو آزالداندان سونرا دئدی:
- نه اولاجاق آخی آی بالا، كنده های دوشوب حاج ایرضانی شهرده ماشین آیاغلاییب یازیق كیشینی بیماریستانا یئتیشدیرینجك یولدا جانی چیخیب، ایندیسه مردم  قبریستانا توپلاشیبلار بئله كی دئییرلر ائله‌بیل آغ ساققاللار گئدیبلر شهره جنازه‌سینی گتیره‌لر...
جئیران آغزی آچیق الینی الی اؤزه‌رینه ووروب دئدی:
-دوغوردان؟ آللاه اكبر...بئناوا كیشی، بیر عؤمور دونیا مالیندان یاریمادان عابیرلی یاشامیشدی، دا دئنن دورنانین ائوی ییخیلدی دااا، بیر خانیم اوچون كیشی‌سیزلیك اوشاقلار اوچونده آتاسیزلیق چوخ بؤیوك درددیر ایپك خالا!
ایپك باشیلا جئیرانین سؤزلرینی تصدیق ائده‌رك دئدی:
- هه بالا یامان درد دیر یامان، ائله ایندی سیزه گلنده  قیزننه قارشیما چیخدی دورنانین حالین سوروشدوم دئییر كی یازیق آرواد حه‌یه‌طین اورتاسیندا  بالالارینی باغرینا باسیب تكینه هؤنكورور.
 جئیران ایپك خالانین سؤزلرینی ائشیتدیكجه دولوخسوناراق اسیملی سسی ایله دئدی:
- آی ترلان خالا بو زاماندا ایكی قیز اوشاغینی تك باشینا بؤیودوب امرازییا گتیرمك هر آروادین ایشی دئییل كی، آللاه اؤزو دورنایا اولدوقجا صبیر وئرسین، دئییرم بو ایللرده دیغلاماسا یاخشیدی.
ایپك خالا سانكی ناراحات اولاراق اوزونو جئیرانا چئویریب دئدی:
- آی جئیران بو سؤزلری كیمه دئییرسن منیكی اون‌بئش ایلدی باشیمین سایه‌سی كیلیب!؟ دورنانی من یاخشی دوشونه‌رم، دییه اللرینی گؤیه قالدیریب اوركدن دوعا ائتدی:
- آللاه اؤزون بئله بلالاردان اوزاق ائت هامینی، منیم بیردنه اوغلوم اوختایدا هابئله، اودا غریبدی، اودا بیر تیكه حالال چؤرك قازانماغا اؤتور ایللر بویو عائیله‌سیندن اوزاق اورادا جان چورودور... عائیله‌مین گؤزو اونون الینه تیكیلیبدی ... اونودا اؤز قانادینین آلتیندا ساخلا... دییه آغلاییردی.
بو آن‌دا ترلان حه‌یه‌طه چیخیب یاواشجاسینا سو حوووضا ساری یؤنلدی... سانكی ایپك خالانین اونو گؤرمه‌یینه حالی یوخویدو. سو شیرین آچیب و اؤز اوشاقلیق دونیاسیندا یوخوسونو سویا سؤیله‌ییركی آناسی دئمیشكن سویا گئتسین...
یوخومدا گؤردوم منم، اولدوزدو و ...بیرده كیم ایدی؟ ایستك ایدی یوخسا سونا؟! اوچوموز ایدیك! ائومیزین اؤنونده‌كی  قبریستانلیغدا اویناییردیق همشه كی كیمین، آمما باشقا بیر شكیلده، باشقا بیر گئییمده... دییه حووضون دورولوغوندا اوزه‌ن بالیقلارا دونوخوب ایسته‌مه‌دن یوخوسونا آپاریلدی.
" بیر قادینین هارایی كوچه‌نی بوروموشدو و كوله‌یین قورخونج اولاییش سسی بوتون ائولره و كندین هر یئرینه یاییردی ها... را... یی!
یوخولو اولدوغونا گؤره یالنیز، قونشولارینین كیچیك قیزی و هابئله اؤزونون اویون یولداشینین اؤلمه‌یینی، حه‌یه‌ط‌لرینی قوجاقلامیش قوجا قارینین پیرتلاشیق سسیندن دینله‌‎میشدی. كندین هامیسی بیر آروادین ییخیلمیش ائوینه ییغیشیردیلار اودا تله‌سیك یوخودان دورموش یولداشینین سیزیلتی سسینی ایزله‌دیكده بولاغا دوغرو یؤنلدی.
بولاق باشیندا ایینه آتماغا یئر یوخویدو آمما بیر تهرلیكله آداملاری بیر-بیریندن آراییب قونشو قیزینین نئجه یویولماغینی گؤرمك ایسته‌ییردی و گؤردو... اؤزوده نه گؤرمك!
ایلك آیاقلارینی بؤیوموش گؤردو، حاج ایرضانین آیاغلاری كیمین. قارینینی شیشیب و كؤپولموش بویو دولو آناسینین قارنینا قده‌ر و هله صیفه‌تینده آغ-آپپاق ایپكلی باشقا بیر شئیلر بیتمیش...!!!
بونلاری گؤردوكجه قورخودان آز قالیردی اؤزونو بولاسین، هاوانین قیزغینلیغیندا اسیم-اسیم اسیردی، سانكی اؤلومون سویوغلوغو جانینا هؤپوبموش قیزی دوندورماق ایسته‌ییردی.
قورخوسوندان اؤزونو او ایزدیحاملیقدان قوپاراراق ائولرینه ساری آددیملادی.
دلی بیریسی كیمی اؤزویله دانیشیردی:
- بیلیرم، بو قیز چوخداندیر اؤلوب، گؤرمه‌دین  نئجه شیشیب-هؤرولموشدو، یازیق قیزی سانكی بوزخانادا ساخلامیشلار، سویوقلوغو منی‌ده اوشودوردو... اونون اؤلوموندن نئچه واختلار كئچمیش، یادیمدادیر قاری ننه  اؤزو دئییردی اؤله‌ن كیمسه‌نی واختیندان گئج باسدیرسانا گئتدیكجه شیشه‌ر... قالدیقجا قوخویار...! دییه ماوی گؤزلری ایسلانیردی.
بو فیكیرلرین درینلییینده بوغولموشدوكی بیر سیزیلتی سسی اونا بیر كندیر ایپ اولاراق او درینلیكدن ائشییه چكدی. سیزیلتییا یاخینلاشدیقجا قورخولارینا آرتیردی آمما، ائولرینه گئتمه‌ك اوچون او یول ایله گئتمه‌یی گركیریدی .
-ترلان...! بیریسینین حزین سسی كوچه‌نین سوكوتونو پوزدو.
ترلان سسینن تانیش اولدوغونو دویاراق آیاقلاری كئییب تام حیسسه‌لری اؤلدو سانكی، گئرییه دؤنمه‌یین ایضطیرابی آز قالیردی كیچیك اوره‌یینی پارتلاتسین...
ترلان... یئنه مندن كوسوبسن؟! دییه اللرینی اونون چییینینه آتدی.
قیز گئری دونركن بیر بویو قیسالمیش، آریق و اینجه بئللی و صیفه‌تی سانكی آی ایشیقلیغی اولان قیز جیغازینی گؤررك باغیردی "یووووووخ" ....
- ترلان... آی قیز هارداسان؟ او سویو باغلا باری، اوكی بایاقداندان اورادا اوتورموشسان نه ایسه؟ گون اورتا ائله‌دین دای اولماسا دور گل صوبحانه‌نی یئه دا... من ایپك خالایلا گئدیرم قبریستانا حاج ایرضانی شهرده ماشین ووروب... ایندی جنازه‌سین گتیریرلر، آتاندا یوخدو  گئتمسه‌م عاییب اولار...! جئیران سكی اوزه‌ریندن باغیردی.
ترلانی سانكی ایلان سانجسین، یئریندن بئله قالخدیكی آز قالمیشدی حوضوضا توشسون. یئریندن دیك دوروب آناسینین یانینا گلیب  تعجوبله سوردو:
-آنااااا...كیم اؤلوب؟ حاج ایرضا عمی؟؟!! ایستكین آتاسی؟!
 جئیران قارا چادراسینی باشینا آتاركن" هه قیزیم حاج ایرضا عمی... ایسته‌یین آتاسی" دییه حیطدن ائشییه چیخدی!!!


******

پاییزین اورتانجی آیی ایدی...
بولاغ باشیندا ایینه آتماغا یئر یوخدو... سانكی بیر آیاغی یئكه، قارنی كؤپولموش و آغ-آپپاق ایپك ساققالی اؤلونو یویورلار، بولاغین سویو سویوقلولوغدان قیروولانیب و بیر قیسسا بویلو قیز جیغازی گؤز یاشلارینی سیزیلداییر كوچه‌لرین قولاقلارینا و بیر قادینین ها ...را ... یی چؤكور كند چؤللویونه و دومانلانیر گدیكلر...

خییوو- پاییز -1391

+0 به‌ین

گؤنده ريليب تاريخ سه شنبه 1 اسفند 1391يازار بولاق
|
اثرلريزي بو سایت‌دا ياييملاماق ايسترسه‌نيز، يازديغيميز ايمئيل طريقيله بيزيم‌له ايلگي قورون. اثريزي يوللاياندا شکيليزي‌ اونوتمايين
قالب وبلاگ