گاه اولور اؤزومو اوشاقلار سایاق اَزدیریب یاغیشدا قاچماغیم گلیر
قولومو قاناد تک توتوب بؤیرومه
گؤیلرده قوش کیمین اوچماغیم گلیر
دئییرم نه اولار اوشاقلیق سایاق
اوجوزلو قولچاقلا بیرده شاد اولام
چیینیمی آغریدان یاشام یوکوندن
نه اولار نه اولار بیر آزاد اولام
فلسفه بیلمهیم حساب بیلمهیم
سایسیز سورغولارا جاواب بیلمهیم
پیرتلاشیق فیکیرلر اینجیدیر منی
هئچ یازیب اوخوماق کیتاب بیلمهیم
گؤیلومده حَیَطدن نردووان قویام
دئیَم کی گؤیلره اَللریم چاتار
مهریبان تانریمیز گؤرنده منی
دونوما بیر اَتک اولدوزون آتار
گاه اولور بو یاشدا گولمهیین منه
آنامین قوجاقین گؤیلوم ایستهییر
بو سویوق دونیامیز اوشودور منی
آتامین اوجاقین گؤیلوم ایسته ییر
اوشاغلار اوشاغلار اَلیز قوربانی
بؤیوک دونیاسیندان قاچماقیم گلیر
نفسیم داریخیر توتون اَلیمی
قفسدن اوچماقیم اوچماقیم گلیر
+0 بهین