Welcome in BULAQ
Bulaq_derneyi@
باغلانتي‌لار
اثرلر
| رديف | يازار | اثر |
|---|---|---|
تبليغ‌لر
دوققوزو اوخویوردوم. ایکیندی چاغی ائوده اوتوروب درسلریمه باخماقدایدیم کی، دالی دربنددن گلن، منی چاغیران کیشینین سسینی ائشیتدیم. کیتابلاریمی بوکوب قیراغا قویدوم. آیاغا قالخیب، گئدیب داما چیخیب دالی دربندده کی آدامی آختاردیم. قونشوموز، فرش توخویان احد ایدی. او، کئف-احوالدان سونرا، الینده کی توپو گؤستره‌رک سؤیلدی: "بو کؤهنه توپو اللی بئش تومنه ساتیللار. توپو آلاخ، بیزیم کوچه میزینده تیمی اولسون. سنیده حئسابا سالمیشام. آداما بئش تومن دوشور." آردینجا، تیمین عوضولرینین آدلارینی بیر-بیر ساییب آرتیردی: "سنده تئز پول گتیرسن، آپاریب توپ یییه سینین پولونو وئره رم." سئوینرک دامدان اندیم. فیکیرلشرک ائوه گلیب، طاقچاداکی داخیلیمی گؤتوره‌رک یئنیدن داما چیخدیم. دیوارا دیرمانیب داما چیخمیش احدین گؤزو قاباغیندا، داخیلی گؤیه قالدیریب، گوله-گوله گتیریب باجا دوواغینا چالیب سیندیردیم. داخیلدان چیخان دمیر پوللاردان، بئش تومن آییریب، هویوخ قالمیش احده وئردیم. بئله‌لیکله تپه تیمینه عضو اولدوم.
تپه محله‌سی‌نین تیمی اولاراق، آخشام باشلاری ییغیشیب تپه‌ده بالا قول اویناردیق. آنجاق بیر موددت سونرا، تپه ده توپ اویناغیمیزین قاباغینی آلدیلار. بئله‌جه، اوولده توپ مئیدانینی کندین یاخینینداکی زمی‌لره داشیدیق. چوخ گئچمه‌دن اوراداندا قووولوب، کنددن آرالی زمی‌لرده توپ اوینایا بیلدیک. سانکی، جماعت بو غریبه اویونو بَیَنمه‌ییب، دلیل-نصحیته قولاق آسمایان توپچولاری قینایاراق، گئت-گئده کنددن اوزاقلادیردیلار.
احد، تیمین موربی-کاپیتانی اولاراق، آخشاملارین بیرینده هامیدان پول ییغدی. صاباحیسی تبریزه یوللانیب، تیمه یاشیل کؤینکلر آلیب گتیردی. کؤینکلری تیمه گؤستره‌رک پایلادی. کؤینکلرین اوستونده ماشین‌سازی یازیلدیغینی گؤرن اویونچولارین چوخو، احدی قیناییب، پاس آدینی تیمه داها اویغون بیلدیلر. آمما مربّی جوابلاریندا دئدی: "پاس تهران تیمیدی، ماشین سازی تربیز!" بئله‌جه، تپه تیمینه ماشین سازیدا دئدیلر.
کندده، ماشین سازیدان قاباق، پرسپولیس ایله ایستیقلال تیملری قورولموشدو. بو تیملرین هره‌سی‌نین، بیر اصلی تیمی و بیرده گنج تیمی، وارلاریدی. کندده، پرسپولیسین اویونچولارینین داها یاشلی اولدوقلارینا خاطیر، پرسپولیسه بؤیوک تیم و ایستیقلالا کیچیک تیم دئییردیلر.
ساوالاندا، سهمانلانمیش ایکی دانا بؤیوک قول مئیدانی واریدی. دمیر یولو ایستگاهینین قیراغینداکی بو مئیدانلار، دؤولتین یئرلری ایدیلر و تیملرین یاریشلاری بو آلانلاردا اولاردی. کند تیملری آراسینداکی یاریشلار، هفته اوچو یاداکی جومعه گونلری گئچیریلردی. نییه کی، توپجولارین چوخو، فرش توخویانیدیلار و فرش ایشلمک هفته اوچو ناهاراجان اولوب، جومعه گونلری تعطیل اولاردی. هردن بیرده، جومعه گونلری، کند تیملریله تبریزین محله تیملری آراسیندا موسابیقه گئچیریلردی.
کؤینک آلاندان ایکی هفته سونرا، ماشین سازینین ایلک یاریشی، پرسپولیسین گنجلریله اولدو. او اویونون بیرینجی یاریسیندا، بیز ایکی قول ووردوق. ایکینجی یارینین اوولرینده ده، چوخ اویغون بیر اوجا پاس قاباقدا منه چاتدی. پرسپولیس تیمی ایره‌لی چکمده، اؤنومده تکجه رقیبین سون ساوونماسی، بیبی اوغلوم رومنیگه، قالمیشدی. اونو گئچسئیدیم، اوچونجو قولودا وورا بیلردیم. ساغ آیاغیملا توپو جزا ساحه‌سینه آتدیم. سونرا سورعتله رومنیگه‌نی سووشماق ایسته‌دیم. آمما، بیبی اوغلوم منه خاطیر قویاراق ایلدیک سالماقدان واز گئچسه‌ده، ایکی اللی مؤحکم ساغ قولومدان یاپیشیب آسلاندی! دئمک، بو حرکتین پنالتی اولدوغو آپ-آیدین ایدی! آنجاق پرسپولیسین بؤیوک تیمیندن اولان حاکیم، دودوک چالماییب خطادا توتمادی!! اعتیراض ائدن کاپیتان احدی توتوردولار، توتولموردو! هر حالدا، اویونو الدن وئریب سونوجدا دؤرد ایکی یه اودوزدوق. او اویون قورتولدو. آنجاق یئنه ده سونراکی هفته لرده، باشقا تیملرله آرد-آردا موسابیقه‌لر وئریب گئت-گئده برکیشیب گوجلندیک.
جومعه‌لرین بیرینده، تبریز تیملرینین بیریله یاریشاجاغیمیز قرارلاشمیشدی. منده، او گوندن قاباق، گئدیب اؤزومه اولمپیک باشماغی آلمیشدیم. صبیرسیزلیکله یاریشنین باشلانماسینی گؤزله‌ییردیم. او گئجه یاتمیش، صاباح اویناناجاق اویونو یوخودا گؤروردوم! آلمانین رومنیگه‌سی ده بیزیم کنده گلمیشدی! من، رومنیگه و بیبی اوغلوم رومنیگه باشلانمیش اویونا گؤز تیکمیشدیک. کناریمداکی رومنیگه باشماقلاریمی تعریفله‌ییب دئییردی: "بو باشماقلاردان هئچ آلماندادا یوخدو!!" آنجاق نم-نیه، بیردن-بیره رومنیگه یوگوروب باشماقلاریمی چیخاردیب قاچیرتدی!! قالخیب آیاق یالین رومنیگه‌نی قووالاماق ایسته‌ییرکن، بیبی اوغلوم رومنیگه قوللاریمدان یاپیشاراق ترپنمه‌ییمه ایجازه وئرمه‌دی!! او حینده، یوخودان هاراسان آییلیب "آلله شیطانا لعنت ائله‌سین! یاخشی هله یوخوایدی!" دئدیم. دوروب گئدیب دهلیزده کی باشماقلاریمی یوخلاییب، قاییدیب یئنیدن یئریمه گیردیم.
یاریشا بیر ساعات قالان، تازا باشماقلاریمی ائویمیزده گئییب توپ مئیدانینا دوغرو یوللاندیم. یئتیشیب کیلاس قویاراق تیمداشلاریملا گؤروشدوم! ... او یاندان، دئمه بس، احد قوناق تیمینی گوجلو گؤرموشدو. اونا خاطیر، تیمیمیزین یاریسنی ائشیکده ساخلاییب، یئرلرینه کندین یاخچی اویونچولاریندان ایچری سالمیشدی. احد اؤزونو و هابئله منی یدک ساخلامیشدی. بیرده دئمیشدی کی، بیر-ایکی قول قاباغا دوشسک، اؤز اویونچولاریمیزی ایچری سالاجاق. بونونلا بئله، احدین دیله‌دیگینین ترسینه، باجاریقلی قوناق تیمی ایکی قول قاباغا دوشه‌رک، یئنه ده تئز-تئز قول وورماق فورصتی یارادیردی. تاماشاچی‌لاردا، ماشین‌سازی‌نین بو دوروما دوشدویونو گؤروب لاغا قویوب گولوردولر. منده کناریمدا اوتوران بیبی اوغلوم رومنیگه‌یه دئییردیم: "اینصافا دورسان، بئله بیر تیم کنده آز گلیب. اویوندا اولسئیدیم بیر ایش گؤره نمزدیم!"
ائله بیل، ماشین‌سازی یئنیلمَگه اوغراییردی. سیناق اولدوقجا چتین گؤرونوردو. بیردن، تاماشایا گلمیش کندین ان یاخچی قولجوسو، محمد، باشماقلاریمی گؤروب تَلَسیک منه طرف گلدی. یئتیشیب دئدی: "غئیرتیمه ده‌یدی! یئیین اول، باشماقلاریوو چیخارت گؤروم! ایندی اویون قورتولار اودوب گئدرلر!!" اوره‌ییم گلمه‌سه ده، اوزوندن گئچینمه‌ییب، باشماقلاریمی چیخاردیب محمده وئردیم. محمدی گؤرن تاماشاچیلار، هیجانا گله رک اونو آلقیشلاماغا باشلادیلار. بئله‌لیکله بیزیم تیمه جان گلیب توپارلاندی. ترسینه، رقیبیبن روحیه‌سی ضعیفله‌ییب پوزولدو. نتیجه ده، ماشین سازی کؤینکلرینی گئیمیش، کندین سئچیلمیش تیمی، منیم باشماقلاریمی گئمیش، محمدین قوللاریلا یاریشی قازاندی. موسابیقه اوچ-ایکی‌یه بیتدی. اویون قورتولاندا، محمد باشماقلاریمی آیاغیندان چیخارداراق دئدی: "اونلار اوتسئیدی، گئدیب دئیردیلر، ساآلانی اوتدوخ! اوزون آغ اولسون!" اویاندا، مربّی احدی توتوردولار، توتولموردو!! کئفی‌ساز احد گلیب، منه اوزون توتوب دئدی: "ساغ اول کی محمدین سؤزونو یئره سالمادین! سنین باشماقلاروو اولماسئیدی، اودانمازدیق! محمد قول ووردو، ائله‌بیل سن ووردون!!" سونرا گوله-گوله آرتیردی: "عوضینده، یورولمادین! گئت درسووا باخ! قیسمت اولمادی، اوینویاخ! باغیشلایاسان!!" منده کؤنولسوزجه سینه، هاندان-هانا، احده "عیبی یوخ!" دئیه، تیمدن آیریلدیم. ائومیزه دؤنوب، یئتشیجک، تازا باشماقلاریمی سیلیب واکسلادیم.
هر هاردان ایدی، چوخراق، کند تیملری تبریز تیملرینی اوداردیلار. آنجاق اویون قورتولاندا اودوزانلارین بعضیلری اؤزلرینی شیشردرک بئله گوپلاردیلار: "اؤزوموز اوتوزدوخ! قورخدوق اوتساق کؤتک ووراسیز!!" قازانان بیزیمکیلرده اوسته لییب جواب وئرردیلر: " ساری یاغ یئین، نباتی یاغ یئینی اودار! اودوزاندا هر سؤز دئیر!!" او چاغلاردا، فقط تبریزین شاهین تیمی، هاچان کنده گلمیش، اودوب گئتمیشدی. هئچ کیمده اونلاری آسیب کسمه میشدی!!
تیملر، چئشیدلی آدلاری داشییاراق چوخالیردیلار. آرتیق، تبریزین ان یاخچی تیملرینده اوینایا بیلجک سویه ده، اویونچولار یئتیشیردی. هابئله سهلانین سئچلیمیش تیمی، تبریزین یاخین کندلری موساببقه لرینه قوشولوردو. بیر ایلده، بو موسابیقه لرده قهرمان اولموشدو. آردینجا اوستانداکی موسابیقه لرده اویناماغا حاقق قازانمیشدیر. آنجاق بو موسابیقه لرین اکین بیچینی اولدوغونا گؤره، شامپییون سهلانین سینیخ-سالخاق تیمی اؤز گوروپونداندا چیخابیلمه میشدی!
کند اؤزوده بؤیویوردو. داها توپ مئیدانلارینین، او ال-بوالینی دام-داش آلیردی. ائله کی، کندلیلر مئیدانلاردا توپ اویناماغا ایجازه وئرمه دیلر. مئیدانلارا تراختور سالیب قوللانیلماز وضعیته گتیریب چیخاردیلار. بئله لیکله، کنددن یاریشلار ییغیشیلدی. یئرین قیمتی باهالاشیب، باشقا موفته یئرلر تاپماقدا چتین اولدو. داها بؤیوک قول اوینانمادی. تیملرین بعضیسی داغیلدی. بئله جه، توپا ماراقلانانلار، گئدیب تبریزده یادا باشقا یئرلرده توپ اویناماغا دوام ائتدیلر.
آی دولاندی، ایل دولاندی. ایندیلیکده تبریزده یاشاییرام. ایکی هفته دن بیر، کندیمیزه گئدیرم. بو چاغدا، کیملیک مسئله سی داشییان تبریزین تراختور تیمینین پارلاماسی، کندده درین اثرینی قویوبدو. پرسپولیس، ایستیقلال و ماشین سازی تیملرینی سایان یوخدو. هامی تراختور تیمینین طرفداری اولوب، کندین دیوارلاریندادا چوخراق یاشاسین تراختور و یاشاسین آذربایجان شوعارلاری گؤزه ده ییر. هله، نم-نیه،توپدان زهله سی گئدن مئیدانلاری شوخوملایان تراختورچولاردا، تراختورچو اولوبلار!؟ هردن، تبریزین یادیگار آدلی ایستادیومونادا گئدیرم. اورادا کندلیلریمیزیده گؤرورم. تراختور قول یئدیکده، خالقا قوشولوب کؤنوللو اولاراق ایناملا "عیبی یوخ!" دئییرم.
رومنیگه: آلمانین گئچمیشده کی آدلیم قولجوسو
یاریش: موسابیقه
ساوونما: دیفاع
ساآلان، ساوالان، سهلان: کنده دئییلن آدلار
2باخيش