لطفا چند لحضه صبر کنید
این انجمن در ستاد ساماندهی پایگاه های اینترنتی وزارت فرهنگ و ارشاد اسلامی ثبت شده است...

ایکی آلما
کؤچورن: جعفر باقریان

    آخشام واختلاری گزمه‌یه چیخاندا،هردن بیر بالاجا اوغلومودا یانیمجا آپاریرام .بو دؤنه‌ده آپاردیم. و ائله بالاجا اوغلوم ایله گزمه‌یه گئدنده ، هردن بیر اتفاق دوشوردو ،اونا یئمه‌لی شئی‌ده آلیردیم‌کی مندن راضی قالسین. بو دؤنه‌ده بالاجا اوغلوم دوکانلارا دوزولموش ناز-نعمتی گؤرنده مندن یئملی بیر شئی ایسته‌دی. من او عقیده‌ده دئییلم‌کی،هر دؤنه اوشقلا بازارا گئدنده اونا بیر شئی آلماق لازیمدیر و بوندا دئییرم کی ،هئچ بیر واخت آلماق لازیم دئییل. آنجاق بو دؤنه هئچ بیرزاد آلماق ایسته‌میردیم ،او ندنه گؤره‌کی جیبیمده پول یوخو ایدی.و بیرده ایسته‌مه‌‌دیم‌کی ،اوشاق هر دفعه بازارا چیخاندا دادامال اؤیره‌نسین.
    بیر قه‌در دولاندیق،سونرا یولوموز دنیز قیراغینا دوشدو.آمما اوغلومودا قاشقاباقلی گؤردوم.چون تربییه اؤز قایداسینجا ،اوشاغین اؤز طبیعتی –بودا اؤز قایداسینجا.و اونون اوچون چوخ‌دا عناد ائتمک بابتیندن دنیز قیراغیندا تاباغا دوزولموش میوه‌لردن ایکی ده‌نه یاخچی قیرمیزی آلما آلدیم و ایکی‌سینی‌ده وئردیم اوغلوما. دوزدور اوغلوم آلمالاری مندن آلدی. آمما گؤردوم‌کی کؤنول‌سوز آلدی. من اوندان سببی‌نی سوروشدوم؟ سببی بللی‌یدی. بازاردا بیرآز بوندان قاباق او مندن ایکی شئی ایسته‌دی، هئچ بیریسی‌نی آلمادیم:بیر جارجو قووونو(یئمیش) ایسته‌دی-آلمادیم ،سونرادا قنادی دوکانین قاباغیندان کئچه‌نده شوشه‌نین دالینا دوزولموش رنگ‌به‌رنگ شیرینییاتدان ایسته‌دی-آلمادیم.
  اوغلوم او درجه مندن ناراضی‌میش‌کی ،من آلمالاری اونا وئرندن سونرادا گئنه(یئنه) بیر سؤز دانیشماق ایسته‌مه‌دی و من اونا وئردیییم سئواللارادا چوخ‌دا مئیل‌سیز جاواب وئردی.
  داهی اونو قاشقاباقلی گؤرنده منیمده کئفیم پوزولدو و آذرنفت ایداره‌سنین قاباغیندا دوران ترن‌وای واقونلارینین بیرینه اوغلومو قالخیزدیم و اؤزومده میندیم‌کی ،گله‌ک ائومیزه.
   واقوندا هله بیزیم ایکیمیزدن باشقا هئچ کس یوخ‌ایدی.اوغلوم بویدا بیر یئتیم روس اوشاغی جیر-جیندیر ایچینده، اوز-گؤزو قاپ-قارا، چیرکلی و ایره‌نج،گلدی دوردو قاباغیمیزدا و مندن بیر قَپیک پول ایسته‌دی.
   جیبیمده آنجاق بیر عاباسی گوموش واریدی.من اوشاغا بیر سؤز دئمه‌دیم‌کی،کئچیب گئتسین.بیر نئچه آرواد و کیشی واقونا گیردیلر، ساغیمیزدا-سولوموزدا یئر توتدولار.
   بوردا منیم فیکریم گئتدی یئتیمه پول وئرمه‌مه‌یه هابئله گؤرسن دیلنچی‌یه پول وئرمک لازیمدی،یوخسا لازیم دئییل‌می مسئله‌سی منی باشلادی مشغول ائتمه‌یه،هرکس نه دئییر دئسین،آنجاق دیله‌نچی اوشاغا هئچ بیر شئی وئرمک منیم خوشوما گلمه‌دی. بوردان اونا اشاره ائتمیرم‌کی،من هئچ بیر دیله‌نچی‌یه یوخ دئمه‍‌رم ،چونکو اولا بیلرکی،بیر پارا فیلسوفلارین دیلنچی‌یه پول وئرمک،اونو بدبخت ائتمه‌ین ایلک آددیمی‌دیر بلکه منه‌ده سرایت ائدیب‌دیر.آنجاق سؤزون حقیقتی بودورکی،بو گونکو دیله‌نچی اوشاغا بیر قپیک وئرمه‌مه‌ییم،منی بوردا خاراب ائتدی، او سببه خاراب ائتدی‌کی،همن دیله‌نچی اوشاق یاشیندا منیم آتالی-آنالی اولدوغوم،أینی–باشی تزه، قارنی توخ، بو ساعات بورادا منیم ساغ طرفیمده مندن اینجیمیش اوتورموشدو‌کی،نییه من اونا شیرینییات آلمادیم،آنجاق‌کی ایکی آلما آلدیم.
    واقونوموز حرکت ائدیب گئدنده شوشه‌نین دالیسیندان گؤردوم‌کی،ائله او دیلنه‌چی اوشاق یئرده دوروب،بیر قیرمیزی آلمانی آغزینا باسیب گمیتله‌ییر.قاباقجا بیر شئی دویمادیم،آمما همان دقیقه یادیمداکی،اوغلومون آلمالاری یادیما دوشدو و چؤندوم اوشاغا طرف، گوله-گوله منه یاواشجا بونو دئدی:"دده،آلمانین بیریسین وئردیم دیله‌نچی‌ اوشاغا".
  بیر ده‌نه قیرمیزی آلما اؤز-اؤزلویونده بیر شئی دئییل،اونون قیمتی ایکی قپیکدیر و یئییب قورتاراندان سونرا هئچ بیر شئی‌دیر.آمما معنوی ایشلرده بیر آلمانین ده‌یری اولا بیلر چوخ بؤیوک اولسون. او قه‌در یونگوللوک و کؤنول خوشلوغوکی،بورادا ایکی قپیک‌لیک آلمادان منه گلیب چاتدی،نهایت درجه‌یدی.
   فلسفه عالمینه گلدیکده،باشقالاری دیله‌چی‌یه کوچه‌ده پول وئرمه‌یی نه ته‌هر باشا دوشورلر-دوشسونلر و روح بیلیم اوزمان‌لاری(روان شناسی) بو مسئله‌نی نه ته‌هر چؤزومله‌ییرلر-چؤزومله‌سینلر،آنجاق منیم بیر بالاجا اوغلوم‌کی آلماسینین بیریسینی بیر یئتیم اوشاغا وئردی.
و اولا بیلرکی،اوغلوم‌دا یئکه‌له‌ندن سونرا،بیر پارا عالیملرین"کوچه‌ده دیله‌نچی‌یه پول وئرمه‌یینیز" اؤیودو ائشیدندن سونرا،اونلاری کوچه‌ده گؤرنده منیم کیمی اوز چؤندره‌جک‌دیر.آنجاق هله‌کی،ایندی اوغلوم بو ایشلری باشا دوشمور ائله اونون اوچون‌ده ایکی آلمانین بیرینی یئتیم اوشاغا وئردی.

+0 به‌ین

گؤنده ريليب تاريخ چهارشنبه 22 بهمن 1393يازار بولاق
|
اثرلريزي بو سایت‌دا ياييملاماق ايسترسه‌نيز، يازديغيميز ايمئيل طريقيله بيزيم‌له ايلگي قورون. اثريزي يوللاياندا شکيليزي‌ اونوتمايين
قالب وبلاگ