Welcome in BULAQ
Bulaq_derneyi@
باغلانتي‌لار
اثرلر
| رديف | يازار | اثر |
|---|---|---|
تبليغ‌لر
«سمیه علی‌دوست»
بیوگرافی:
سمیه علی‌دوست، متولد 18/06/1361، اورمیه
فوق‌لیسانس فیزیك اتمی و مولكولی، نازلی بیلیم‌یوردوندا فیزیك ساحه‌سینده حق التدریس اؤیرتمن.
اورمو شهرداری‌سی‌نین همیاری آدلی برتر لیگ ده اولان فوتبال تیمینین مربی‌سی
نئچه ایلدیر كی ادبیات دا چالیشیرسیز؟
74 دن 79 كیمی فارس ادبیاتیندا داستان و شعر بؤلومونده چالیشاردیم و ایكی كیتاب "آغوش مادر" و "عش در رویا" آدیندا چاپ مجوز آلیب آنجاق چاپ اولماماسینا قرار وئردیم. همان ایللر فارسجا ایكی شعر و نثر مجموعه‌سی حاضرلاییب اؤزل آرشیویمه آرتیردیم. سونرالار درس و ورزش ساحه‌سینده چالیشدیغیم اوچون ادبیاتدان اوزاق دوشدوم و ایندی ایكی ایلدیر كی تورك ادبیاتی‌ایله تانیش اولوب و شعر، نثر و حیكایه بؤلومونده چالیشیرام.
دونیا یازارلاریندان ائتگی:
تاسفله ادبیات بؤلومونده آز یازی اوخوموشام و دونیا یازارلارین اثرلرین‌دن فایدالانمامیشام و اوخودوغوم ساده‌جه درگی‌لرده و تحكیه انجمنین ده محدود و چئشیدلی یازیلاری اولوب.
آذربایجان یازارلاریندان ائتگی؟
چوخلو اوخومامیشام.
تحكیه‌نین ائتگیسی؟
دئیه بیلرم ایلك و تكجه انجمن و بیر یئر كی منه یاردیم ائدیب، تحكیه انجمنی‌دیر و ایندیه‌دك ان دَیَرلی بیر انجمن كی گؤروب تانیمیشام "تحكیه" انجمنی‌دیر.
اؤدول قازانماغینیزین احتمالینی وئریردینیزمی؟
بو حیكایه‌نی گؤندره‌نده بعضن تصمیم توتوردوم گؤندرمیه‌م. دوشونوردوم چوخ ضعفلری وار كی گرك اوستونده ایشله‌یم. اؤزه‌للیكجه گرامری و نگارشی ضعفلر و هئچ اینانمیردیم بو اؤدولو قازانام. آنجاق قازانماغیما چوخ موتلو اولوب و داها انگیزه‌لندیم.
صباحی جشنواره‌نین تاثیری یازیچیلارا؟
دئدیییم كیمی من بو اؤدولو قازانماغا چوخ موتلو اولوب و انگیزه‌م داها چوخالدی. بو اوزدن هر یاریشی هر ایشین داها كیفیتلی اولماغینا و گئنیشلندیرمه‌یینه ضروری و لازیم بیلیرم.
سون سؤز:
بوتون ادبیات ساحه‌سینده چالیشان دوستلاری سئویب، تشككور ائدیب و سیزدن اؤزل تشككور ائدیرم.
«سعیده احمدی»
بیوگرافی:
سعیده احمدی یم.69/11/11 دوغوملوسو. دانشگاه تبریز ده مهندسی كشاورزی بیتیرمیشم.
نئچه ایلدیر كی ادبیات دا چالیشیرسیز؟
اوشاقلیق دا ناغیللاری چوخ سئوردیم. هر گئجه مطلق بیر نفر تاپاردیم كی منه ناغیل دئسین. نئچه دفعه‌لر ائشیتسم ده گینه ناغیلی سونونا قدر دینلردیم. او ناغیل‌لا یاشایاردیم سئوینردیم آغلاردیم. دونیامین ایچینده بیر آیری دونیا یاراتماغی سئوردیم. اونا گؤره ده قوناق-باجی اویونونون دلی سیدیم. بیر زمان دان سونرا روتین قوناق-باجی خوش گلمه‌دیینه گؤره دوستلاریملا اؤز آرامیزدا حكایه یارادیب واونو جانلاندیرماغا باشلادیق. بو سبك قوناق-باجی اویناماغی چوخ سئوردیم. مثال اوچون ایكی باجی اولاردیق بیریمیزین قولچاغی نوخوش اولاردی! و بیز ایكیمیز اونو ساغالماسینا مجادله ائدردیك. سورا او بیرسینین قولچاغی كوسوب ائودن گئدردی و بیز اونو آختاراردیق. بو اویونلار روزمره حیاتیمیزین اوشاقجا باخیشی دی. بو سناریولاری باخدیغیمیز فیلم لر كارتون‌لار و سریال‌لاردان بورج آلاردیق. منیم حكایه‌لریم چوخ بَیَنیلردی، او اوزدن بوتون هفته‌نی اولوب گئچن‌لره دیققت ائله‌مه‌یی اؤرگَندیم .نیه كی هفته سونو یولداشلاریم مندن سناریو ایسته‌ییردی‌لر. راهنمایی مقطعینه‌جَك بو اویونلار داوامی واریدی اما گیزیلینجه‌دن!
بیرگون دوستلاریملا قرارلاشدیق هركس یاراتدیغی قوناق-باجی سناریو‌لارین یازسین و ساخلاسین. منیم ایلك یازی‍لاریم ائله بو اویونلار اولدو...
دونیا یازارلاریندان ائتگی:
هانس كریستین آندرسون ون سئحیرلی دونیا‌سیلا تانیش اولدوم. جمعیت‌لی عایله اولدوغوموزا گوره اوخوتدوغوم ناغیللاری بو دفعه نوه‌لریمیز منه اوخوتدوردو و من دویدوغوم و اوخودوغوم بوتون ناغیللاری یوره‌سل‌لشدیرمه‌یه باشلادیم. چون منیم كیمی اولان یئنی نسیل اوشاقلاری، حاضیر دئییل‌دیلر بیر ناغیلی اون دفعه ائشیتسین‌لر!
هانسل دن ساری اینك و ساحره‌لردن قاری ننه‌یه یول اولان یول، ساده جه تخیل دونیاسیندان كئچیردی و بو دنیا منده جانلاندی.
دونیا ادبیاتیندا هانسی یازاری داها اوستون توتماق كیمی بیر لیستیم یوخ. ادبیات دونیاسینا باغلی و صادیق بیر اوخوجو یام.
تحكیه‌نین ائتگیسی؟
ایلك و تك گئتدیییم انجمن13یاشیم دا جولفانین «انجمن ادبی هفت هنر»ایدی.سایین آیدین آراز دبیریدیلر او زمان. ایلك اوستادیم دا سایین آیدین آراز اولوب. اصلینده من آیدین آرازین كشفی ساییلیرام. نقد لری و نظرلری همیشه منه یاردیم ائله‌دی.آچیق و نت و البته غرض‌سیز نقدلرینه چوخ مدیونام و البته هرزمان اوخوماغا تشویق‌لرینه داها چوخ.
آذربایجان یازارلاریندان ائتگی؟
سون زمان‌لار آذربایجان یازارلار ایچینده داوود دوستارین اؤزونه عایید اولان یازی سبكین چوخ سئویرم.
صباحی جشنواره‌نین تاثیری یازیچیلارا؟
صباحی اودولو نو ایلك گؤرنده چوخ سئویندیم. آرتیق بیزیم ده ادبی اودولوموز وار دئیه.
بو ایل ائشیتدییمه گؤره استقبال چوخالیب. بو حركتین دوامی گلمه‌لی‌دیر و داها گوجلنمه‌لی‌دیر...
بونا دوشوننده كی 60 دان چوخ یازار یارانیب و الینه قلم آلیب و دونیا آخینتیسی‌نی ثبت ائله‌مه‌یه چالیشیر منی سئویندیریر. البته كی گوجلو یازارلاریمیز وار و اولاجاق.
سون سؤز:
سون سؤز اولاراق صباحی اودولونون ده‌یرلی ژوری‌سیندن و اجرایی هیئتیندن تشكر ائدیرم.
بولاق درنه‌ییندن ده بو دانیشیغا گؤره تشككور الییرم.
«یعقوب رنجبر»
اؤزونوزو تانیتدیرین.
یعقوب رنجبر(برگزیده كشوری 74 شعر، مقام اول شعر استانی )، حقوق اؤیرنجیسی، دوغوم: 1360-مشگین‌شهر
نئچه ایلدیر ادبیات و داستان یازماقلا اوغراشیرسیز؟
اوشاقلیق زامانین دان شئعیر یازماقلا مشغولام، ایلك داستانیمی بیر ایل بوندان قاباق یازمیشام، بو بیر ایلده 15-20 داستان یازمیشام.
دونیا یازارلاریندان كیملری سئویب و اوندان ائتكی‌لنیب‌سیز؟
ژان پل سارتر و گابریل گارسیا ماركز. چوخلو یازیچی‌لارین آدی تئز یادیمدان چیخیر
سیز هانسیسا بیر درنه‌یه عضوسونوزمو؟ یازیچی‌نین گلیشمه‌سینده درنه‌یین نه‌قدر تاثیری اولا بیلر؟
76-جی ایلدن ایرشاد ادارسینده مشكینین ادبی درنه‌یینین عضوویام، كی 3 ایلدی «بولاق درنه‌یی» آدیندادیر. من بولاق درنه‌یینده علمی اصول‌لارلا تانیش اولوب یازیچی‌لارین اثرلریله و اونلارین اثرلر اوستونده اولان باخیشلاریلا یاخیندان تانیش اولموشام و منجه بو بیر یازیچیا گلیشمك اوچون یاخچی بیر فرصت اولا بیلر. من بولاغین بیر عضوی اولاراق بولاق دان اولدوقجا یارارلانمیشام و دئیه بیلرم كی داستان یازماغی بو انجمن ده اؤیرنمیشم، مشگین ده یئنی یئتمه‌لر اوچون بو انجمنین عضوی اولماغی وورغولاییرام و هر بیر شهرده هر یئنی یئتمه‌یه تؤوصیه ائدیرم درنك‌لره قاتیلسینلار.
جشنواره ده نئچه درصد احتیمال وئریردیز داستانین مقام گتیرسین؟
من بو جشنواریه داستان یولاماقدان هدفیم تكجه داستانیمی و اؤزومو سیناماق‌ایدی و مقام گتیرمك سون اولویت‌ده دیر.
صباحی اؤدولونه نظریز نه‌دیر؟ و بیر جشنواره ده ادبیات و یازیچی‌نین اؤزونون گلیشمه‌سینده نه تاثیری اولا بیلر؟
داوری اینصافلا اولسا، جشنواره‌لرین تاثیری چوخ اولا بیلر.
سون سؤز؟
دوشونجه، دویغو و خیال دونیاسی اولان ادبیات اولماسایدی من بلكه ده یوخموش كیمی سانیردیم اؤزومو
«پری آخته»
اؤزوزو تانیتدیرین
من «پری آخته»یم 1352 دوغوملوسو، موغانین جعفرآبادیندا آنادان اولموشام، ایندی ایسه 1366 دان اردبیلده یاشاییرام. ایشیم یازیچیلیقدی (شئعیر، داستان، خاطیره) تحصیلاتیم دیپلوما كیمی‌دیر، آنجاق سوووشدوردوغوم كارگاه‌لاری دوره‌لری حسابلاسان دوكتورا مدركی‌نین واحیدلری‌له بیر اولا بیلر.
نئچه ایلدیر ادبیات و داستان یازماقلا مشغول سوز؟
66 دان جشنواره‌لرده شیركت ائدیب مقام گتیرمیشم آنجاق 85 دن جیددی اولوب و پروفسیونال ایشله‌میشم،گئجه-گوندوز ایشیم صیرف یازماقدیر شئعیر، داستان، خاطیره...ایلك حرفه‌ای داستانیمی‌دا 85 ده یازمیشام و سون داستانیمی دونن گئجه.
دونیا یازالاریندان كیمی سئویرسیز و كیمدن تاثیر آلیبسیز؟
چوخلو روس یازارلارینی سئویرم داستایفسكی، چئخوف و ماكسیم گورگی. چئخوفون شخصیتینه ده وورغونام داستانلاریندا اولان گیزلی غم منیم ده اثرلریمه تاثیر قویوب... ماكسیم گورگی‌ده سو آزادلیق سیمگه‌سی اولدوغو كیمی منیم ده داستانلاریمین چوخوندان سو آخیر، آنجاق چوخلو تاثیری من طبیعت دن آلیرام
آذربایجان ادبیاتیندا كیمی سئویب و تاثیر آلیبسیز؟
او تایدان او قدر اوخومامیشام تكجه محمود مهدوی‌نین ترجومه ائله‌دییی بیر ایكی داستانی اوخوموشام و بو تایدا رقیه كبیری نین یازدیقلارینی سئویرم و باشقا شهرلردن اوخومامیشام آنجاق اؤز شهریمیز اردبیل ده آقای كاظیمی دن و مهدوی دن نئچه توركی یازدیغیمی چوخلو اؤیرَنمیشم و ایش‌لرینی بَیَنیرم.
سیز هانسیسا بیر درنه‌یین عضووسوزمو؟ درنه‌یین یازیچیا نه تاثیری اولا بیلر؟
من ایكی ایل بوندان قاباغا كیمی كارگاه‌لاردا اولاردیم. منی بورا یئتیرن كارگاه‌لار اولوب و داستانین ایلك قایدالاریلا تانیش اولماغیما سبب اولوب. من ایكی ایل بوندان قاباغا كیمی كارگاهدا اولماغیمی گركلی بیلیردیم، آنجاق اردبیلده چوخلاری اثر یئرینه یازیچینی نقد ائله‌دییی اوچون ایندی كارگاهلارا نیاز گؤرمورم. آنجاق اوستادلاریملا ایلگیمی قیرمامیشام. یئنی یئتمه‌لرین كارگاها گئتمه‌سینی گركلی دوشونورم.
نه قدر ائحتیمال وئریردیز داستانیز جشنواره‌ده مقام قازانسین:
داستانیمی قورتاراندا 90% ائحتیمال وئریردیم داستانیم مقام گتیره. دوزدو باشقا یازیچیلاردان و داستانلاردان خبریم یوخ ایدی. آنجاق داستانیمدا هر سؤزومو دئیه بیلدیییم اوچون و اونا چوخ زحمت چكیب تقریبن 14 سئری بازنویسی ائله‌دییییم اوچون اؤزومو اوّل بیلیردیم.
صباحی اؤدولو و بوتونلوكله جشنواره‌لرین ادبییات و یازیچیا نه تاثیری اولا بیلر؟
من چوخ سئوینیرم اؤز آنا دیلیمیزده اؤزه‌للیكله داستان اوچون جشنواره واریمیز، صباحی بیزی اؤز دیلیمیزده یازماغا تشویق ائله‌ییر و یازماق و یاراتماق اوچون مثبت انرژی وئریر. آرزوم بودور بئله جشنواره‌لرین سایی آرتیق اولا و البته یازیچی‌لار بیر-بیرینی گؤروب و تانیماق اوچون اختتامیه تؤرَنی كئچیریلسین.
سون سؤز؟
سیزدن و دوستلاریمدان، اوستادلاریمدان چوخ تشكر ائدیرم.
5باخيش