لطفا چند لحضه صبر کنید
این انجمن در ستاد ساماندهی پایگاه های اینترنتی وزارت فرهنگ و ارشاد اسلامی ثبت شده است...

آكواریوم

دنیزلرین گون‌اورتادان سونرا ساعات 4-5دن گون‌باتانا كیمی بویاسی اولان بیر بویادا جیلیدی اولان كیتابی اوخویاركن بعضن‌ده باشینی ساغا چئویریب اویناغان بالیقلا‌رینا باخیردی. چوخ چكمه‌دی كیتابی بوكوب، اؤنونده اولان ماسانین اوستونه قویوب، دیزلرینی قوجاقلاییب آكواریومون ایچینه جومدو. جوماركن اؤز-اؤزو ایله دئدی:
-‌ هن، قویروق بولایین، كئف‌ده، یاشاماق‌دا، دونیادا سیزینكی دی. نه یئمك فیكری نه‌ده غم-غصه. هر نه قاباغینیزدا حاضیردی.
سونرا فیلمه باخاركن یوخویا گئدن آداملارا تای، هئچ بیلینمه‌دی نه زامان یوخویا گئدیبدیر. او، یوخودا گؤردو، بالیق اولوب دوشوب اؤز ائوینده‌كی آكواریومون ایچینه. گؤردویونو اینانماییردی. آز قالیردی گؤیلره قاناد آچیب زیروه‌‌لرده اوچاق قوشلار كیمی اودا قاناد چیخاریب اوچسون. اؤزونو آكواریوم‌داكی داشلارینی بیرینه چالیب بالیق اولدوغونو ایناندی.
2
گوموشو بویالی بدنی ایله آچیق ماوی‌یه چالان قانادجیق‌لاری اولان بالاجا بالیق، هاوا پومپونون یانیندان آدام بالیغینین او چیلغین ایشلرینه باخیردی. تله‌سیك اونون یانینا گلیب دئدی:
-‌ او پاپاق آدام سنی تازا آتدی بورا؟
- كیمی دئییرسن؟ ،دئیه آدام بالیغی جاواب وئردی.
- بیزی بورادا ساخلایان آدامی دئییرم. اورادا مبل اوستونده همیشه‌كی یئرینده سه‌ره‌نیب یاتیب.
سونرا آرتیردی:
-‌ یازیق! هله بیلمیرسن باشینا نه اویون گلیب، سنه هله كئیسن.
آدام بالیغی بو سؤزلره چوخ‌دا باش قوشماییب بیر توو ایله اؤزونو آكواریومون اوبیری بوجاغینا چاتدیریب اورالاردا گزمه‌یه باشلادی.
گوموشو بالیق ایسه اؤز-اؤزو ایله؛ "دئدیم دا... هله چوخ چكر بیله‌سن هانسی جهنمه دوشوبسن" دئییب پومپون یانینا قاییتدی.
3
گوموشو بالیغین یولداشی اولان زیغ بالیغی دونن دن صدف‌لرین قیراغیندا گیزلی قالمیش بیر قیدا دنه‌سینی توو ایله قاپیب یئیه‌یئیه اؤزونو بالاجا گوموشو بالیغینا چاتدیری. بیرآز یولداشینا باخیب سونرا دئدی:
-‌ نه‌دی؟ یئنه توموبسان؟ یئنه نه یی دوشونورسن آی بالا...
گوموشوبالیق اونا ساری باخماسادا جاواب وئردی:
-گه له جه ییمی
- گؤتور ییغیشدیر... سن‌ده بیزی اؤلدوردون بو گه له جه یین له...
دای نه ایستیرسن، یئمه یین وار، سویون وار، راحاتلیغین وار...
حوصله ن اولسا ایستیردیم سنی بیر یئنی یولداشیمیزنان تانیش ائدم... دئییر من آدام بالیغی یام...
-اونو تازا گلنده گؤردوم... او هله كئیدی...
- نوخوشدو...
- هن نوخوشدو!
- آهان نوخوشدو! آی بالا سن ده هامینی نوخوش بیلیرسن
- هامی نی بیلمیرم... آما نوخوشا نوخوش دئیرلر، بیری نوخوشلار قانادجیقلاری آغ سه پر... بیری ده یئمك- ایچمك نوخوشو اولار...
زیغ بالیغی یئنه بو سؤزلره دؤزمه ییب ساغوللاشمادان اورادان آیریلدی.
4
آدام بالیغی آكواریومو آلت- اوست ائتمه دن بیرآن دا یورولماییب بویان- اویانا اوزوردو. چوخ چكمه دی قارنی آجیخدی. اؤزونو زیغ بالیغینا یئتیردی. زیغ بالیغی داشلارین دیبینده، آتاسینین یانیندا دئشه له نیردی. آدام بالیغی گؤروب اودا اوناساری گلدی. آدام بالیغی سولقون- سولقون دئدی:
-بس نیه قیرادان خبر یوخدو. من آجیمدان اؤلورم.
- بیلمیرم... گاهدان گؤروسن نئچه گونه كیمی وضعیت بئله اولور. او آدام حتمن یئنه ائوده دئییل.
- اوندا نه ائلیرسیز، نه یئیرسیز
- باخیب گؤرسه یدین اؤیره نردین... داشلارین دیبیندن بایات قیرا تاپیب یئییریك... گل سن ده دئشه لن
آدام بالیغی ایندی بیلدی بورادا اولدوغونا گؤره بولار آج قالیب. اؤزو ده آجیندان بیلمیردی نه ائتسین. اؤزونو بویان اویانا ووردو بلكه یوخودان دورسون آما فایدا وئرمه دی. او اینساندی بالیغ اولوب قالاجانینی. زیغ بالیغین ین دؤنوب اودا باشلادی دئشه له مه یه.
5
گوموشو بالیغ گئجه یوخوسونون لاپ او شیرین اولان واختلاریندا اوره یی دئیلیب آتاسی ایله دانیشماق ایسته سه ده، آتاسی آج قارین بیلمه ییردی هانسی داشی دئشه له سین هانسی قالین. آز قالیردی داشلارین اؤزون ده یئسین. سونوندا مجبور اولوب اوغلونون ( آتا ائشیدیرسن نه دئییرم ) سؤزونو ائشیدیب دئدی:
-دئ گؤرخ نه دئییرسن... حتمن یئنه قاباقكی سؤزلردن دی
- آتا گل منه اینان...گل منه دایاق اول... بیر اول... بیز بورا مالی دئییلیك... قاییداق ائل- اوبامیزا... اونا عاید اولان یوردلاریمیزا...
- گؤردون... گؤردون... آی بالیق لار گلین ائشیدین گؤردون منیم بو پاپاق اوغلوم نه دئییر... دئئییر بو گؤزللییی، بو یئمك لری، بو دیلخوشلوغو بیراخیب قاچاق بورادان...
- آتا بیرآزدا اوجادان دئ... سن دئییرسن بلكه من دیس دانیشیرام همده باغیریرسان؟ دئ قوی هامی ائشیدسین، او تازا گلن ده بیلسشین هارا گلیب
- آخماق اوغلان من هئچ بیلیرسین نه دئییرم... او یازیق آنانی دا سن قودازا وئردین...
- یوخ- یوخ آنام منه اینانمیشدی... آما دور واختیندا آتیلمادن بیزی قابلامالارا بوشالداندا دئدیم آتیلاق
قاب یووان یئرین گیلیغینه، آما او قولاق آسمادی، اورانی باغلایاندان سونرا آتیلدی قالدی اورادا... سونوندا...
-دئ... دئ سونوندا اؤلدوردوم اونو... اؤلومه گؤندردیم
- آی آتا نه دئییرسن... او بیلدی هانسی یولو گئیدیینی هرنه اولسادا بو حیات دان اؤزونو قورتاردی بلكه ده ایندی دیری دی...بؤیوك بیر گؤل ده، دنیز ده نه بیلیم اقیانوس دا یئنی بیر حیات باشلاییب... ٱه آنا... بو یئرده سن نوش اولارسان
- آی بیلردیم كیم سنه بولاری اؤیردیب... كیم سنی یولدان چیخاردیب... دری سینه سامان ته پردیم... باخ او عاغیللی زیغ بالیق لارینا... اولاردا اؤیرن، نئجه گؤزل اویناییرلار... نئجه گؤزل كئچینیرلر... آی اوغلان یادیما گه له نی بیز آتاسی- باباسی بورالارداییق هئچ كیم ده دئییب بورادان گئدك دنیزلره... اصلن دنیز هارادی؟
- آتا نه یه گیزله دیرسن؟
- نه یی گیزبه دیرم...
- من بیلرم سنین آتان دا چالیشیب بوردان قاچسین آما سنه گؤره قاچماییب...
گؤشو بالیغینا آتاسی بو سؤزو ائشیدیر- ائشیتمز حیرصله نیب داها هئچ نه دئمه ییب اورادان اوزاقلاشیب بیر قیراقدا توموب دایاندی. سونرا اؤز جانلیغینی خاطیرلادی.
آتاسی یالوار- یاخار ائدیردی اونا:
-آی بالام شیلتاق ائله مه... عشق نه دی... سئودا نه دی من هرنه یی پیلانلامیشام... سن گلمه سن من نئجه گئدیم؟ سنی سنی نئجه تك باشینا بیراخیم...
- آتا من اونو چوخ سئویرم... سؤز وئرمیشیك بیر بیریمیزه، آند ایچمیشیك هئچ واخت تك قویمایاق بیر- بیریمیزی...
- اوغول بونه سؤز دی... منله گله سن حیات دا بیر عؤمور یاخشی گونلر گؤره جكسن...
- آتا سن گئت من اونسوز قالا بیلمرم...
بیر بالیغین اورادان كئچنده اونا دیمه سی ایله اؤزونه قاییتدی كئجمیشلردن. باشلادی دئیینمه یه:
-هن من قورخاغام... من دن هئچ نه چیخماز... من بورادان آیریلاسی دئییلم...
6
آدام بالیغی هر یانی دئشه له ییب بیرزادلار تاپیب قارنی نی دویورسادا، یئنه راحاتسیز ایدی. او بیلیردی بورادا اولانادك هم بولار همده اؤزو آج قالاجاق. بئله دوشونجه لر ایله گولشركن بویلو بالیغ لارین بیری اوبیری بالیق لاردان آرالی بیر قیراق دا دوغماغا باشلادی. آج بالیق لارین هامیسی نین گؤزو گؤیده كی اولدوزلارا تای پاریلداییب گؤز آتمایا باشلادیلار.
بویلو بالیغین دوغماغی قورتولار- قورتولماز آج لارین هامیسی نی اؤز یانیندا گؤردو. نه قدر یالوار- یاخار آنداماند ائتسه ده كار سالماییب نئچه نئچه ثانیه نین ایچینده هر نه یی الدن گئتمیش گؤردو.
آدام بالیغی بو دورومو گؤروب هویوخوب قالمیشدیو تئز دوغان بالیغین یانینا یئتیردی اؤزون.
-بس بئله نییه... نه اولدو؟ آدام بالیغی دئدی.
دوغان بالیق آغلار گؤز ایله اوتقونا= اوتقونا دئدی:
-بورا اورمانادی... مه یه بیلمیرسن... آجیلیقدان منی ده یئییرلر بیرگون...
بو سؤزو ائشیدن آدام بالیغی بیر آن دا گؤموشو بالیغین سؤزلرینی خاطیرلایاركن ائله بیلدی دونیا باشینا فیرلانیر.
7
آدام بالیغی گیج- گیج، بولانا- بولانا گئتدی گؤموشو بالیغین یانینا. گوموشو بالیق آتاسی ایله دانیشاندان سونرا، پومپون اوستونه گئریب آدامین ائویندن، پرده سی چكیلمیش پنجره نین قیراغیندان قاش گؤز آتان یاریمجیق آی- ا باخیردی.
آدام بالیغی، گوموشو بالیغین یانیندا سس سیز دایانیب.
خیلاقدان سونرا گؤز یاشلاری سئله دؤندو.
گوموشو بالیق بو دورومو گؤروب گولومسه ییركن دئدی.
-من بیلیردیم بیرگون كئیلیكدن چیخاجاقسان
- یورولدوم بورادان... نه قدر گؤزله ییم او آدام بیزه یئمك وئرسین... نئجه دؤزوم بوراداكی ظولوم لره، داها بورا منه قفس كیمی دیر
- آی كیشی بورا قفس دی... قفس... قفس كیمی دئییللللللل ـگوموشو بالیق بونو باغیراراق دئدی.
- منی قورتار بوردان ... منی قورتار...
- قورتاریم؟ گولمه‌لی سوال ایدی... بیری ایستیر منی بورادان خیلاص ائله‌سین
- بیر یول دئ منه
- منه تای دؤزمه‌لیسن
- نجور؟
- من دؤزموشم آكواریومون سویو كیفیرله شسین. اوندا او آدام بیزی تور ایله توتوب قابلامالارا آتاجاق. قابلامالاریدا قویاجاق قاب یووان یئره، سونرا كیلیفین آغزین آچاجاق كیفیر سویو قاب ایله اورا تؤكه بیزده تئز آتیلمالی ییق
- نه قدر دؤزه‌ك بورا كیفیر اولسون؟
- بیر-ایكی آی!
ایكی سی بیر-بیری ایله شیرین- شیرین دانیشیب آی لا اولدوزلار لا واخت كئچیردیك‌لری زامان، نئچه ایلان بالیغی اونلارا ساری گلدیلر.
گوموشو بالیق موضوعنو آنلاییب تئز آدام بالیغینا دئدی:
-ایلان بالیق لار یئنه قودوروب لار... هركیمی ضعیف بیلسه لر یئیه جك لر آجلیقدان... تئز قاچ...
آدام بالیغی هانسی یانا قاچدیغی نی بیله نه ایلان بالیق لاری اونو دؤوره له ییب اهمال- اهمال اونا یاخینلاشدیلار.
آدام بالیغی هارای چه كه- چه كه دئدی:
-منه رحم ائدین... منیم اتیم آجی دی.. من مین بیر اومیر ایله بورا گلدیم منی یئمه یین ن ن ن ن.
ایلان بالیق لاری اونو سایمایاراق بیران اونا هجوم چكدیلر.
8
كیشی یاتاقدا ال- قولون بویان اویانا چیرپیب یوخودان دیسكینیب اویاندی. یئیین اؤزونو آكواریوما یئتیردیو گوموشو بالیق پمپ اوستوندا ایدی، او بیری بالیق لار ایسه اویان- بویانا فیرنیخیردیلار. آدامی گورركن تئز قویروق بولامایا باشلادیلار.
كیشی ساغا دؤتده پرده سی چكیلمیش پنجره نین قیراغیندان گؤروش پارلاق آی- ا ساتاشدی.
گولومسه ییب، گئجه یاریسی اولدوغونا باخمایاراق ال- قولون چیرمالاییب، بؤیوك قابلامانی سو ایله دولدوروب قویدو قاب یویان یئره سونرا بالیق لاری بیر- بیر قابلامایا آتیب گیلیفین قاپاغین آچیب یاتاغینا دؤندو.
1393/6/25

+0 به‌ین

گؤنده ريليب تاريخ یکشنبه 2 آذر 1393يازار بولاق
|
اثرلريزي بو سایت‌دا ياييملاماق ايسترسه‌نيز، يازديغيميز ايمئيل طريقيله بيزيم‌له ايلگي قورون. اثريزي يوللاياندا شکيليزي‌ اونوتمايين
قالب وبلاگ