لطفا چند لحضه صبر کنید
این انجمن در ستاد ساماندهی پایگاه های اینترنتی وزارت فرهنگ و ارشاد اسلامی ثبت شده است...

1372-جی ایل، آبان آیینین 26-سیندا دونیایا گلیب. اوشاقلیقدان هونری و هونر سئور بیر عائیله‌ده بؤیودویونه گؤره ادبیاتلا ایلگی‌له‌نیب. 16 یاشیندان ایلك اؤنجه شعرله ادبیاتی باشلاییب، ایندیسه چوخلو نثر و اؤیكو ساحه‌سینده چالیشیب، مهندسی‌صنایع ریشته‌سینده تحصیل آلماقدادیر. آشاغیدا اوخویاجاغیز اؤیكو حامیدین اوچونجو توركجه یازدیغی اؤیكوسودور.

بونو دا آرتیراق كی بو گون حامیدین دوغوم گونودور :)

بو گونو تبریك دئیه‌رك سیزی اؤیكوسونو اوخوماغا دعوت ائدیریك



- سعید دئیرم ذهنونده سوژه یوخدی؟

- نه سوژه سی؟
- داستان یازماغا. یامان یازماغیم گلیر
- دوزدن؟ هاروننان گلیر؟
- ساریما دوزدن دئیرم. ایستیرم بی داستان یازام ٬ آنجاق موضوعین تاپبیرام.
- یاراتدیغووا شوكر الله ٬‌عیززت و جلالووه شوكر ٬ گئده بی شئی تاپ اوتیر یاز دای
- قانمیسان یا اؤزو ویریبسان قانمامازدیغا؟
- اده سن ساریبسانه. آدامین اول ذئهنینه بی شئی گلر سورا اوتیرار آدام بالاسی كیمی یازار
- بابا منه چتینی اوولیدی. من موضوع تاپسام اوتیریب یازارام.
- هه سنده ساعاتین عقربه لری برعكس تولانیر. اول یازماغون گلیر سورا موضوع گزیسن.
- ایسته‌مه‌دیم هئچ. ساغول
- قوربانام گئنه ده بی شئی لازیم اولسا اؤزیمه دئ.

یوخ بوندان منه سوژه تاپان اولماز. گرك اؤزوم اؤزومه بیر چاره قیلام. نه ایش گؤروم؟ كئچیرم اوتاغا. بیر زامان قیز دوستوما دئدیییم سوز یادیما توشور. سؤزومو قبول ائله‌سین دییه بیر خاریجی آد اوولینه قوشوب دئدیم:
- تئللی ؟ بیلیرسن ائستیوئن فئدئریكو یازیجی اومایا گؤره نه دئییر؟
- گئنه منه دئدون تئللی؟
- سؤزه قولاغ آسئ تئللی تئلسیزین بوشدا
- هه یاخجی ٬‌سؤزو دئ
- ائستیون فئدئریكو دئییر منیم نظریمه آدام گرك اوتیرا بی یئرده مثلن اوتاغ دا باشدییا یازا ٬ اوقدر یازاكی دای یازمایا بی شئی قالمییا ٬ سورا اوتاغ دان چیخا هال دا اوتورا یازا و او قدر یازا كی اوننان سورا هر نه یازسا تیكراری اولا ٬ سورا ائودن چیخا یازا ٬‌یازا و یازا
- عجیبه سؤز دئییب ٬ یازیچی دی اؤزی؟
- هه بابام. ائله اونا گؤره دی كی فرانسه نین بئهترین یازیچی سی دی دای.

ایندی او قیز جشنواره لرده مقام گه‌تیریر و داستان لاری چاپ اولور ٬ منده اوتورموشام سوژه آختاریرام. اؤزومه دییرم قوی بیر سئری ده اؤزوم ائستیوئن به‌یین سؤزون ایمتاحان ائله‌ییم. اوتاغا باخیرام. فرشادین تومانی یئرده دیر و نه‌جور چیخاردیب اوجور یئره قالیب سالیب. سعیدین جوراب لاری قاپینین دالیندا دیر. گؤزومون گؤینه‌مه‌سینین ده نه‌ده‌نی بو اولا بیلر. دیوارا جانی دئپین عكسی ورولوب و كامیلن بو ایكی مورده یاراشیر. پئنجره دن اوبیری ائولر ... . اه! سعیدین جوراب لارینین یازماسی وار آخی؟ من بونون نه‌یین یازیم؟ ائله بیر داستان یازیم سعیدین جورابینین زیندگی نامه‌سی اولسون. گؤر نه گونه قالمیشام سنی الله.
اؤز سؤزوم اؤزومه بیر ایش گؤره بیلمیر آنجاق پریسا همان سؤز له داستان دی‌كی یازیر. شاید بونا گؤره اولا كی او هله فیكر ائله‌ییر دوغوردان او سؤزو ائستیوئن فئدئریكو دئییب و من اؤزوم بیلیرم كی او سؤز منیم معده‌م دن چیخیب.
بو وضعیت ده سوژه تاپباق اولماز‌. دورون چیخیم بازارا. خییابان دا حتمن سوژه چوخدور.
- هارا گئدیسن؟
- چیخیرام بی خییابانا دولانام
- یاخجی اوندا دایان
- نه ایشون وار؟ اونی نئینیرم؟
- گه بی نایلونی
- نئینیرم نایلونی؟
- گه قوی جیبووه خیاباندا بیردن یازماغون گلسه توت ساخلا بیندا
« چوخ شیرین سن » دئییب ائودن چیخیرام.
بودا منیم ائوبیرلریم. خلقین دوستو تشویق ائله‌ر بیزیم كی ده بایا قویور. اه... اؤتورئ ! اوندان نه اینتیظار وار آخی؟ عؤمرونده بیر صفحه كیتاب اوخوماییب. فقط بیلیر گلن گئده‌نه منیم كیتابلاریمی گؤرسه دیب ٬ یالان دان دییه هامیسین اوخویوب.
گؤزومو گزدیریرم. اینترنئت ده یازمیشدی هر آتدیم دا بیر سوژه وار. آشغال دولونون ایچینه باخیرام. بیر پیشیك چیخیر. دیسگینیرم. هه ائله بو سوژه اولا بیلر باخ. او یازیچی دوستوم اولسایدی دییه‌ردی اونو یاز. آنجاق... پیشی یین آشغالین ایچیندن چیخماسی نین نه‌یی داستان اولاجاق؟ ماشین لارا باخیرام. خیابانا. بولوارین آغاجلارینا. تیر برقه. سیمین اوستونده اوتوران سئرچه‌لره. یئریییرم. بو بویدا شهرده ایندی منه بیر شئی تاپیلماز داستانیمی یازام. شهرین اصلی مئیدانینا یئتیشیرم. قوی دوروم بوردا. بلكه سوژه لر من رد اولان دان سونرا گلیرلر.
 الیمی جیبیمه سالیب دورورام. او تای بو تایا باخیرام. به به! سوژه لره باخ. یوغون ٬‌ ساچ قارا ٬‌ دوداغ قیپ قیرمیزی ٬ قاش موكت و گؤ گؤز. كامیل بیر قوخمالی فیلم سوژه سی. دلی شئیطان دئییر كارگردان اول...
اوتوبوس گلیب گؤزومون قاباغیندا دورور. ایچینده كی آداملارا باخیرام. بونلارین هره‌سی بیر یئردن گلیب و بیر یئره گئدیرلر. عجیب كشف ائله‌دیم سن اؤل‌!
- كربلایی ؟ دئرم بی شئی ایتیریبسن؟
چیینیمده بیر ال احساس ائله‌ییرم.
- یوخ ائله بئله‌سینه دورموشام.
- بایاغدان باخیرام. دوریبسان گلن گئده‌نه باخیسان
- موشكیلی وار؟
- یوخ ائله سوریشدیم
- چشم گئده‌رم
یئریییرم. توكانلارین چیراق لارینا باخیرام. یازمایا هئچ زاد یوخدور. بیر اوغلان قاباغیمدان كئچیر. آریغ ٬‌گوده ٬ سویشئرتینین بؤركون باشینا چكیب. اللری جیبینده و قولاغیندا دا بیر هئدفون وار. حتمن بیر راك آهنگه قولاق آسیر. اوغلانا باخاراق یولومو دؤنده‌ریب و دالینا توشورم. بو اوغلان جالیب یئرله‌ره گئده بیلر و جالیب ایشلر گؤره بیلر. دوز دئییرلر ائله سوژه اؤزو گلیب آدامی تاپار. بیر كوچه‌یه دونور. بیراز فاصیله ایله ده من گئدیرم. سورعتین آزالدیب چوخالدیر و من ده چالیشیرام دالا قالیب ایتیرمییم. هاوا قارانلیق دی و تیر برق لرین فاصیله ایله ایشق سالمالاری بورانی جینایی فیلم لرین صحنه لرینه اوخشادیر. اوغلان الین جیبیندن چیخاردیب قارنینین قاباغینا توتور. بیرازدان سونرا یئنه دن جیبینه قایتاریر. دییه‌سن قارنی آغریییر. یئریییر و یئریییرم. یاریم ساعات دیر ائله یئریمك منه قالیب. نه بیر ایش گؤرور و نه بیر یئره گئدیر. دای ایستیرم قاییدام. سوژه ایسته‌مه‌دیم گه ایندی بوردان گئجه چاغی ائوه گئد.
ائله قاییتماق فیكریندی‌یم كی بیر ماشین قاباغیمدا دایانیر. ماشینا باخیرام. دؤرد نفر ایچین ‌دن توشور. آریغ اوغلان سورعه‌تین چوخالدیب و گئدیر. من ده اونا باخیرام. شیكارچی شیكارینین قاشمایینا باخان كیمین.
- هه اوغیل هارا باخیسان؟
دییه‌سن جنایی فیلم بوردا ژانرین ده‌ییشیب گانگستئری فیلم لره دؤنور.
- هئچ ائله قدم ویریرام.
- قدم ویریسان؟‌ ایندی؟ بیردا؟
گؤرورم شرر اولاجاق. حتمن اوغرودان زاتدان دیلاركی من ایشله‌رینه موزاحیم اولموشام.
- آغا دوزین ایسته‌سؤز قاباغدا اوغلان گئتدی هااااا ٬‌اونا باخیردیم من
- نه‌یینه باخیردون؟‌ به‌یه‌نیبسن؟
- یوخه آغا او نه سؤز؟ سوژه گه‌زیردیم داستان یازماغا
بیربیرینه باخیب منیم گیج‌لییمه ایشاره ائله‌ییرلر
- گؤزل اوغلان یولو دؤندر گئت بیده بیرینین دالینا توشمه
- یوخ منیم ایشیم یوخیدی‌كی. فقط باخیردیم گؤرم نه ایش گؤریر بیده هارالارا گئدیر؟
اوغلانین بیری جیبین‌دن قمه چیخاردیب منه ساری توتور
 قمه‌نین چیككیلتیسین ائشیدنده فارسلار دئمیشگین فراری قرارا ترجیح وئریب و بیر باغیشدا دئییب اكیلیرم.
دالیمجا قیشقیریرلار و من تئز تئز دؤنوب دالیما باخاراق سورعه‌تیمی چوخالدیرام. كوچه لرین بیرینه دؤنوب و قاچمایا باشلاییرام. ایاغیم كوچه‌نین چالالارینینن بیرینه توشور و یئره یخیلیرام.
« باشووا داش توشسون. سوژه اوستونده آز قالمیشدی قولاغو كسه‌لر » دئییرم.
خییابانا چیخیب باشیمی سالیب آشاغی و فقط اؤز قاباغیمی گؤرورم. ائوه ساری یئریییرم. ایسته‌میرم هئچ زادا فیكیرله‌شم. ایوه چاتیرام. قاپینی دؤیوب آچیرام. فرشاد لا سعید اوتوروب لار ورق اویناییرلار.
- تاپدون؟
- نه‌یی؟
- سونبول و ریحانی قیزیل گول لری ٬ نه‌یی آختاریردون؟
- اه اؤتیره ٬‌ایسته‌میرم هئچ یازام
- اده دوز جاواب وئر منه. آغزو بیرنو ایمه.
- سعید باغیشدا بیراز باشیم آغریر. حؤصه‌لم یوخدی.
سعید فرشادا باش بارماغین گؤرسه‌دیب گؤزون به‌رلدیر. سونرا اوزون منه ساری دؤنده‌ریب دئییر
- گه اوتی بی چاهار برگ ویرای
- الان ائله؟
- هه لاپ بئله الان. هئچ سؤز ده دانیشما
اوتوروب اویناییرام. سعیدین گولدویو ایچین حتمن من چوخ اویوندا گیج‌له‌نیرم. آخیردا دا اوتوزورام. اوزومه باخیب دئییر « كیشی سن اؤزون سوژه ایمیش‌سن »
ال ائله‌ییرم چای تؤكم. سؤزو توشور بئینیمه. عجیب سؤز دئدی. اوزونه باخیرام. قییافه‌سینه یئمیر بو سؤزلر!!


سون

+0 به‌ین

گؤنده ريليب تاريخ دوشنبه 26 آبان 1393يازار بولاق
|
اثرلريزي بو سایت‌دا ياييملاماق ايسترسه‌نيز، يازديغيميز ايمئيل طريقيله بيزيم‌له ايلگي قورون. اثريزي يوللاياندا شکيليزي‌ اونوتمايين
قالب وبلاگ