لطفا چند لحضه صبر کنید
این انجمن در ستاد ساماندهی پایگاه های اینترنتی وزارت فرهنگ و ارشاد اسلامی ثبت شده است...

(۱)

توروما دوشمه‌دی قیرمیزی بالیق
اَلی بوش دؤنورم سئوگیندن سنین.
فیرتینا قوپاجاق بو دنیزلرده
یئنه دالغالانیر ماوی كؤینه‌یین؛
قاییغیم باتاجاق سینه‌نده سنین…


(۲)

نه واردان وار
نه یوخدان یوخ
ایمكانسیز قالان
ایمكان آدامی…
آللاه اولسایدیم آغلاردیم…


(۳)

هردن بئله داریخیرام
هردن بئله غوربت اولور
لاپ آنامین اؤز قارنیندان
اوگئی آنا دوغور منی…


(4)

باشیمداكی آغیر سورغو
قیرمیزی قورصلاری سئویر…
 

(۵)
آتدیم اؤزومو
آرپاچایی قورودو!
سئل تكجه سنی سئویرمیش…
تور آتیرسان!
قانیم ماوی‌لشیر
ساچلاریم بولود اولور هاوادا
قیرمیزی بالیغلار دسته‌سی‌دیر اوره‌ییم.
دالغالانیرام…
كیم منی بئله
دنیزلندیریر؟!
قاچاق یوللاری…


(6)

 اؤزومدن چیخیرام
اوجا دووارلار!
اؤزومه دؤنورم
باغلی قاپیلار!
نئجه چیخماق اولور بو لامكان‌دان؟
هانسی تاكسی گئدیر
هانسی اوتوبوس؟
نه قاتار یوللانیر
نه اوچاق اوچور…
دوغولدوغوم قیش‌دان هله قار یاغیر
آنام آغری چكیر
دونیا فیرلانیر
باخیرام بو زیندان
اؤز بویومجادیر
اوزای دان اوزای آ!
آددیم با آددیم.
بیر آددیم اَزَل‌دیر
بیر آددیم ابد!
بیلسم كی سن وارسان
دووارلار قاپی؛
قارانلیق،
ایشیغین قاچاق یولودور…
نه تاكسی‌لار گلسین
نه باشقالاری
كیم تانیر
تانرینین ائوی هاردادیر؟

+0 به‌ین

گؤنده ريليب تاريخ دوشنبه 17 شهریور 1393يازار بولاق
|
اثرلريزي بو سایت‌دا ياييملاماق ايسترسه‌نيز، يازديغيميز ايمئيل طريقيله بيزيم‌له ايلگي قورون. اثريزي يوللاياندا شکيليزي‌ اونوتمايين
قالب وبلاگ