شعر: سارا سئلجان

هله كی نغمه‌لر وار، شرقی‌لر وار

هله كی نغمه‌لر وار، شرقیلر وار

سنین‌چون اوخوماغا.

اوخویورام،

مظلوملارین چوخ،

ظالیم‌لرین بول اولدوغو اؤلكه‌ده.

اوخودوقجا

سنه دوغرو یورویور آیاقلاریم،

اللریم سنه ساری دارتینیر،

اوره‌ییم یاخامی جیریب

سنی آختاریر

اللرین‌ده قلبیمین قیریقلاری.

«ساچقیرانلار» یاپیشیب ساچیم‌دان

گئری سورویور.

قانادلاریم چیرپینیر،

دوداقلاریم سوساییر

سنسیزلیین تصوروم‌داكی

آتش‌لی نفسینه

توخونماغا ،

سنه یاخیندان باخماغا.

هله كی نغمه‌لر وار، شرقیلر وار

سنین‌چون اوخوماغا.

كوچه‌لرده وئییل-وئییل گزه‌ن

سنی آختاریب

اؤزلرینی ده ایتیر‌ن آداملاری ،

سنه گئدن یولو تاپمادان،

سنی تانیمایانلاری،

آدینی بیلمه‌دن سنی آختارانلاری

ایناندیرماغا یالنیز سنین

قورتارا بیله‌جه‌یینه

صاحب‌سیزلیك‌دن ایتلری،

آداملاری كیمسه‌سیزلیك‌دن،

یالاندان دیللری.

پاییز دامجیلایان اوره‌ییمیزه

سنین باهار شكلی گتیره‌جه‌یینه،

خوشبخت ائده‌جه‌یینه اؤلكه‌نی.

سنه چاتماق اوچون

قیرمیزی قان‌لی یوللارلا كئچیب گلدیك

بیر نئچه دفعه

اما هر دفعه قلپ چیخمی‌سان.

سنه چاتیب

آغوشونا آتیلاندا جیلدینی دَییشمی‌سن،

آزادلیق،

سن ساختا پول‌دان دا ساختاسان.

هر دفعه

سئوینه-سئوینه اوستونه قاچانلاری

یا سفیل ائتدین، یا دلی.

دوغرومو، یا یالان؟

آزادلیق، بیز سنی آرادیق، سئودیك

حیات اوزونو.

سنده‌می بیزلری؟

هله كی نغمه‌لر وار، شرقیلر وار

سنین‌چون اوخوماغا،

آداملاری ایناندیرماغا سنین وارلیغینا،

بیزله اولوب، بیزیم اولاجاغینا.

بو دفعه آلداتمایاجاق‌سان كی؟!

Sara Selcan


Hələ ki nəğmələr var, şərqilər var

Hələ ki nəğmələr var,şərqilər var
Səninçün oxumağa.
Oxuyuram,
Məzlumların çox,
zalımların bol olduğu  ölkədə.
  Oxuduqca
Sənə doğru yürüyür ayaqlarım,
əllərim sənə sarı dartınır,
Ürəyim yaxamı cırıb
Səni axtarır
əllərində qəlbimin qırıqları.
“Saçqıranlar” yapışıb saçımdan
Geri sürüyür.
Qanadlarım çırpınır,
Dodaqlarım susayır
Sənsizliyin təsəvvürümdəki
Atəşli  nəfəsinə
Toxunmağa ,
Sənə yaxından baxmağa.
Hələ ki nəğmələr var,şərqilər var
Səninçün oxumağa.
Küçələrdə veyil-veyil gəzən
Səni axtarıb
Özlərini də itirən adamları ,
Sənə gedən yolu tapmadan,
Səni tanımayanları,
Adını bilmədən səni axtaranları
Inandırmağa yalnız sənin
   Qurtara biləcəyinə
sahibsizlikdən itləri,
Adamları kimsəsizlikdən,
Yalandan dilləri.
Payız damcılayan ürəyimizə
Sənin bahar şəkli gətirəcəyinə,
Xoşbəxt edəcəyinə ölkəni.
Sənə çatmaq  üçün
Qırmızı qanlı yollarla  keçib gəldik
Bir neçə dəfə
Amma hər dəfə qəlp çıxmısan.
Sənə çatıb
Ağuşuna atılanda cildini dəyişmisən,
Azadlıq,
sən saxta puldan da saxtasan.
Hər dəfə
sevinə-sevinə üstünə qaçanları
Ya səfil etdin,ya dəli.
Doğrumu, ya yalan?
Azadlıq,biz səni aradıq ,sevdik
             Həyat uzunu.
Səndəmi bizləri?
Hələ ki nəğmələr var,şərqilər var
Səninçün oxumağa,
Adamları inandırmağa sənin varlığına,
Bizlə olub,bizim olacağına.
Bu dəfə aldatmayacaqsan ki?!

+0 به‌ین